Hơdôm pluh čô čơđai sang hră gưl prong amăng hăng gah rơngiao tơring čar Dak Lăk, glăk gum djru ba tơlơi bơwih ƀong hơdip mơda mơnuih ƀôn sang pơ să guai dêh čar Ea Rốt hăng Ia Lốp, tơring čar Dak Lăk, laih dong ngă lu ring bruă, bruă mă yôm ƀơi plơi pla. Grup 45 čô čơđai mơ̆ng Sang hră gưl prong Nam Cần Thơ hơmâo ngă hrŏm hăng hlăk ai, tơdăm dra amăng plơi pla ngă lu bruă djru yôm biă mă kah hăng: brơi hơdrôm hră hrăm hăng gơnam yua pioh hrăm hră kơ čơđai sang hră gưl sa, man pơkra anih ngui ngor hăng pơphun jơnum ngui bơyan pơdơi sang hră kơ ƀing čơđai, brơi loa djă hyu kơ hơdôm boh sang gru grua amăng plơi pla. Rơngiao kơ anun, hơdôm rơtuh pok hla gru Lŏn ia hơmâo brơi tơl tơngan mơnuih ƀôn sang, hơdôm rơbâo jơlŭ mi tôm pơ-iă čơčuk brơi kơ ƀing čơđai anet hăng ƀing tha ƀu hơmâo ană bă čem rông. Hơmâo mă gơnam djru hrăm hră kơ ană đah rơkơi prăp či mut hrăm anih 4, yă Huỳnh Thị Cẩm Tú, dŏ ƀơi thôn Dự, să Ia Lốp, tơring čar Dak Lăk, ol kơdol pran jua: “Pơ anai jing kual ataih yaih anun jing hơmâo mă gơnam djru tui anai mơak biă mă yơh, ƀing čơđai hai hor mơn, hok mơak biă mă. Bơni biă kơ ƀing čơđai sang hră gưl prong mơ̆ng ataih rai pơ anai ƀơk gơnam yô, tŭ yua kơ ƀing čơđai”.

Ƀu kơnong djru ba gơnam tam đôč ôh, ƀing hlăk ai ăt pơphun pok anih pơtô tơlơi phiăn pơgang tơlơi truh arăng kơplong mă juă jon, ma túy hăng sĭ ană mơnuih, kiăng ană plơi pơ guai dêh čar thâo hluh, thâo pơgăn mă pô. Prăk pioh ngă bruă rơbêh kơ 300 klăk. Adơi Mai Huỳnh Đặng, čơđai sang hră gưl prong amăng grup djru mơnuih ƀôn sang lăi pơthâo, sa wơt hrơi tơjuh ƀu sui ôh, samơ̆ pioh glăi lu tơlơi lăp hơdor ƀu thâo wơr ôh hăng mơnuih ƀôn sang pơ guai dêh čar wơ̆t hăng ƀing čơđai sang hră gưl prong.“Hloh kơ tơlơi čang rơmang hăng tơlơi kâo prăp rơmet hlâo kơ anun. Yua dah kâo juăt nao djru laih amăng bơyan pơdơi prong mơtah pơ kual Dap Kơdư, samơ̆ tal anai hơmâo lu tơlơi lăp hơdor, ngă ol kơdol biă mă. Tơdơi kơ tal anai kâo hơmâo hrăm lu tơlơi phrâo, kơđiăng lui kơ hơdôm tal djru khăp pap pơkŏn dong, djru pô kâo kjăp bruă, thâo hluh hloh kơ hơdôm bruă djru mơnuih tơpuôl”.

