Amăng mông pơlăi nao rai, ƀing bơwih ƀong sĭ mơdrô hơmâo lăi pơthâo 66 tơlơi rơkâo amăng hơdôm bruă: prăk kak, sang bruă prăk, lŏn mơnai, tuh pơ alin, logistics hăng ngă hră pơ-ar. Sa, dua tơlơi rơkâo yôm phun anun lĕ rơkâo brơi čan prăk mă kmlai ƀiă hăng anom bơwih ƀong sĭ mơdrô tuh pơ alin pơkra pơjing gơnam đang hmua hơdjă, brơi čan hluai tui prăk dưi pơhrui glăi hăng kông ngăn ba glăi kơñ pơgi, lui hĭ ƀudah hrŏ jia sĭ mơdrô gơnam brơi asar kơphê mơtah, djru pơđĭ kyar kual pla pơjing, hơđong hăng pơtrut yua măi mok amăng pơkra….

Khua Jơnum min mơnuih ƀôn sang tơring čar Gia Lai ơi Phạm Tuấn Anh ƀuăn amra sem lăng, pơsir hơdôm tơlơi rơkâo mơng anom bơwih ƀong sĭ mơdrô, ƀuăn pok pơhai hơdôm tơlơi pơtrun kơ pơplih tuh pơ alin, pơplih pơčeh phrâo, pơplih mrô, djru brơi anom bơwih ƀong anet hăng gap ƀrô. Laih dong, Gia Lai amra đing nao kah pơpha prăk pơsur tuh tia pơkra ming, boh thâo măi mok, pơsur sĭ mơdrô, pơsir hĭ tơlơi gun man pơdong anih anom, pơđĭ kyar kual tuh tia pơkra ming, grup tuh tia pơkra ming hăng pơhlôm pơđuăi apui lơtrik hơđong; kơtưn bruă pơtô hrăm brơi mơnuih mă bruă pơlir hăng tơlơi sit nik amăng pơkra pơjing, pơtrut kơtang pơlir anom bơwih ƀong-sang hră.