Ơi Đỗ Văn Chiến bơni kơ khua mua sang hră hơmâo djru ba 39 čô hlăk ai tơdăm dra čơđai sang hră gưl prong Việt Nam dŏ hrăm pơ anai, laih anun čang rơmang sang hră ăt tŭ jum lu hloh čơđai gưl prong Việt Nam hăng pok pơhư tơlơi pơkă kơ bruă ĕp prăk hrăm hră hăng kơsem min mơ̆ng Việt Nam dưi nao hrăm. Ñu lăi pơtong, čơđai gưl prong Việt Nam hăng mơnuih djuai ania Việt Nam djop anŏ gêh găl hăng tơlơi thâo či hrăm pơ sang hră anai, wơ̆t hăng dua mơta bruă pơplông hăng tơlơi pơhiăp dêh čar tač rơngiao ăt kah hăng prăk kăk apah hrăm hră.

Sang hră anai hơmâo kĭ pơkôl ngă hrŏm djop sang hră, anom bruă pơtô pơhrăm hmư̆ hing ƀơi Việt Nam, amăng anun hơmâo sang hră gưl prong Đại học Bách Khoa.Tơdơi kơ mă bruă hăng khua mua sang hră, ơi Đỗ Văn Chiến hrŏm hăng grup khua mua mơ̆ng Việt Nam hơmâo bưp bơ ră ruai tom ƀing čơđai sang hră gưl prong Việt Nam hrăm ƀơi anai  laih anun ƀơk gơnam kơ čơđai sang hră gưl prong anai.