Đại tá Trần Văn Quyển, Khua tơhan lữ đoàn mrô 146 brơi thâo: Lơ 8/5/1978 lĕ hrơi hơđŏm glăi gru grua yôm phăn, pok rai jơlan yak nao phrâo mơng sa grup tơhan mă anăn hing ang: pơjing tơhan wai pơgang amăng bul pơtâo, tañ ngă hơđong grup tơhan, pơsir hĭ hơdôm tơlơi dŏ kơƀah hơdôm hrơi blung a, ƀơƀrư̆ pơjing grup mă bruă kjăp, pơphun pơtop hrăm, pơjing hơdôm jơlan hơdră blah ngă wai pơgang bul pơtâo. Găn rơgao 48 thun, tơhan Lữ đoàn mrô 146 jing tơhan phun amăng bruă wai lăng, pơgang bul pơtâo Trường Sa. Yap kơnong amăng 10 thun rơgao, grup tơhan tañ ĕp ƀuh rơbêh 5 rơbâo wŏt bruă phara hăng rơngĭt adai, amăng ia rơsĭ; hmao tlôn pơphô bruă, pơsir hĭ tŭ yua hơdôm bruă anun, huăi ngă sư̆ rơbư̆, ƀu hmao thâo; pok pơhai giăm 150 wŏt hyu mă mơnuih, djru brơi mơnuih bưp tơlơi truh sat, pơjrao brơi giăm 1.500 wŏt mơnuih hyu mă akan hơdang; hơmâo hơdui glăi pơ hang 60 wŏt boh ƀattô hyu mă akan hơdang.

Tui Đại tá Trần Văn Quyển, ră anai, ƀơi anăp kơ bruă jao wai pơgang rơnuk rơnua kual ia rơsĭ amăng rơnuk phrâo, tơhan Lữ đoàn mrô 146 ƀu pơdơi hrưn đĭ klă amăng bruă pơtop hrăm, kjăp pran prap blah ngă, pơjing tơhan lữ đoàn kjăp amăng djop mơta.

“Tơhan lữ đoàn lêng kơ hruă kjăp jơlan gah pơtop hrăm tui tơđar, sit nik, kjăp phik; pơtop hrăm giăm hăng bruă jao sit nik, giăm anih gum hrŏm ngă bruă, giăm kual bul pơtâo. Laih dong tŏ tui pơhlôm djop tơhan, ƀattô dŏ gak prap blah ngă, hrưn đĭ kjăp amăng pơsir hĭ djop mơta bruă, anăm brơi sư̆ rơbư̆, ƀu hmao thâo”.

Ƀu djơ̆ kơnong đing nao hrưn đĭ klă amăng pơtop hrăm, prap blah ngă, tơhan lữ đoàn mrô 146 ăt đing nao pơjing pran kjăp bruă kơđi čar, pran kơtang brơi ling tơhan kual bul pơtâo. Dŏ amăng kual angĭn kơtang pơ-iă hang, ataih mơng hang, dong ƀơi anăp lu tơlơi tơnap tap, tơlơi lông lăng, bruă pơtô pơjuăt bruă kơđi čar, tơlơi pơmĭn lêng kơ hơmâo gưl Ping gah, khua mua djop gưl pok pơhai na nao, tŭ yua, djru brơi ƀing apăn bruă, ling tơhan jai hơđong ngă bruă. Đại tá Phạm Văn Thọ, khua tơhan Lữ đoàn mrô 146, kual 4 tơhan sơlup lăi pơtong:

“Ƀing gơmơi hơmâo pok pơhai ha amăng plĕ lu hơdră bruă, amăng anun đing nao biă mă kơ bruă pơtô hrăm gru grua kiăng pơsur pran jua rĭm čô mơnuih apăn bruă, ling tơhan pơ-ư ang kơ gru grua tơhan Trường Sa sông kơtang. Mơng anun ngă ƀing apăn bruă, ling tơhan kjăp bruă kơđi čar, kjăp amăng tơlơi pơmĭn; tŏ tui gru hơdip hiam mơng ling tơhan rơnuk wa Hô-tơhan sơlup; amra nao blah ngă, tuh rơyuh pran jua wai pơgang kjăp bul pơtâo plao ia rơsĭ dêh čar ta mah hơmâo bruă hơget tŭ mơn”.

