Amăng krah ia tơglăk ƀlu ñŭp, bul ia rơsĭ Côn Lin mưm pơdah tơbiă kah hăng sa ƀĕ phao kơnong pơđung amăng krah sa kual ia rơsĭ mlar. Phao kơnong anun dưi hmâo ling tơhan iâo ngui lĕ “lục giác đài”. Bul ia rơsĭ dŏng hăng dlông san hô amăng ia, yua anun tơlơi hơdip mơda mơ̆ng ƀing mă bruă tơhan dô̆ bưp lu tơlơi tơnap tap. Hăng anô̆ pha ra bruă mă pioh rơngai, ayuh hyiăng ƀu hơđong, rim thun mơnuih mă bruă tơhan ƀơi bul ia rơsĭ Côn Lin čơkă 6 blan pơ-iă hăng 6 blan hơjan. Hơdôm hrơi ia tơglăk kơtang, tơglăk prong, angin prong hmâo bơdjơ̆ nao laih lu tơlơi ƀơi bul ia rơsĭ, samơ̆ ƀu bơngot kơ tơnap ôh ƀing gơñu hrơi mlăm dô̆ gak wai hơđong kual rơhuông adai, kual ia rơsĭ mơ̆ng Lŏn ia. Thiếu tá Nguyễn Duy, Khua git gai bul ia rơsĭ Côn Lin brơi thâo:

  “Hơdôm rơnuk mơnuih mă bruă tơhan ƀơi bul ia rơsĭ Côn Lin lĕ leng kơ thâo dơlăm phiăn juăt mơ̆ng bul ia rơsĭ hăng biă ñu bruă mă ƀơi bul ia rơsĭ; djă kơjăp na nao ăt kah hăng ngă tui phiăn juăt wot amăng hơdôm hrơi pơhrăm hăng hrăm bruă, mă bruă, djru djă pioh kơjăp bul ia rơsĭ pô, kual pô gơgrong wai lăng”.

Amăng hơdôm thun rơgao, mơnuih mă bruă tơhan ƀơi hơdôm bôh bul ia rơsĭ Trường Sa ƀu pioh rơgao gru tơhnal, pơsir klă na nao hơdôm tơlơi amra truh, hơdôm bôh ƀat tô song dêh čar tač rơngiao ngă soh ƀơi kual ia rơsĭ dêh čar ta. Tui hăng Trung tá Trần Danh Hoàng, Khua git gai bul ia rơsĭ Sinh Tồn: Ƀing mă bruă tơhan ƀơi bul ia rơsĭ ƀu hmâo hrơi pơdơi ôh, amra gơgrong kơdŏng glăi lĕ bruă hmâo jao ba jơlan hlâo. Djop tơlơi hmâo ƀơi ia rơsĭ leng kơ dưi čih djă pioh, lăng tui hăng lăi pơthâo hmao tlôn pioh hmâo jơlan gah pơsir hmao tlôn hăng djơ̆, ƀu pioh hmâo hơdôm tơlơi truh, dô̆ kơtuă kah mơ̆ng pơgang.

 “Ƀing gơmơi nao pơ̆ bul ia rơsĭ ngă bruă jao, anai lĕ tơlơi ư-ang hăng bruă gơgrong yôm phăn mơ̆ng ling tơhan lăi ha jăn hăng ană mơnuih lŏn Việt lăi hrŏm. Git gai bul ia rơsĭ pơtô juăt brơi adơi ayong pơsit rơđah anai lĕ drah kơtăk, bơngat jua ơi yă. Bruă gơgrong mơ̆ng rim rơnuk lơm yak tơkai nao pơ̆ Trường Sa lĕ khom ngă bruă lu hloh dua wot, klâo wot; khom gir run na nao, gir run ƀu pơdơi pioh kơ Lŏn ia, pioh mơnuih ƀôn sang amăng lŏn drŏn hơđong pran jua hloh. Ƀing gơmơi kơjăp tơngan djă phao na nao, jing anih kơnang kơjăp pioh mơnuih hyu mă akan hơdang dưi gơgrong ƀơi ia rơsĭ”.

