Jing puih tơhan, anom bruă dŏ ƀơi anih hơmâo 251 km jơlan guai dêh čar sô̆ hăng Lao laih anun Kur ƀơi kual Dap Kơdư, ră anai Binh đoàn 15 hơmâo rơbêh 15.000 čô mơnuih ngă kông ñơn, mơnuih mă bruă, lu biă mă ñu mơnuih djuai ƀiă. 5 thun rơgao, mah bưp lu tơlơi tơnap tap, samơ̆ Binh đoàn ăt pơhlôm djop prăk blan kơ ling tơhan hăng mơnuih mă bruă, mơnuih ngă kông ñơn lĕ sa blan 6 klăk 500 rơbâo prăk boh ƀiă ñu.

Rim thun, Binh đoàn pioh lui 30 klai prăk ngă tui hơdră djru pơgang tơlơi suaih pral, brơi hyu čuă lăng, hrăm bruă, djru hơdră man pơdong sang khăp pap “Bơbung sang pơđao mơnuih tơpuôl, tơlơi khăp gơ̆p ngă tơhan”. Phrâo anai hloh, pơhiăp ƀơi mông jơnum khua khul mut phung tal V, Thiếu tướng Hoàng Văn Sỹ, Kơ-iăng khua git gai ping gah anom bruă, Khua tơhan Binh đoàn 15 brơi thâo: Mơnuih mă bruă apah lĕ djuai ania Yuan hăng sang anŏ mơnuih ƀôn sang djuai ƀiă ngă adơi ayong djru nao rai ngă bruă, pơđĭ kyar bơwih ƀong huă, jĕ giăm ngui ngor gru grua hiam mơak. Rơnoh pơhrui mơ̆ng ƀing mă bruă lĕ djuai ƀiă đĭ tui hmar mơ̆n.