Khua dêh čar hok mơ-ak hăng bruă grup Dunamu glăk kơsem min tuh pơ alin hăng pơđĭ kyar ƀơi Việt Nam, sit biă ñu amăng bruă kông ngăn mrô, kông ngăn dưm mrô; laih dong lăng yôm hơdôm tơlơi pơgôp mơng grup Hana amăng pơđĭ kyar bơwih ƀong huă ƀơi Việt Nam hăng tơlơi gơgrong lĕ bơnah ngă hrŏm yôm phun mơng MB. Pơsur hơdôm grup pok prong tuh pơ alin ƀơi Việt Nam, Khua dêh čar brơi thâo MB lĕ sang bruă prăk đăo gơnang mơng Việt Nam hăng rơkâo MB hrŏm hăng 2 grup ngă hrŏm kjăp, tŭ yua, pơgôp pơtrut tơlơi rô nao rai ngă hrŏm yôm phăn djop mơta Việt Nam-Hàn Quốc.

Khua dêh čar jao Ding jum prăk kak hăng tơlơi gơgrong lĕ anih pơjing tơlơi pơtrun ngă lông lăng kơ anih yua kông ngăn mrô ƀơi Việt Nam, tŏ tui gum hrŏm hăng sang bruă prăk Kơnuk kơna Việt Nam hăng djop ding jum, anom bruă, ƀon lan bơdjơ̆ nao, djru brơi hơdôm grup amăng bruă hơduah ĕp, kơsem min tuh pơ alin ƀơi Việt Nam.