Ƀơi să Hòa Phú, tơring čar Dak Lăk, rơbêh 500 čô khua, tơhan Trung đoàn 584 (Anom bruă git gai tơhan tơring čar Dak Lăk) hrŏm hăng lu hlăk ai tơdăm dra amăng să phrâo pơphun bruă djru mơnuih ƀôn sang bơyan pơdơi prong 2025 tui hăng akŏ bruă mơ̆ng Anom bruă git gai tơhan tơring čar hăng Jơnum min djŏp djuai ania mơnuih mơnam Việt Nam tơring čar. Amăng tal djru sui 45 hrơi, ƀing khua, ling tơhan hăng hlăk ai tơdăm dra ƀơi hơdôm boh să Hòa Phú, Ea Kiêt hăng phường Tân Lập (Dak Lăk) gum hrŏm man pơkra glăi jơlan nao rai amăng plơi, pla kyâo, ngă ring bruă gum pơgôp tơhan hăng mơnuih ƀôn sang, sang dŏ kơ hơdôm boh sang anŏ hơmâo anăn kơnuk kơna djru, rơmet rơmot ngă hiam anih anom amăng plơi, să, phường, laih anun djru ană plơi mă yua boh thâo mrô, ngă hră pơ-ar amăng hrơi mông pơmut hrŏm plơi pla. Gum djru ngă bruă mơguah anai ƀơi să Hòa Phú, Đại Úy Phan Thanh Tài, Tiểu đoàn 303 - Trung đoàn 584 (Anom git gai tơhan tơring čar Dak Lăk) brơi thâo, bruă djru khăp pap pơphun mơ̆ng hrơi anai truh lơ 30/8, him lăng amra djru pơkra brơi 150 boh sang dŏ kơ hơdôm boh sang anŏ tơnap hơmâo anăn kơnuk kơna djru, pơkra glăi rơbêh 90km jơlan amăng plơi, pla hơdôm rơbâo phun kyâo mơtah ƀơi hơdôm boh să phrâo:“Tal 1 thun 2025, gơmơi iâu pơthưr rơbêh 100 čô khua, ling tơhan ngă bruă ƀơi dua boh să hăng sa boh phường, pơƀut hyu kuăi, huet amăng bưng, bơnư̆ kŏng ia, kih rơmet sang bruă kơnuk kơna, djru hơdôm boh sang anŏ hơmâo anăn kơnuk kơna djru hăng lu bruă mă tong ten...Mơ̆ng anun, ngă gum pơgôp tơhan hăng mơnuih ƀôn sang, jing atur kjăp khŏp kiăng gơmơi dưi ngă truh kih bruă pơhlôm pơgang rơnuk rơnua, pơgang lŏn ia”.

Gum hrŏm bruă djru mơnuih ƀôn sang tal anai, ƀơi să Hòa Phú, tơring čar Dak Lăk, hlăk ai tơdăm dra amăng să ăt gir ngă hơdôm mơta bruă kah hăng kih rơmet anih anom, djru ană plơi mă yua boh thâo mrô, pơtô ngă hră pơ-ar điện tử. Ayong Lê Dương Bá Uớc, Kơ-iăng khua Jơnum min djŏp djuai ania mơnuih mơnam Việt Nam să Hòa Phú, Khua grup hlăk ai să brơi thâo: Mah să phrâo pơmut hrŏm, hơmâo lu bruă biă, samơ̆ hlăk ai tơdăm dra lêng kơ hur har pran jua ngă bruă, gum hrŏm hăng ling tơhan amăng bruă iâu pơthưr hăng akŏ pơdong plơi pla phrâo.“Khul hlăk ai să ngă hrŏm hăng Trung đoàn 584 djru brơi neh met wa yuă pơdai, pĕ kơphê hăng tiu. Rơngao kơ anun, gơmơi ăt ngă lu ring bruă, bruă mă gah hlăk ai, hmư̆ hing lĕ pơdong kơthung pioh asuk huăi ngă hơƀak ƀơi thôn 8, să Hòa Khánh hơđăp”.

Hơdôm bruă mă rơđah rơđông, sit nik amăng bơyan pơdơi prong 2025 ƀơi Dak Lăk ƀu kơnong pơdah pran jua glăm bruă, hur har mơ̆ng hlăi ai đôč ôh ăt djru pơplih tơlơi hơdip mơ̆ng mơnuih ƀôn sang pơ guai dêh čar, plơi pla ataih ayaih. Mơ̆ng hơdôm gơnam djru anet, ring bruă brơi kơ plơi pla truh kơ bruă iâu pơthưr, abih bang bang hyu tơlơi hiam klă, thâo khăp pap, ngă jê̆ giăm hloh čơđai sang hră, tơhan hăng neh met wa./.