Anom lăng tui, git gai plơi prong phrâo tơring čar Dak Lak (iâo klah čun lĕ Dak Lak IOC) mă yua mơ̆ng blan 9/2021. Tơdơi kơ 2 thun mă yua, anăn mă yua Dak Lak mơ̆ng ataih hmâo giăm truh 30.000 wot čô tŭ mă hăng dưm amăng măi. Plăng pơhing http://tuongtaccongdan.daklak.gov.vn/ lăi pơdah bôh tơhnal pơsir hmâo čơkă mă laih tơlơi lăng ba mơ̆ng lu mơnuih ƀôn sang. Amai Trần Lệ, ƀơi phường Thắng Lợi, plơi prong Buôn Ma Thuột pơsit:

  “Anăn mă yua anai dưm amăng măi amuñ biă, lơm mut ƀơi anăn amuñ lăng biă. Hmâo lu anô̆ gal klă. Bơhmutu ñu kah hăng mamera lăng mơ̆ng ataih. Ră anai hmâo lu mơnuih bưp tơnap lơm pô nao ngă hơdôm mơta hră pơ-ar, gơnang kơ hmâo anăn mă yua anai, pô amra ba hră pơ-ar nao hăng hơdôm bôh anom mă bruă lăng nao rai mơ̆ng ataih, gơñu amra čơkă mă hră pơ-ar hăng pơsir, laih anun pô thâo rơnoh pơsir hră pơ-ar hiưm hơpă. Mơnuih ƀôn sang pơmut ñu amăng măi ƀuh ñu ba glăi lu bôh tŭ yua amra dưi lăng hơdôm bruă mă mơ̆ng hơdôm ƀirô".

Ơi Võ Nguyễn Hoàng Nam, Kơ-iăng Khua gơgrong bruă Anom IOC tơring čar Dak Lak brơi thâo, truh ră anai, anom hmâo ngă giong laih hăng mă yua rơbêh kơ 450 mơta camera phrâo ƀơi lu anih amăng plơi prong Buôn Ma Thuột hăng sa dua bôh tơring glông, plơi prong amăng tơring čar. Tơlơi pơhing pơhrui hmâo tui hơdôm camera hmâo tô nao rai mrô kơ anom lăng tui, git gai plơi prong rơnuk phrâo mơ̆ng tơring čar. Hrŏm hăng anun, hơdră phrâo bôh thâo pơčeh phrâo hmâo pơƀut glăi amăng anăn mă yua mrô 1022 hăng 10 mơta bruă bơwih brơi phun. Hơdôm bruă bơwih brơi anai yak blung a hmâo ngă tui laih bruă mă lĕ anăn phun mă yua kơ pơjing plơi prong rơnuk phrâo. Ơi Võ Nguyễn Hoàng Nam brơi thâo:

“Bruă bơwih kơ plơi prong lĕ jơlan kơtuai nao rai kơplah wah gong gai hăng mơnuih ƀôn sang, kiăng ngă hiưm hơpă mơnuih ƀôn sang hmâo jơlan kơtuai sit anai hăng gong gai amăng anun amra đing nao lăi glăi hơdôm tơlơi rơkâo đĭ mơ̆ng mơnuih ƀôn sang, hơdôm tơlơi mơnuih ƀôn sang akă ƀu rơđah lăi nao kơ pơhlôm hơđong, pơhlôm rơnuk rơnua ƀơi jơlan nao rai, anih anom dô̆ kơ abih bang hơdôm tơlơi hmâo jum dar mơ̆ hmâo hơdôm tơlơi akă djơ̆ tui tơlơi pơkă lĕ amra dưi hmâo mơnuih ƀôn sang lăi nao kơ anom IOC”.

Anom anai jai hrơi tŭ mă lu tơlơi lăi glăi mơ̆ng mơnuih ƀôn sang ƀơi hơdôm anih anom mơ-ĭt glăi. Hluai tui anun, khua mua hơdôm bôh anom hmâo hmư̆ tơlơi gum pơhiăp mơ̆ng mơnuih ƀôn sang, anom bơwih ƀong, dưi lăng tui bruă mă hăng lơm pơsir, pơtrut, pơtă hơdôm črăn bruă. Ơi Trần Xuân Tiệp, Kơ-iăng Khua Anom bruă Jơnum min mơnuih ƀôn sang tơring glông Čư̆ Mgar, brơi thâo:

  “Bruă kơtuai nao rai kơplah wah plơi pla hăng anom bruă pôr pơhing hmâo ngă tui laih bôh tŭ yua ñu. Sa dua tơlơi lăi đĭ mơ̆ng mơnuih ƀôn sang dưi hmâo IOC brơi glăi kơ plơi pla hăng lăi pơthâo plơi pla anun pơsir hmao tlôn”.

   Tui hăng ơi Trương Hoài Anh, Khua Gơnong bruă tơlơi pơhing – pôr pơhing tơring čar Dak Lak, Anom lăng tui hăng git gai plơi prong rơnuk phrâo tơring čar Dak Lak hmâo djru laih bruă git gai hăng pơsir bruă mă mơ̆ng hơdôm bôh ƀirô apăn bruă pơphun rơđah đông, tañ, ba glăi bôh tơhnal. Hrŏm hăng anun lĕ glông tô nao rai hluai tui kơtuai 2 bơnah lơm mơnuih ƀôn sang dưi mơ-ĭt tơlơi gum pơhiăp, lăi pơthâo ƀudah lăi đĭ kơ hơdôm bôh ƀirô apăn bruă Kơnuk kơna kơ hơdôm tơlơi truh, tơlơi bơdjơ̆ nao hơđong plơi prong, jơlan nao rai, tơlơi rơnuk rơnua, măi mok mă yua mơ̆ng tơring čar. Kiăng ngă giong bruă djă pioh mrô amăng măi mok ƀơi anom, ơi Trương Hoài Anh brơi thâo:

“Pơtrut pơsur hơdôm plơi pla hmâo tơlơi gal amra amăng ƀrư̆ tuh pơplai kiăng hmâo Anom IOC mơ̆ng pô mut nao hrŏm hăng IOC mơng tơring čar pioh ngă hiưm hơpă djơ̆ tui tơlơi rơkâo bruă git gai črâo ba ăt kah hăng tơlơi gum hrŏm wai lăng kơnuk kơna mơ̆ng mơnuih ƀôn sang hăng anom bơwih ƀong amăng tơring čar”./.