Rơđah ñu lĕ, lơ 30/9, ơi Đinh Văn Thanh ƀơi tơring kual Đăk Pơ, lơm klơi dor atur sang lĕ ƀuh lu tơlang tơleh mơnuih, hăng sa dua mơta gơnam tam mă yua kah hăng get ia, ƀop, gai čih, đôl tơkhŏ kơ su hăng lu asar bôh phao. Ơi Thanh hmâo lăi pơthâo laih hăng anom gơgrong gah bruă anai. Hmư̆ hing tơlơi anai, Grŭp K52 tơring čar Gia Lai hmâo iâo pơhrui laih mơnuih apăn bruă tơhan, ling tơhan hrŏm hăng gơnam mă yua pok pơhai bruă hơduah ĕp lăng hăng tum pơƀut tơlang tơleh ƀơi kual anai.

Lơm dô̆ mă bruă, Grŭp K52 pơsit mrô tơlang tơleh anun hmâo năng ai ñu 32 čô mơnuih, hmâo dor ƀu dap tui akô̆ tlôn hăng đih bơrơkua nao rai. Ră anai Khul ling tơhan tơring čar Gia Lai hơduah ĕp lăng dong, bưp ƀing thâo kơ gru grua hmâo ha tal gum hrŏm bruă blah ƀơi Đăk Pơ pioh pơhrua nao hră pơ-ar. Hrŏm hăng anun, Grŭp K52 amra pok prong kual hyu hơduah ĕp hăng pơphun pơblang tŏng ten rim tal lŏn kiăng pơsit djơ̆ rim tơlang tơleh mơnuih./.