Khua git gai Ping gah, Khua mir sir dêh čar ta ơi Tô Lâm pơsit yôm hơdôm tơlơi gum hơgôp mơ̆ng Khua ƀôn prong Edouard Philippe pioh kơ tơlơi rô nao rai giăng mah mơ̆ng hlâo hăng gum hrŏm lu mơta kơplah wah Việt Nam – Prang; mơ-ak ƀơi anăp hơdôm tơlơi pơđĭ kyar mơ̆ng tơlơi gum hrŏm kơplah ƀôn prong Le Havre hăng Đà Nẵng, djru kơtưn pok prong gum hrŏm hăng hơdôm anih anom amăng dêh čar Việt Nam amăng hơdôm bruă kah hăng pơđĭ kyar tơdrun tum păn ia rơsĭ, logistics hăng dŭ pơgiăng gơnam jơlan ia rơsĭ, pơgang ia rơsĭ, hơdră mă yua măi mok gah ia rơsĭ...

Khua ƀôn prong Le Havre bâo glăi hơdôm tơlơi djă pioh klă hiam hăng lăp djă pioh na nao gah rơnoh pơđĭ kyar tañ mơ̆ng Việt Nam; čang rơmang pơtrut gum hrŏm kơplah wah ƀon prong Le Havre hăng hơdôm tơring čar, ƀôn prong gah dêh čar Việt Nam amăng bruă pơtô pơhrăm, pơhrăm brơi dong mơnuih mă bruă kơjăp. Pơsur anom bơwih ƀong dêh čar Prang pơtrut kơtang tuh pơplai ƀơi Việt Nam, biă ñu amăng hơdôm bruă gal hloh mơ̆ng ƀôn prong./.