Tlam lơ 24/5, ƀơi Ƀirô Kơnuk kơna, Khul črâo ba bruă brơi ƀing mơnă tơbiă sang krư̆ hlâo thun pơkă hơmâo sem lăng, tŭ yap anăn ƀing mơnă rơkâo Khua mir sir brơi tơbiă hlâo thun pơkă hăng ƀing mơnă hơmâo djop tơlơi gal brơi tơbiă sang krư̆ ƀrô tal hơdor glăi 51 thun pơklaih rơngai kual Dơnung, pơlir hơbit lŏn ia ta (30/4/2026), mơ-ak hăng tơlơi truh kih mơng Jơnum khua mua đơ đam dêh čar tal XIV mơng Ping gah, tal ruah Khua pơ ala mơnuih ƀon sang dêh čar tal XVI hăng ruah khua mua Jơnum min pơ ala mơnuih ƀôn sang djop gưl, rơwang thun 2026-2031. Đĭ pơhiăp amăng mông jơnum, kơ-iăng Khua dêh čar ơi Phạm Gia Túc lăi rơđah, djru khăp pap hăng lŏm hĭ tơlơi soh hăng ƀing mơnă lĕ gru grua hiam klă mơng djuai ania ta. Khul črâo ba bruă brơi tơbiă sang krư̆ hlâo thun pơkă thun 2026 hơmâo sem lăng rơbêh 10.000 hră pơ-ar ƀing mơnă djop tơlơi gal brơi tơbiă sang krư̆ tañ ƀiă.

Kơ-iăng Khua dêh čar ơi Phạm Gia Túc rơkâo bruă sem lăng brơi kjăp phik, tơpă sit hăng djơ̆ tơlơi phiăn. Tui khul črâo ba, kiăng bruă brơi ƀing mơnă tơbiă sang krư̆ tañ ƀiă thun 2026 anai  pơhlôm brơi klă, djop gưl, djop gơnong bruă, gong gai ƀon lan kiăng đing nao pơhlôm tañ mut hrŏm amăng tơlơi hơdip mơnuih mơnam ƀơi ƀon lan brơi ƀing mơnă, đing nao pơtrut kơtang pơtô pơblang, hrưn đĭ amăng tơlơi pơmĭn hăng tơlơi glăm ba mơng djop gưl Ping gah, gong gai ƀon lan, hơdôm grup kơđi čar-mơnuih mơnam, khul grup hăng abih bang mơnuih ƀôn sang, anăm djik djak, gum tơngan hrŏm djru brơi ƀing gơñu huăi mlâo hăng dưi pơwot glăi hơdip tui hơđăp.