Tŏ tui gru grua mơng khul tơhan dua wŏt mă hră pơpŭ tơhan sông kơtang, hrơi anai, amăng hơdôm bul pơtâo dong amăng kual bul pơtâo Trường Sa, ƀing apăn bruă, ling tơhan Lữ đoàn mrô 146 ăt tơhrơi mlăm bak phao kơtuang wai pơgang bul pơtâo hing ang kơ lŏn ia ta. Mah anih mă bruă dŏ lu tơnap tap, samơ̆ rĭm čô ling tơhan Trường Sa lêng kơ pơsit tơlơi glăm ba, lăng bul pơtâo lĕ sang, kual ia rơsĭ lĕ plơi pla. Trung tá Trần Huy Phụng, khua tơhan ƀơi bul pơtâo Trường Sa pơsit tong:

“Ƀing apăn bruă, ling tơhan amăng bul pơtâo lêng kjăp pran ngă bruă kơđi čar, lêng kơ gir run abih pran. Mah hiưm pă tŭ mơn, mah pơsăn drơi jăn, ƀing gơmơi ăt gir run wai pơgang bul pơtâo plao ia rơsĭ hing ang kơ lŏn ia ta”.

Pran pơ-ư ang tŏ tui gru grua rơnuk ơi yă nao hlâo, djop rơnuk mơnuih apăn bruă, ling tơhan hlăk ai mơng tơhan Lữ đoàn mrô 146 ră anai glăk tŏ tui pơhrăm pô, tuh rơyuh pran jua, pơgôp pơjing khul tơhan kjăp amăng djop mơta, thâo ba gru. Trung tá Nguyễn Thành Vũ, mơnuih apăn bruă dŏ hlăk ai amăng khul tơhan Lữ đoàn mrô 146, kual 4 tơhan sơlup brơi thâo: Dưi mă bruă amăng khul tơhan dua wŏt tŭ mă hră pơpŭ tơhan sông kơtang lĕ tơlơi pơ-ư ang prong biă mă hăng rĭm čô mơnuih apăn bruă amăng khul tơhan Trường Sa:

“Kâo pơ-ư ang lĕ tơhan hlăk ai amăng khul tơhan Trường Sa sông kơtang. Kâo amra gir run găn rơgao tơnap tap pơgôp wai pơgang kjăp bul pơtâo plao ia rơsĭ hing ang kơ lŏn ia ta”.

Găn rơgao giăm 50 thun, mơng hơdôm hrơi blung a bưp lu tơnap tap, kơƀah djop mơta gơnam tam, djop rơnukl mơnuih apăn bruă, ling tơhan Lữ đoàn lêng kơ gir run abih pran jua wai pơgang kual ia rơsĭ, hăng tơlơi ƀuăn: “Pơsăn drơi ƀơi anai mơ̆ ƀu đuăi tơbiă mơng bul pơtâo; djai drơi mơ̆ ƀu brơi rơngiă bul pơtâo”. Găn rơgao rơbŭ kơthel na nao hăng djop tơlơi tơnap tap amăng kual ia rơsĭ, tong kran kual ia rơsĭ Trường Sa hrơi anai, ƀing ling tơhan sơlup ăt glăk tơhrơi mlăm wai pơgang kual ia rơsĭ lŏn ia hăng pran gir run, gơgrong hloh laih dong ƀu pơdơi tuh rơyuh pran jua. Mơng hơdôm kual ia rơsĭ anun, gru grua sông kơtang mơng tơhan Trường Sa ăt tŏ tui hăng hơdôm tơlơi dưi phrâo amăng bruă wai pơgang kual ia rơsĭ, bul pơtâo hing ang kơ lŏn ia ta./.