Adai či tlam ƀơi guai dêh čar Ia Nan, tơring glông Đưk Kơ, tơring čar Gia Lai pơ-iă kơtang hăng anŏ h’uh hang truh 38 đô̆ C, pơ-iă pơ-iong hrup či dol pran jua mơtam. Rơdêh pơgiăng ia mơ̆ng kông ty sa ding kơna 72, Binh đoàn 15 hơmâo ba tơl plơi Đưk Hưng ƀơk ia brơi kơ ană plơi pla. Amai Siu H’Uk (H’ Uc) brơi thâo, abih bang ia bơmun, ia wơi amăng plơi thu abih ƀhiao laih, ană plơi pla ƀu hơmâo ia hơtŭk riă tơnă hơbai, ia mơñum ƀu hơmâo lơi aka ƀu lăi nao ôh ia či mơnơi hơgơi:

 “Kơƀah ia yua tơnap tap đơi,  ƀơi anŏ hơmâo prăk hai ăt ƀu hơmâo ia či blơi ôh. Bưng mơ̆n hơmâo ƀing tơhan kông ty 72, gah Binh đoàn 15 djru brơi ia kơ mơnuih ƀôn sang. Gơmơi mơak biă mă ƀuh tui anun”.

Dik dăk bơhơdui đing ƀôp ia mơ̆ng rơdêh pơgiăng ia hling nao amăng kơthung ƀudah tơnô sang anŏ, amai Lê Thị Thu Hà lăi, mơnuih ƀôn sang amăng plơi bơ lăi nao rai khom yua ia pơkrem biă mă mơtam yơh, laih anun kah pơpha nao rai djop sang anŏ hơmâo soh ia arăng djru:

 “Ƀing gơmơi pơkrem ia kiăng djop hơtŭk riă tơnă hơbai hơdôm hrơi pioh ƀong huă. Ia anai gơmơi pioh mơñum đôč. Ia rao čơlŭ mong ƀuông uă lĕ gơmơi djă pioh pruih kơ phun boh troh anăp sang, djă pioh brơi ană mơnŭ, ană (un) bui ƀrep. Pơkrem ia rim tơdjôh mơtam yơh”.

Trung tá Nguyễn Phi Vân Khua anom bruă kơđi čar Kông ty sa ding kơna 72, Binh đoàn 15 brơi thâo: Jing anom bruă gah ling tơhan ngă bruă bơwih ƀong huă dŏ amăng tơring čar, kông ty hơmâo hơdôm rơbâo čô mơnuih mă bruă apah ƀong prăk blan jing mơnuih ƀôn sang ƀơi să Ia Nan, tơring glông Đưk Kơ. Ƀơi anăp kơ tơlơi không phang pơ-iă kơtang ƀu hơmâo ia yua djơh hăng anai, khua mua amăng kông ty git gai ƀing ngă khua, ling tơhan rĭm hrơi khom ƀôp ia pơgiăng nao 3 boh rơdêh hăng sa boh rơdêh 24 met khô̆i ia, djru pơpha brơi kơ mơnuih ƀôn sang ia yua amăng hrơi mông tơnap tap anai:

 “Adai pơ-iă kơtang ngă tơnap djop mơta, wơ̆t hăng sang bruă hai hnun mơ̆n. Anom bruă gơmơi ăt ƀơi anŏ ñu kơƀah ia yua mơ̆n. Samơ̆ khua mua, ling tơhan, mơnuih mă bruă amăng kông ty ăt amra kah pơpha djru ba ia yua hin hon biă mă brơi kơ ană plơi pla yua hrŏm amăng kual ta dŏ hrŏm”.

Ơi Trần Xuân Nghiên-Khua jơnum min mơnuih ƀôn sang să Ia Nan, tơring glông Đưk Kơ, tơring čar Gia Lai brơi thâo: Plơi Đưk Hưng ataih hloh mơ̆ng să, anun yơh rim thun kơƀah ia yua na nao đôč sit truh bơyan phang. Lu thun hăng anai, kông ty sa ding kơna 72, Binh đoàn 15 djru brơi ia kơ mơnuih ƀôn sang abih ha blan sui hrơi biă mă. Tơlơi anai, jai ngă kjăp tui tơlơi khăp tong ten plah wah ană plơi hăng ling tơhan, djru pơgang rơnuk rơnua hơđong amăng kual giăm guai dêh čar či Đưk Kơ:

