Amăng 9 thun rơgao, rim blan, ayong Nguyễn Văn Tiến, mơnuih mă bruă ƀơi Anom bruă Ping gah să Buôn Tría, tơring glông Lak, tơring čar Dak Lak leng kơ gơgrong hlâo mă yua 10 rơbâo prăk pioh pơčruh hrŏm “Keh prăk pơkrem ngă tui tơlơi Wa” mơ̆ng ƀirô. Ñu lăi pơthâo: mrô prăk pơčruh hrŏm ƀu lu, hơdră ngă ƀu prong samơ̆ hmâo ba glăi laih hơdôm bôh tơhnal sit nik.

 “Kâo ƀuh bruă Keh prăk pơkrem ngă tui Wa anai hmâo tơhnal klă biă, anun dưi hmâo abih bang mơnuih ping gah amăng khul Ping gah ăt kah hăng mơnuih hlăk ai ƀơi hơdôm bôh plơi pla hur har pran jua anăp nao. Kah hăng ping gah hlăk ai ƀing gơmơi rim blan hmâo gum pơčruh 10 rơbâo prăk”.

Keh prăk pơkrem ngă tui Wa lĕ bôh than bruă bơkơtưn “Pơkrem ngă tui tơlơi Wa” dưi hmâo Grŭp apăn bruă Ping gah tơring glông Lak djă pioh amăng lu thun rơgao pioh djru hơdôm mơnuih tơnap tap. Kiăo tui anun, rim mơnuih apăn bruă, mơnuih ping gah, hlăk ai, mơnuih mă bruă čar, mơnuih mă bruă amăng đơ đam tơring glông rim 3 hrơi pơkrem hmâo ƀiă mă ñu 1.000 prăk; mơnuih amăng khul hlăk ai, mơnuih ƀơi anom bruă 10 hrơi pơkrem ƀiă biă mă ñu 1.000 prăk. Keh prăk anai yua kơ Grŭp pơtô bruă Ping gah tơring glông wai lăng. Yă Đào Thị Thanh An, Kơ-iăng Khua git gai Ping gah tơring glông Lak brơi thâo, hăng hơdră ngă anai amăng 9 thun rơgao đơ đam tơring glông hmâo gum pơčruh laih giăm truh 3 klai prăk, djru hơdôm rơtuh čô mơnuih tơnap lĕ sang anô̆ gah hơdră bruă, mơnuih ping gah, mơnuih ƀu hmâo anih gơnang, hmâo tơlơi ruă tơnap pơjrao.

 “Ba jơlan hơdră anai jai hrơi jai lar hyu hăng ba glăi nua yôm sit nik pioh pơdah tơhnal klă hiam mơ̆ng ană mơnuih, djru ngă lar hyu tơlơi kiăng khăp truh plơi pla mơnuih mơnam ăt kah hăng jai hrơi jai lăi pơthâo hơdôm tơlơi tơnap truh hăng hơdôm mơnuih hmâo tơlơi hơdip kơƀah tơnap, ƀu hmâo anih gơnang, hmâo hơdôm tơlơi ruă tơnap pơjrao kiăng gơñu hmâo dong pran hrưm đĭ, hmâo tơlơi mơ-ak amăng tơlơi hơdip mơda”.

Hrŏm hăng tơring glông Lak, hơdră “Pơkem prăk ngă tui tơlơi Wa” hmâo pơhư prong, djă pioh bôh tơhnal ƀơi lu anih anom kah hăng: Čư̆ Mgar, Čư̆ Kuiñ, Krông Ana, Krông Bông, Krông Ƀuk, Krông Pač hăng Mdrak tơring čar Dak Lak. Amăng 2 thun rơgao, hơdră anai hmâo pơkrem rơbêh kơ 10 klai prăk, mơ̆ng anun djru pơdŏng 89 bôh sang dô̆, 2 bôh anih dô̆ kơ nai pơtô čơđai, ƀơk hơdôm rơtuh anung gơnam kơ hơdôm bôh sang anô̆ gah hơdră bruă, mơnuih djru ngă hơkrŭ đưm.

Sa dua anih anom hmâo hơdră pok pơhai laih pơkrem pơčeh phrâo, iâo pơhrui hmâo tơlơi gum hrŏm mơ̆ng lu mơnuih apăn bruă, mơnuih ping gah hăng mơnuih ƀôn sang. Rơđah biă ñu kah hăng hơdôm hơdră “Ngă tui pơkrem djru mơnuih ping gah tơnap tap” mơ̆ng Ping gah plơi prong Buôn Ma Thuột; “Pơdŏng ring bruă sang juă glai kơ sang hră” mơ̆ng tơring glông Čư̆ Mgar, "Hră pơkrem prăk Búa Liêm Vàng" mơ̆ng Ping gah plơi prong Buôn Hồ... Ơi Phạm Minh Tấn, Kơ-iăng Khua git gai Ping gah tơring čar Dak Lak pơsit: Anai lĕ hơdôm bruă mă rơđah, sit nik hăng ba glăi bôh tơhnal amăng bruă "Ngă tui Wa, ngă tui pơkrem" mơ̆ng plơi pla.

“Hrăm hăng ngă tui tơlơi pơmin, kơnuih pran jua Hồ Chí Minh lĕ sa bruă mă na nao. Hăng Ping gah tơring čar hmâo črâo ba rơđah laih mơ̆ng anom bruă ping gah, mơ̆ng rim mơnuih ping gah khom ba bruă hrăm, ngă tui tơlơi pơmin, pran jua, kơnuih mơ̆ng Wa jing laih bruă ngă na nao hăng ba mut hơdôm bruă jơnum rim tal, rim blan pioh djop mơnuih thâo rơđah hăng ngă tui pioh ngă hiưm hơpă jing sa bruă mă gơgrong pô hăng hmâo tơhnal sit nik, yap wot bruă anet ƀudah hơdôm bruă prong prin hai, amăng tơlơi pioh djru nao rai tơdruă gum hrŏm hrŏ trun rin rơpa, pơdŏng plơi pla phrâo, ngă giong hơdôm bruă hmâo jao”.

Ƀu kơnong kơ bruă “Pơkrem ngă tui tơlơi Wa” hmâo jing laih sa bruă mă na nao dưi hmâo rim mơnuih apăn bruă, mơnuih ping gah hăng mơnuih ƀôn sang ƀơi Dak Lak ngă tui pô. Hơdră ngă ƀu prong samơ̆ hmâo nua yôm hăng tơlơi lar hyu prong biă, ba truh tơlơi mơ-ak kơ lu mơnuih ƀun rin mơ̆ng hơdôm bôh sang klă hiam, ƀudah tơlơi djru gum hmao tlôn lơm tơnap kơƀah. Bruă ngă anai hmâo ngă tui phiăn juăt “gum nao rai tơdruă” klă hiam mơ̆ng djuai ania, jing hơdră ngă sit nik hloh pioh hrăm hăng ngă tui pran jua Hồ Chí Minh./.