Ƀơi mông jơnum pôr pơthâo Hră pơtrun mơ̆ng Khua dêh čar brơi akŏ pơdong Jơnum min APEC gưl dêh čar thun 2027, hơmâo 19 čô ngă ding kơna, amăng anun, Kơ-iăng khua dêh čar, Khua ding jum pơtom hiăp ơi Bùi Thanh Sơn ngă Khua Jơnum min APEC gưl dêh čar thun 2027. Pơhiăp git gai mông jơnum pôr, pơthâo, Khua dêh čar ơi Phạm Minh Chính lăi pơtong: Anai lĕ bruă ngă yom pơphăn biă mă, lăi pơtong tơlơi lăng yom hăng khut khăt gir run mơ̆ng Việt Nam amăng bruă pơtrut tañ bruă prăplui Thun APEC 2027 sa bruă mă kơđi čar pơtom hiăp yom biă mă hăng Việt Nam.

Khua dêh čar đăo kơnang hăng bruă ngă sa pran jua, khut khăt gir run amăng abih bang ƀơi Việt Nam, hơmâo tơlơi dong yua mơ̆ng lu dêh čar pơdrong ngă ding kơna hăng Khul čih pioh APEC, Thun APEC 2027 amra tŭ yua hiam klă, djru hrŏm bruă hơdai gum nao rai amăng APEC đĭ nao amăng sa yak phrâo, dưi ngă djơ̆ tơhnal pơkă anŏ kiăng mơ̆ng ding kơna khul djru pơsir tơlơi rơnuk rơnua, pơđĭ kyar hăng pơdrong sah hing ang ƀơi kual ASIA-Thái Bình Dương laih anun amăng rŏng lŏn tơnah.