 “Gong gai kơnuk kơna să bơni biă mă bruă ngă hiam mơ̆ng kông ty 72 hyu pơpha ia yua brơi mơnuih ƀôn sang. Amăng 15 hrơi hăng anai laih, ia yua brơi kơ mơnuih ƀôn sang plơi Đưk Hưng dưi pơhlôm hơđong ia mơñum, mơnuih ƀôn sang plai ƀiă tơnap tap. Dưi hơmâo tơlơi djru djơh hăng anun mơ̆ng kông ty mơnuih ƀôn sang mơak biă mă, bơni mơ̆n tơlơi djru hrŏm mơ̆ng kông ty 72 yua kiăng pơgang ba klă tơlơi hơdip mơda mơnuih ƀôn sang”.

Ăt hrup anun mơ̆n, ƀơi tơring glông Ea Sup, tơring čar Dak Lak adai pơ-iă kơtang biă mă sui hrơi ngă kơ lu anih mơnuih ƀôn sang kơƀah ia yua. Tơhan ƀô̆ đô̆i hăng tơhan kông an tơring čar, tơring glông ăt pơgiăng hyu ia pơpha brơi kơ mơnuih ƀôn sang kiăng hơđong tơlơi hơdip mơda. Krah yang hrơi dong adai pơ-iă hang truh 40 đô̆ C, yă Vy Thị Mun dŏ ƀơi plơi 12 ( thôn 12), să Ea Rvê, tơring glông Ea Sup hok mơak yua hơmâo ia ñu pioh amăng kơthung tơnô 500 lit hăng 1000 lit amăng sang anŏ, ƀôp mă ia mơ̆ng kông an hăng tơhan blah ngă djru brơi buă kơthung:

 “Rim thun lĕ djop mơ̆n ia mơñum, ia pruih kơ phun pla samơ̆ thun anai ia thu abih ƀhiao mơ̆ng akŏ thun mơtam. Bơni kơ ƀing adơi ayong ling tơhan lu biă mă, hơmâo ba rai pơpha ia yua kơ mơnuih ƀôn sang djơh hăng anai mơak biă mă yơh”.

 Ăt dưi hơmâo ƀing ling tơhan blah ngă hăng tơhan kông an djru brơi ia hmao kru, ơi Lò Văn Kiều, dŏ ƀơi plơi 12, să Ea Rvê, tơring glông Ea Sup, tơring čar Dak Lak hok mơak lăi:

  “Dua blan hlâo kơ anai yua hơmâo ia wơi ƀơi sang ieo gah yua hrŏm ră anai ăt thun laih. Ha wơ̆t arăng rai djru, pioh yua amăng 4-5 hrơi, pơkrem biă mă. Gong gai kơnuk kơna amăng plơi pla hăng ƀing tơhan blah ngă, tơhan kông an djru brơi ia yua ră anai huăi kơƀah lơi jăng jai”.

Thiếu tá Đoàn Huy Tưởng, Khua kông an să Rvê, tơring glông Ea Sup, tơring čar Dak Lak brơi thâo, hơdôm hrơi hăng anai, djop plơi pla amra čih anăn sang anŏ ƀu hơmâo ia yua. Giong anun, kông an să čih anăn dăp hơdră ngă hrŏm anom bruă tơhan 737 kual 5 dŏ bơwih ƀong huă pơ anai, pơblih nao rai djru ba ia yua kơ ană plơi pla tơl sang anŏ. Lơ̆m anun, kông an să Ea Rvê lĕ kông an tơring glông Ea Sup jao brơi dua boh rơdêh, bơ anom bruă bơwih ƀong huă mơ̆ng tơhan 737 lĕ hơmâo 3 boh rơdêh pơgiăng ia nao djru brơi kơ ană plơi pla.

 “Sa wơ̆t hyu ƀơk brơi ia lĕ sa boh sang anŏ mơ̆ng 1-3 met khô̆i ia. Jai hrơi adai pơ-iă kơtang phang khôt kơƀah ia lu biă mă. Bruă djru ba ia yua kah hăng anai lĕ hơmâo dăp hơdră, akŏ bruă djru ba ană plơi pla yua kông an tơring glông pô pơtrun amăng anun ba ia yua kơ sang anŏ mơnuih ƀôn sang kơƀah ia mơñum”.