Amăng rơwang bruă laih rơgao,djop gưl anom bruă hăng jơnum min pel ĕp bruă mă djop gưl hơmâo jăm tơlơi soh 35 boh sang bruă ping gah hăng 1.700 čô mơnuih ping gah ngă soh. Bruă tŭ mă hră pơar, pơsir hră rơkâo mơ̆ng mơnuih ƀôn sang lăi pơthâo tơlơi soh, hơmâo ngă tui tơpă, djru ngă kơjăp tơlơi tơpă amăng bruă mă lơ̆m ping gah. Khă hnun, bruă hyu sem lăng, pel ĕp dŏ kơƀah kah hăng aka ƀu ƀuh tañ tơlơi ngă soh; bruă ngă tui tơlơi klah čun amăng bruă pel ĕp ƀơi hơdôm anih aka ƀu khut khăt; hyu ĕp kiăng thâo tơlơi pơhing, pel ĕp tơlơi ngă soh dŏ sư̆ rơbư̆.

Ơi Nguyễn Đình Trung, Khua git gai ping gah tơring čar Dak Lak lăng yom tơlơi gir run mơ̆ng djop sang bruă, Jơnum min ĕp kơđi amăng bruă mă djop gưl rơwang bruă laih rơgao. Laih dơ̆ng lăi pơtă, rơwang bruă pơ anăp kiăng pơsir hĭ tơlơi dŏ kơƀah, pơđĭ tui boh tŭ yua amăng bruă hyu sem lăng, pel ĕp, boh nik ñu amăng amăng mă bruă ataih, lu bruă či hơmâo tơlơi ngă soh glăi.