Tơdơi kơ sa blan mă bruă gong gai dua gưl, 135 bôh să, phường mơ̆ng tơring čar Gia Lai phun ñu hơđong pơphun bruă, lu tơhnal ba tơbiă bơwih ƀong mơnuih mơnam ba glăi bôh tơhnal klă. Hluai tui gru than anun, tơring čar ba tơbiă tơhnal pơkă pơđĭ kyar 6 blan rơnuč thun rơbêh kơ 7%. Kiăng dưi ngă tui tơhnal pơkă anai, tơring čar jao kơ 77 bôh să, phường gah Yŭ tơring čar Gia Lai hơđăp hơdôm tơhnal pơkă bơwih ƀong – mơnuih mơnam – wai lăng – pơkă kual.

Hơdôm tơhnal pơkă anai dưi pơplih phrâo jing 23 mơta bruă jao. Jơnum min mơnuih ƀôn sang tơring čar Gia Lai rơkâo hơdôm anih anom tañ pơdŏng hơdră pơđĭ kyar bơwih ƀong – mơnuih mơnam 6 blan rơnuč thun. Hrŏm hăng anun, pơdŏng dong glông bruă gong gai pơplih kơtang bruă čar mơ̆ng wai lăng, mơ̆ng wai lăng hơdai nao bơwih brơi, pơčeh phrâo, nao hrŏm hăng pơplih hră pơ-ar bruă čar, giăm mơnuih ƀôn sang, jê̆ mơnuih ƀôn sang hăng pơsir djop tơlơi kiăng lăp djơ̆ mơ̆ng mơnuih ƀôn sang, anom bơwih ƀong. Tơring čar amra tuh pơplai pơhrua nao anih anom gơnam tam, măi mok hăng pơpha mơnuih mă bruă lăp djơ̆ kơ hơdôm anom bruă ngă hră pơ-ar gưl să, phường. Amăng hơdôm bruă ječ, tơring čar amra pơphun hơdôm grŭp hyu mă bruă ƀơi anăp nao pơ̆ plơi pla pioh djru pơtlaih./.