Mơ̆ng hrơi hơmâo ƀing ping gah nao tơl sang iâu pơthưr pơplih đang kơphê tha ƀu mơboh jing pla añăm hla rok, bơnga, phun kơbuă prang, sang anŏ ơi Liêng Hot Ha Linh, ƀơi plơi Dạ Tro, să Dạ Nhim, tơring glông Lạc Dương (Lâm Đồng) khin ngă tui hăng ba glăi prăk lu biă kơ sang anŏ. Ơi Liêng Hót Ha Linh brơi thâo, 6 sao añăm hla rok, bơnga hăng phun kơbuă prang hơmâo sang anŏ ñu ngă hmua mă yua boh thâo phrâo anun jing ba sĭ hơđong, rim thun sang anŏ ñu hơmâo rơbêh 500 klăk prăk.

“Yua hơmâo mơnuih ping gah, gong gai pơtô brơi, jak iâu pơplih djuai phun pla, pok anih pơtô brơi hơdră ngă hmua, mă yua măi mok, jing sang anŏ gơmơi pơplih ha bơnah đang kơphê jing pla phun kơbuă prang, pla bơnga amăng sang klim mơnil. Mơ̆ng anun, prui prăk lu ƀiă, lu hloh hơdôm wơ̆t pơhmu hăng hlâo adih. Ăt mơ̆ng anun mơn, pô kâo hăng neh met wa amăng plơi thâo hluh ngă bruă hiư̆m pă mơ̆ng ƀong, ba tơlơi bơwih ƀong jai hrơi đĭ tui”.

Tui hăng mơnuih ping gah Cil Pam Ka Duyên, jơnum amăng grup ping gah plơi Dạ Tro, kiăng mơnuih ƀôn sang kơnang, hla tui hăng pơplih tơlơi pơmin ngă hmua pla pơjing, plih djuai phun pla, ba djuai phun phrâo amăng bruă ngă hmua, pơđĭ tui prăk pơhrui jing rim čô mơnuih ping gah amăng grup khŏm jing mơnuih ba jơlan hlâo. Hơmâo mơnuih sit, bruă ngă sit kah bruă pôr pơthâo, iâu pơthưr ngă tui hơdôm tơlơi pơtrun mơ̆ng Ping gah, tơlơi phiăn mơ̆ng Kơnuk kơna mơ̆ng dưi klă, neh met wa mơ̆ng hla tui. Hơjăn pô ñu, Cil Pam Ka Duyên hơmâo ngă hơbô̆ bruă pla phun kơbuă prang kiăng neh met wa amăng plơi nao lăng, hrăm tui.

“Lơ̆m jing sa čô mơnuih ping gah, kâo dưi hơduah ĕp rơđah hloh kơ jơlan hơdră ngă bruă, tơlơi pơtrun mơ̆ng Ping gah, tơlơi phiăn mơ̆ng Kơnuk kơna. Mơ̆ng anun, kâo dưi ngă klă bruă hơmâo Ping gah, gong gai jao. Ăt mơ̆ng anun mơn, kâo djru ba neh met wa lu hloh. Tŏng ten ñu, iâu pơthưr neh met wa plih djuai phun pla, gir pla phun ƀiă hrơi dong kiăng pơđĭ kyar bơwih ƀong huă mơ̆ng sang anŏ. Ră anai, tơlơi hơdip mơ̆ng neh met wa djuai ƀiă pơ anai plai laih tơnap tap”.

Ƀu kơnong amăng plơi Dạ Tro đôč ôh, lu mơnuih ping gah pơkŏn pơ hơdôm boh plơi pla mơ̆ng să Dạ Nhim ăt thâo hluh mơn tơlơi gơgrong bruă mơ̆ng ƀing gơñu amăng bruă nao hlâo ngă djŏp bruă. Amăng anun ta khŏm lăi nao bruă pơplih djuai phun pla, djru nao rai pơkra gơnam, djru hrơi mă bruă, djuai phun pla, boh thâo ngă hmua ...Yua hnun mơn, bruă ngă hmua mơ̆ng Dạ Nhim hơmâo pla lu djuai phun, ƀơ ƀrư̆ ngă hmua tui tơlơi rơkâo blơi mơ̆ng anih sĭ mơdrô, pơđĭ tui nua gơnam tam. Mơ̆ng bruă pla kơnong phun kơphê đôč, truh ră anai Dạ Nhim hơmâo pla 16ha phun jrao Atisô, 6ha phun kơbuă prang, 40ha bơnga, 300 ha añăm pơtăm djŏp djuai hăng rơbêh 330ha phun boh troh. Tui hăng mơnuih ping gah Cil Pam Ka Phương, ping gah plơi Đarahoa, să Dạ Nhim, kiăng tŭ yua amăng bruă pôr pơhing, iâu pơthưr, bruă “mơnuih ping gah nao hlâo, plơi pla kiăo tlôn” kiăng hơmâo lăng yôm hăng pơtrut tui”.

“Ƀing gơmơi pôr pơthâo, iâu pơthưr kiăng hơdôm boh sang anŏ djuai ƀiă amăng plơi lăng ba pơđĭ kyar bơwih ƀong huă - mơnuih mơnam. Mơ̆ng hlâo neh met wa juăt pla kơnong kơ phun kơphê đôč, ră anai iâu pơthưr pơplih phun pla tui hăng tơlơi kiăng blơi kah hăng añăm hla rok, trong, rơtă djŏp djuai či pơđĭ kyar hloh”.

Hrŏm hăng pơđĭ kyar bơwih ƀong huă, tơlơi gơgrong bruă nao hlâo mơ̆ng rim čô mơnuih ping gah ăt hơmâo Ping gah să Dạ Nhim pok pơhai tŭ yua amăng lu bruă mă, amăng anun ta khŏm yap nao bruă gum hrŏm akŏ pơdong plơi pla phrâo, hrŏ trun ƀun rin kjăp, pơtrut tui khul gum pơgôp djuai ania, akŏ pơdong kơđi čar kjăp phik. Ơi Kon Sơ Ha Vương, Khua jơnum min djŏp djuai ania mơnuih mơnam să Dạ Nhim brơi thâo, sit tơlơi anai djru ba Dạ Nhim tañ lŏm lui rin rơpa, hrưn đĭ jing să plơi pla phrâo hăng glăk akŏ pơdong plơi pla phrâo tui hơnong pơkă phrâo hloh.

“Ngă tui tơlơi git gai mơ̆ng Ping gah, tơlơi phiăn mơ̆ng Kơnuk kơna, hrơi blan rơgao, Ping gah, gong gai hơmâo pơtô brơi neh met wa ngă klă jơlan hơdră akŏ pơdong plơi pla phrâo. Hăng hơdră ngă bruă kơnuk kơna hăng ană plơi gum ngă, lu ring bruă pơkra jơlan, tơdrông toa, man bơnư̆ ia hơmâo pơkra kjăp. Hrŏm hăng bơwih ƀong hơđong, tơlơi hơdip mơ̆ng neh met wa hăng pran jua mơnuih ƀôn sang hơmâo đĭ tui lu laih”.

Yua pơtrut tui tơlơi gơgrong bruă mơ̆ng mơnuih ping gah nao hlâo ngă gru, pơtô ba mơnuih ƀôn sang ngă tŭ yua djŏp bruă yua gong gai pơphun, bơwih ƀong huă - mơnuih mơnam mơ̆ng să Dạ Nhim, tơring glông Lạc Dương, tơring čar Lâm Đồng đĭ kyar na nao rim hrơi./.