Mơmot tom brơi (19/6), ƀơi Ƀirô mă bruă Gong gai dêh čar, Khua dêh čar ơi Phạm Minh Chính bưp ƀô̆ mơta khua git gai, khua hơđăp hơdôm bôh ƀirô čih tơlơi pơhing ƀrô djơ̆ tal hơdor glăi 100 thun Hrơi Hră pơhing hơkrŭ dêh čar Việt Nam (21/6). Amăng mông pơbưp ƀô̆ mơta, Khua dêh čar čang rơmang ƀing čih tơlơi pơhing ngă tui phiăn juăt 100 thun Hră pơhing hơkrŭ Việt Nam, hăng “pran bơngač, pran klă, čih kơjăp” tô̆ tui gum hơgôp kơ tơlơi pơđĭ kyar mơ̆ng lŏn ia, mơ̆ng djuai ania hăng mơnuih ƀôn sang.

Gah tơlơi ba tơbiă kơtưn lăi pơthâo hlâo čih tơlơi pơhing, Khua dêh čar rơkâo Ding jum Bôh thâo đưm, Bơkơjăp drơi jăn hăng Tuai čuă ngui amăng sa blan pơphun čih pơkra Tơlơi pơtrun pơkă rơđah kơ tơlơi rơkâo čih tơlơi pơhing, bôh yôm čih, hơdră pơkă kơ prăk apah tơlơi čih... kơ bruă pôr pơhing. Bơdjơ̆ nao anom mă yua măi mok pơhing, Khua dêh čar jao kơ Ding jum bôh thâo phrâo hăng hơdră mă yua măi mok čih pơkra hơdôm Tơlơi phiăn, hmâo jơlan pơsir lăp djơ̆ hluai tui djơ̆ hrŏm bôh yua kơ 3 bơnah: kơnuk kơna, plăng internet, mơnuih čih tơlơi pơhing. Pơhlôm 3 bơnah gum hrŏm hmâo bôh tŭ yua. Khua dêh čar rơkâo tañ mă yua Tơlơi pơtrun pơkă kơ lăi pơhưč amăng hră pơhing, pơsir dong hơdôm tơlơi dô̆ glăi hơdôm hrơi rơgao. Ƀrô djơ̆ tal anai, Khua dêh čar ăt rơkâo mơn, Ding jum Prăk kak kơsem min kơtưn ngăn rơnoh pơhrui glăi kơ bruă pôr pơhing./.