Jơnum min mơnuih ƀôn sang tơring čar Quảng Ngãi phrâo jơnum pơgôp hiăp kơ bruă man pơdong sang hră đôm lăm pơlir dua gưl ƀơi hơdôm să giăm guai dêh čar.

Giong nao ĕp lăng, Gơnong bruă Pơtô hăng Pơjuăt tơring čar Quảng Ngãi rơkâo Jơnum min mơnuih ƀôn sang tơring čar pơtrun ruah mă 4 boh să kah hăng Dục Nông, Mô Rai, Sa Loong, Rơkơi pioh tuh pơ alin man pơdong 4 boh sang hră.

Hơdôm kual anai tơlơi bơwih ƀong huă dŏ tơnap tap, biă mă ñu jơlan glông nao rai, anih dŏ plơi pla kual čư̆ siăng, tơnap tap, mơnuih ƀôn sang dŏ taih ha bit, lu kơ mơnuih ƀôn sang djuai ƀiă kah hăng djuai ania Hơdang, Bahnar, Jeh, Triêng. Tơring čar amra man pơdong 2 boh sang hră hăng ming pơkra glăi, pơhiam phrâo 2 boh sang hră. Rơnoh prăk tuh pơ alin 600 klai prăk. Thun 2025, tơring čar jao rơnoh prăk 117 klai pioh man pơdong. Ơi Nguyễn Hoàng Giang, Khua Jơnum min mơnuih ƀôn sang tơring čar Quảng Ngãi pơtrun hiăp djop sang bruă ƀơi tơring čar, anom bruă hơmâo jao ngă hrŏm, khom djru man pơdong hơdôm sang hră anai pơphun mơ̆ng lơ 15/11 pơ anăp, khom ngă giong amăng blan 7/2026.