Ñu lĕ mơnuih djuai ania Êđê, amai H’Pha Ayun-mơnuih Ping gah hlăk ai, Khul khul hlăk ai să Cuôr Đăng, tơring glông Čư̆ Mgar, tơring čar Dak Lak-thâo hơdôm er čing atông amăng hrơi ngui ngor. Pơ-ư ang kơ gru grua djuai ania, dŏ pơmĭn lơm jua čing hơgor ataih tui, ñu gir run “iâu glăi jua čing” hăng hơdôm bruă mă tong ten.

Hăng tơlơi gơgrong lĕ Khul khul hlăk ai să, ñu rơkâo pok anih pơtô čing hơgor brơi ƀing hlăk ai amăng ƀon lan; hrŏm hăng hơdôm grup hlăk ai, nao tơl sang jak iâu ƀing rơgơi kơhnâo pơtô glăi čing hơgor brơi ƀing hlăk ai. Mơng anih pơtô anet blung a, truh ră anai, să Cuôr Đăng hơmâo akŏ pơjing 2 grup čing hơgor hăng sa grup pơđok boh pia.

Amai H’Pha Ayun brơi thâo, ƀơi hơdôm anih pơtô hrăm čing hơgor, ƀu djơ̆ kơnong bruă pơtô bruă er čing, bruă atông…đôč ôh mơ̆ ăt pơtô glăi pran jua hur har yua čing hơgor mơng hlăi ai. Pran jua anun lĕ ngă pơlir mơnuih mơnam, thâo hơdor tơngia ơi yă amĭ ama hăng djă pioh gru grua djuai ania pô.

“Ƀing hlăk ai gir run mut hrŏm. Ƀing gơñu pơdah tơlơi thâo thăi mơng ƀing gơñu, mơng anun thâo gơgrong hăng pơ-ư ang gru grua djuai ania. Hluai tui hơdôm grup čing hơgor hăng pơđok boh pia amăng să, ƀing hlăk ai hơmâo pơbưp, mut hrŏm amăng hơdôm tal pơplông gưl să, tơring glông, tơring čar. Mơng hơdôm hrơi pơphun anun, ƀing hlăk ai hơmâo djă pioh hăng ngă lar hyu anŏ hiam mơng gru grua djuai ania pô.”.

Bơ ƀơi sang hră gưl tlâo Buôn Hồ, plơi prong Buôn Hồ, rup rap nai pơtô Phạm Thị Thu Thảo-Khua khul hlăk ai sang hră, mơnuih Ping gah hlăk ai ba gru mơng gơnong bruă pơtô pơjuăt tơring čar-jing tơlơi juăt hăng ƀing čơđai hăng ƀing nai pơtô. Hăng pran gơgrong ba jơlan hlâo amăng hơdôm bruă amăng Khul hlăk ai-Khul amăng sang hră, ñu rơkâo pơphun pơplông dar video clip pioh hơdor glăi hơdôm hrơi ngă ngui ngor pơprong; pơphun hơdôm tal hyu čuă lăng anih phun, anih gru grua, anih čuă ngui hiam amăng ƀon lan; pơjing fanpage Khul hlăk ai sang hră kiăng pơƀuh brơi ƀing mơnuih ba gru, ngă bruă klă kiăng ngă lar hyu pran jua ngă bruă tơl hơdôm boh sang hră. Mơng hơdôm bruă mă anai, lu čơđai sang hră ƀu djơ̆ kơnong hrăm thâo đôč ôh mơ̆ ăt črâo brơi tơlơi pơmĭn, tơlơi hơdip hiam kiăng jing sa čô mơnuih ba gru. Nai Phạm Thị Thu Thảo brơi thâo:

“Hluai tui hơdôm hrơi ngă lơphet, pơtop hrăm, sang hră hơmâo ngă gêh gal brơi ƀing čơđai dưi mut hrŏm khul grup, mơng anun ba glăi tơlơi thâo thăi, tơlơi pơmĭn khăp kơ lŏn ia. Thun hrăm 2024-2025, hơmâo laih 2 čô čơđai mut hrŏm anih pơtô bruă amăng Ping gah”.

Anai lĕ mơnuih Ping gah hlăk ai amăng Khul hlăk ai gơnong bruă phiah phiăn tơring čar Dak Lak, amai Hoàng Thị Diễm Xuân-Khua khul hlăk ai-ƀu djơ̆ kơnong lĕ mơnuih apăn bruă abih pran jua amăng bruă mă đôč ôh mơ̆ ăt lĕ sa čô mơnuih ngă lar hyu tơlơi hiam klă hluai tui hơdôm tal hyu pơtô ba tơlơi phiăn tơl kual ataih, asuek.

Ƀu hŭi jơlan ataih, ayaih, ñu hrŏm hăng ƀing apăn bruă pơkŏn djă ba hơdrôm hră tơlơi phiăn, hră pơ-ar, gum hrŏm hăng hơdôm khul grup ƀon lan pơphun hyu hiăp bit, črâo brơi bruă ngă hră pơ-ar tui jơlan gah jê̆ giăm, tañ hluh. Ñu ăt lĕ mơnuih pơphun hơbô̆ bruă “Hlăk ai djru mơnuih ƀôn sang ngă tui bruă ngă hră pơ-ar mơng ataih” ƀơi Anom bruă djru ngă hră pơ-ar tơring čar. Hơbô̆ bruă anai djru brơi giăm 15.000 čô mơnuih pơgiong bruă ngă hră pơ-ar amăng thun rơgao-pơgôp prong amăng ngă pơplih phrâo bruă ngă hră pơ-ar, pơjing gong gai jê̆ giăm mơnuih ƀôn sang, yua kơ mơnuih ƀôn sang.

Hăng hơdôm tơlơi pơgôp prong, amai Hoàng Thị Diễm Xuân hơmâo khul hlăk ai tơring čar Dak Lak pơpŭ bơni lĕ mơnuih Ping gah hlăk ai ba gru thun 2025. Samơ̆ hăng ñu, tơlơi hok mơ-ak prong hloh lĕ ƀu pơdơi ngă bruă yua kơ mơnuih ƀôn sang, yua hơnong pơkă pơjing kơnuk kơna phiah phiăn mơng hơdôm tơlơi anet hloh amăng plơi pla:

“Hluai tui bruă mă rĭm hrơi hăng bruă mă amăng khul grup, ƀing gơmơi ba tơlơi phiăn giăm hăng mơnuih ƀôn sang, ngă hrưn đĭ tơlơi pơmĭn, thâo hluh ngă tui tơlơi phiăn, pơjing tơlơi juăt hơdip hăng mă bruă djơ̆ tơlơi phiah phiăn, tơlơi phiăn”.

Ƀing ta ăt ƀuh, mah mă bruă ƀơi anih anom phara, samơ̆ hăng pran jua hur har hăng gir run ba jơlan hlâo, ƀing mơnuih Ping gah hlăk ai ƀơi tơring čar Dak Lak glăk jai hrơi pơgôp ngă lar hyu pran đăo gơnang, pơtrut pran thâo djru bruă hăng tŏ tui ngă bruă mơng rơnuk hlăk ai amăng pơjing plơi pla hiam klă./.