Pơhiăp ƀơi mông jơnum, Khua Jơnum min mơnuih ƀôn sang tơring čar ơi Tạ Anh Tuấn lăi dlăm kơ tơlơi gơgrong bruă yôm phun mơ̆ng anom bruă pel ĕp kơđi amăng akŏ pơdong gong gai ngă bruă tơpă sit, tŭ yua. Ñu đăo kơnang Khua pel ĕp kơđi phrâo amra gơgrong bruă hloh, pơđĭ tui boh tŭ yua bruă pơgang, pơgăn hưp ham ƀong kông ngăn, prai ngăn hơdăp kơnuk kơna, pơsir kơđi ngă soh, bruă tơgŭ kơđi.

Khua tơring čar ăt jao bruă kơ anom pel ĕp kơđi tañ lăng glăi abih bang hră pơ-ar tơlơi phiăn, hơkrŭ kjăp tui tơlơi gum pơgôp amăng anom bruă, pơđĭ tui tơlơi rơgơi, tơlơi pơmin hiam mơ̆ng ƀing apăn bruă. Ơi Hồ Duy Thành ñu hrăm gưl prong Cử nhân Kinh tế, Cử nhân Luật, Thạc sỹ Lý luận hăng Lịch sử Nhà nước hăng Pháp luật, hrăm gưl prong Cao cấp Lý luận chính trị. Hlâo kơ hơmâo ruah ngă khua phrâo, ơi Hồ Duy Thành lĕ Khua ping gah tơring glông, Khua Jơnum min pơ ala mơnuih ƀôn sang tơring glông M’Drăk hăng Kơ-iăng khua Jơnum min pel ĕp kơđi Ping gah tơring čar Dak Lăk./.