 Ƀơi kual bul ia rơsĭ Trường Sa, ayuh hyiăng pơpha jing 2 bơyan, bơyan phang hăng bơyan hơjan. Yua ƀu hmâo ia yua anun bruă mă yua ia hơjan ƀơi bul ia rơsĭ jing pơkrem biă mă. Amăng bơyan phang, rim mơnuih mă bruă tơhan kơnong kơ hmâo mơ̆ng 3-6 lit ia pioh yua rim hrơi. Tui anun mơ̆n ƀơi bul ia rơsĭ mơtah djư̆t kơ phun kyâo hăng hơdôm blah đang añăm hăng djop mơta djuai añăm. Dưi hmâo añăm mơtah anun lĕ ƀu ƀiă ôh ia hâ̆o ia hang pran jua mơ̆ng hơdôm rơnuk mơnuih mă bruă tơhan ƀơi anai. Thiếu tá Võ Văn Hiệp mă bruă ƀơi bul ia rơsĭ Đá Đông A lăi pơthâo: Bŏng glăi hăng tơlơi tơnap, mơnuih apăn bruă tơhan, ling tơhan Trường Sa mơ̆ng rơnuk anai truh rơnuk adih hmâo ruai glăi laih hơdôm hơdră kiăng dưi “Găn rơgao pơ-iă, hơjan”.

 “Khă tơnap tap samơ̆ tơdơi kơ mông pơhrăm ƀing gơmơi hơneč mă mông bơwih brơi kơ đang añăm. Ia yua pơkrem biă mă, pač ƀô̆ giong lĕ pruih kơ añăm. Đa hmâo mơmot đa ƀing gơmơi pơčrang apui mă hlăt, bôh abao kơ phun pla. Ia mơtah mơ̆ng phun pla, bơnga hiam... brơi ƀing gơmơi plai ƀiă glêh hlar tơdơi kơ mông pơhrăm. Mưn ƀuh giăm lŏn drŏn hloh”.

Bơbeč truh ƀơi anăp yua kơ pơ-iă, hang, rơbŭ kơthel ƀu hơđong, ƀơi bul ia rơsĭ biă ñu lĕ san hô hăng čuah kô̆, ia ƀlăng biă ñu hluai tui kơ ia hơjan. Khă hnun hai khom ƀơi mơta pô lăng hơdôm đang añăm puan, añăm hơbơi, bôh get, bôh hơdă, bôh pơneh… brung kơ bôh; hơdôm phun pla pioh ƀong, phun bơnga dưi pơjing tui anun kah mơ̆ng ƀuh tơlơi ƀăt bruă, thâo rơgơi mơ̆ng ƀing ling tơhan bul ia rơsĭ. Khă tơlơi hơdip mơda gơnam tam kơƀah hloh bơhmu hăng ƀơi kual lŏn drŏn samơ̆ tơlơi pơmin mơnuih apăn bruă tơhan, ling tơhan ƀơi hơdôm bul ia rơsĭ pơsit na nao prăp lui bruă jao kơdŏng blah, pơgang kual ia rơrĭ, bul ia rơsĭ pô hăng kual lŏn ia mơ̆ng dêh čar pô. Thượng tá Nguyễn Công Chính, Apăn bruă kơđi čar bul ia rơsĭ Trường Sa brơi thâo: Dưi mă bruă ƀơi bul ia rơsĭ Trường Sa lĕ tơlơi ư-ang mơ̆ng rim mơnuih mă bruă tơhan.

  “Ƀing gơmơi thâo dơlăm bruă jao hăng thâo dơlăm phiăn juăt klă hiam mơ̆ng puih kơđông, tơlơi tuh rơyuh pran jua mơ̆ng hơdôm rơnuk nao hlâo. Ƀing gơmơi ư-ang na nao phiăn juăt anun hăng pơtă pơtăn tơdruă djă kơjăp hăng ngă tui hloh dong phiăn juăt mơ̆ng Grŭp Trường Sa sông kơtang. Rim mơnuih mă bruă tơhan ƀơi anai pơsit pran jua djă kơjăp bul ia rơsĭ pô, kual lŏn ia mơ̆ng dêh čar. Pơsit na nao “bul ia rơsĭ lĕ sang ia rơsĭ lĕ plơi pla” pơsit pran jua djă kơjăp rim črăn bul ia rơsĭ, ia rơsĭ yôm phăn mơ̆ng Lŏn ia”.

  Lơm dô̆ hơdip Khua mir sir Hồ Chí Minh hmâo pơtă pơtăn laih: “Hrơi hlâo ta kơnong kơ hmâo mlăm hăng glai, ră anai hmâo tơhrơi, hmâo ia rơsĭ. Hang ia rơsĭ ta ataih klă hiam, ta khom wai lăng ñu”, mơnuih apăn bruă tơhan, ling tơhan hăng mơnuih ƀôn sang bul ia rơsĭ Trường Sa gum hrŏm hơbit, yak rơgao djop tơlơi tơnap, kơđiăng na nao, kơjăp djă phao, amra kơdŏng blah prong, ngă giong klă bruă jao pơgang pô mơ̆ng Lŏn ia./.