Tơdơi kơ 10 thun ngă tui Hră pơčrâo mrô 05 mơ̆ng Ding jum kơđi čar, djop gưl anom bruă tơhan hơđăp hơmâo pok pơhai lu bruă mă, hơbô̆ bruă tŭ yua kah hăng “Tơhan hơđăp djru nao rai pơđĭ kyar bơwih ƀong huă”, “5+1”, 2 lŏm lui, 3 djru ba, VAC, VACR, ngă hmua đang, anih čem rông hlô mơnong, ngă hmua blôk prong….

Mơ̆ng anun, djru kơ lu ding kơna amăng khul pơklaih mơ̆ng ư̆ rơpa, hơđong tơlơi hơdip mơda. Mơ̆ng thun 2016, truh ră anai, djop gưl tơhan hơđăp hơmâo man pơdong 23.000 boh sang djru ƀing gơ̆p tơhan hơđăp tơnap tap ƀun rin, djru lŏm lui rơbêh 43.000 boh sang tơ̆i kơ ding kơna amăng khul; lu ding kơna dŏ pơyơr lŏn sang đang hmua hơdôm klăk m2 lŏn pioh čuk jơlan plơi pla. Ƀrô djơ̆ tal anai, lu mơnuih dưi tŭ mă hră bơni yua kơ bruă ngă hiam tŭ yua hloh amăng tal hrăm hăng hla tui Wa.