Tơring čar Dak Lak tơdơi kơ pơmut hăng Phú Yên hơmâo đơ đam prong rơhaih truh 18.000 km2, mrô mơnuih ƀôn sang rơbêh 3,34 klăk čô, pok jơlan hơdră pơđĭ kyar phrâo hăng tơlơi gơgrong pơtruh nao rai kual Dap Kơdư hăng kual ter hang ia rơsĭ Dơnung tong krah. Bruă pơkă hnơ̆ng tơring čar Dak Lak mơ̆ng thun 2021-2030, lăng nao truh thun 2050 dưi pơtong glăi anih anom, lŏn mơnai bơwih ƀong huă, kơđi čar ƀơi tơring čar; laih dơ̆ng mă yua tŭ yua anŏ gêh găl pơlir nao rai lu kual, mut phung jar kmar. Hơdôm tơhnal pơkă bruă ngă hrŏm pơđĭ kyar brơi jŭ yap glăi abih bang, djơ̆ rơ-ua plah wah hơdôm anom bruă, sang bruă, bruă mă hăng plơi pla, kiăng djơ̆ găl hăng anŏ hơmâo sit nik, anăp nao pơđĭ kyar rơnoh pơhrui glăi mơ̆ng 11-11,5% mơ̆ng thun 2026-2030.

Tui hăng nai tha prin, nai prin tha ơi Lê Xuân Bá, khua hơđăp sang bruă kơsem min bơwih ƀong huă dêh čar, pơđĭ kyar tuh tia pơkra ming kiăng sem lăng đing nao hlâo anŏ hơgĕt, lơ̆m čih ming pơkra glăi ƀơi tơring čar.

“Pơkă hnơ̆ng anŏ pơđĭ kyar bruă tuh tia pơkra ming tơring čar Dak Lak aka ƀu đing nao djơ̆ hơdră ôh. Ta dưi lăi thun blan laih rơgao hăng 2-3 thun pơ anăp adih, Dak Lak tơnap biă mă pơđĭ kyar tuh tia pơkra ming djơ̆ tui anŏ kiăng, anai lĕ ƀuh sit nik, samơ̆ anai lĕ pơkă hnơ̆ng mơ̆ng črăn 2021-2030 hăng lăng nao pơ anăp adih truh thun 2050, Dak Lak khom pơkă tơhnal pơđĭ kyar tuh tia pơkra ming. Yua kiăng pơdrong lĕ khom pơkă hnơ̆ng pơđĭ kyar tuh tia pơkra ming brơi djơ̆ găl man ƀrô”.

Pơgôp hiăp kơ bruă pơkă hnơ̆ng Dak Lak, lu mơnuih rơgơi kơhnâo, ƀing khua mua git gai wai lăng hăng sang bruă mơdrô lăi lĕ, pơkă hnơ̆ng ngă pơrơđah hloh bruă lir hơbit anih anom pok pơhư prong, jơlan glông nao rai hăng anŏ pơtrut pơđĭ kyar plah wah kual Dap Kơdư hăng kual ter hang ia rơsĭ Dơnung tong krah. Laih dơ̆ng pơđĭ tui bruă pơtruh nao rai kơnang kơ hơmâo jơlan glông phun, logistics, tơdrun kompan, amăng jang guai dêh čar hăng tuai čuă ngui lir hơbit hăng bruă djă pioh gru grua amăng tơring čar.

Kơ-iăng nai tha prin, nai prin tha Nguyễn Thị Phương Trâm, Khua anom bruă kơsem min Gru grua Việt Nam, rơkâo kơ tơring čar Dak Lak khom man pơdong bruă mă phun, pơđĭ kyar bruă tuai čuă ngui kơnang kơ bruă djă pioh gru grua hiam đưm hăng rơnoh yom hơmâo ƀơi tơring čar.

“Amăng bruă pơkă hnơ̆ng hăng ming pơkra glăi, ƀing ta kiăng đing nao hloh anih djă pioh gru grua hiam djop djuai ania. Anai yơh anŏ pơsit yom, ngă anŏ pơkă rơnoh gru grua hiam tơring čar Dak Lak lăi pha hăng kual Dap Kơdư lăi hrŏm. Rim kơ rơnoh yom gru grua djuai ania lêng kơ kiăng hơmâo anih pioh lui ngui ngor prong kiăng hơmâo anih pơphun bruă mă tơlơi hơdip mơda, rông ba anih hơdip jum dar kơ gru grua anun, hnun kah pơđĭ kyar hăng pơgang pioh”.

Tŭ mă tơlơi pơgôp hiăp tơpă, hơmâo rơnoh yom mơ̆ng ƀing mơnuih rơgơi kơhnâo, ƀing khua mua git gai wai lăng, sang bruă mơdrô ƀơi mông jơnum, khua mua tơring čar Dak Lak brơi thâo, amra jŭ yap glăi, pơtong rơđah abih bang tơlơi gêh găl, kông ngăn, lŏn mơnai glai klô ăt kah hăng hơdôm tơlơi dŏ kơƀah pioh pơsir abih anăp nao pơđĭ kyar djơ̆ găl hăng rơnuk phrâo hăng mut phung. Dak Lak pơtong rơđah bruă čih ming pơkra glăi bruă pơkă hnơ̆ng amăng tơring čar, ngă tui tong ten, sa hnơ̆ng, pơgang đut tơhnal lŏn mơnai, kiăng pơhlom rơnoh pơhrui pơđĭ kyar lăp djơ̆, kơtưn lir hơbit amăng kual  hăng mă yua tŭ yua anŏ pơđĭ kyar mơ̆ng djop mơta.

Tui hăng ơi Đỗ Hữu Huy, Khua Jơnum min mơnuih ƀôn sang tơring čar Dak Lak, bruă pơkă hnơ̆ng yua lŏn amra tañ mơ̆n pơdah thâo hăng khul pơ ala mơnuih ƀôn sang tơring čar sem glăi, pơsit hĭ amăng hrơi blan pơ anăp.

“Jơnum min mơnuih ƀôn sang tơring čar rơkâo djop gơnong bruă, să, plơi pla, sang bruă pơdjơ̆ nao hăng sang bruă ngă hrŏm djru pơtô ba, pơtum mơnuih mă bruă, čih pioh djop tơlơi pơgôp mơ̆ng ƀing mut jơnum kiăng ngă hră pơar djơ̆ hơdră tŭ yua. Laih dơ̆ng, tơring čar ăt čang rơmang tŭ mă lu tơlơi pơgôp hiăp mơ̆ng ƀing mơnuih rơgơi kơhnâo, ƀing nai tha prin kơsem min boh thâo ia rơgơi hăng ƀing khua mua hơđăp djop rơnuk, djru pơgôp hiăp brơi thun blan pơ anăp”.