Trung tá, Vương Văn Khoa, Khua kông an să Dak Som, tơring glông Dak Glong, brơi thâo, hơmâo tơlơi djru mơ̆ng lu mơnuih tơpuôl, să dưm truă 11 boh kamera lăng sŭ pơgang rơnuk rơnua amăng să, djop jơlan tơkuh nao rai, tơdrun trun ia, tuai đĭ song hyu ngui pơ Tà Đùng. Kamera dưm pơtruh brơi pơ să, kông an să lăng sŭ mơ̆ng ataih, jơmin mơnuih ƀôn sang să, ƀing kông an amăng plơi djru krăo lăng hrom soh, pơgang rơnuk rơnua plơi pla. Kamera hơmâo djru hiam klă amăng bruă pơhlôm, pơgang tơlơi soh sat, pơhlôm hơđong mơnuih mơnam amăng să.

Laih anun mơ̆ng rup ĕp lăng kamera čơphil glăi, hrip pioh, tơhan kông să ngă hrom hơduah ĕp ơi tha 73 thun dŏ pơ să Quảng Khê, gơ̆ rơngiă tơlơi pơmin, ƀu thâo hơdor jơlan ôh, đuăi hyu prah prang, arăng hơmâo ƀă ba glăi pơ sang anŏ rơnuk rơnua. Ƀuh rơđah rup kamera hrip pioh hrơi mông tong ten, kông an să Dak Som ăt pok pơhư prong dưm truă kamera pơgang rơnuk rơnua truh pơ djop plơi pla ala ƀôn.

“Lơ̆m kông an să pok pơhai dưm truă kamera lĕ djop tơlơi hơmâo amăng să ƀuh mơtam yua kơ anun tơlơi soh hrŏ ƀiă laih. Ăt mơ̆ng rup kamera anai mơ̆n, ƀing gơmơi ƀuh ơi tha wor jơlan mơ̆ng Quảng Khê nao”.

Ăt kah hăng ƀơi să Dak Som mơ̆n, truh ră anai kông an să Quảng Khê, tơring glông Dak Glong, dưm truă 19 boh kamera pơgang rơnuk rơnua ƀơi lu jơlan phun, kual lu sang anŏ mơnuih ƀôn sang dŏ ƀut. Thiếu tá Phạm Ngũ Lạng, Khua kông an să Quảng Khê, brơi thâo, să hlăk pơtum lu mơnuih mơnam djru hrom blơi hăng dưm truă 13 boh kamera dơ̆ng, kiăng dưi ĕp lăng djop tơlơi rô nao rai amăng tơring glông:

“Blan 10/2022 gơmơi jak iâu mơnuih ƀôn sang djru hrom, dưm truă kamera pơgang rơnuk rơnua, mơ̆ng anun truh ră anai amăng să ƀu hơmâo tơlơi hơgĕt soh sat ôh, djop mơta tơlơi soh sat ngă rung răng ƀơi jơlan glông, laih anun ƀing hlăk ai amăng mơmŏt mlam juăt dŏ ngui ƀơi anih pioh kơ mơnuih ƀôn sang hyu ngui ăt hrŏ ƀiă mơ̆n. Lăng đing nao lĕ bruă ƀing čơđai sang hră, tơdăm ngek dra muai đĭ rơdêh thut ƀu klum đuăn pơgang akŏ, đĭ rơdêh hmar, seng nao rai, kơtit jua kơtang ăt huăi hơmâo kah hăng hlâo dơ̆ng tah”.

Dưm truă kamera pơgang rơnuk rơnua ba glăi boh tŭ yua biă mă, ƀu kơnong djru tơhan kông an, mơnuih mă bruă kơnuk kơna wai lăng klă tơlơi hơđong đôč ôh, djru kơ lu mơnuih lui hĭ tơlơi among, anŏ juăt ngă, tơlơi thâo hluh aka ƀu djơ̆ hlâo adih, kiăng pơblih bruă ngă hiam klă hloh mơ̆ng mơnuih ƀôn sang kual ataih Dak Glong amăng bruă ngă tui djơ̆ tơlơi phiăn kơnuk kơna, boh nik ñu sit đĭ rơdêh rô nao rai amăng jơlan glông.

Boh tŭ yua mơ̆ng kamera ƀuh rơđah ba mơtam, ngă hơđong plơi pla, mơnuih ƀôn sang, pioh kơ mơnuih ƀôn sang hơđong mă bruă pưk hmua pla pơjing, bơwih ƀong huă. Ơi Trần Đình Hưng, dŏ pơ thôn 1, să Dak Som, tơring glông Dak Glong hok mơak lăi:

“Pơ anai tơlơi rơnuk rơnua hơđong laih, sui sui hơmâo ăt hơmâo mơ̆n arăng dŏp asâo. Samơ̆ mơ̆ng hơmâo kamera kông an lăng sŭ anai gơmơi ƀuh hơđong laih hơmâo hơmâo dơ̆ng tah dŏp asâo”.

Tui hăng kông an tơring glông Dak Glong, truh ră anai hơdră dưm truă kamera pơgang tơlơi rơnuk rơnua hơmâo pok pơhai ƀơi 7 boh să amăng tơring glông, hăng rơbêh 100 bit anih dưm kamera lăng sŭ. Thượng tá Nguyễn Xuân Hùng, Khua anom bruă tơhan kông an tơring glông Dak Glong, brơi thâo, hăng boh tŭ yua ƀuh rơđah, bruă mă mơ̆ng kông an tơring glông ăt jak iâu lu mơnuih mơnam, sang bruă djru hrom pơčruh prăk blơi măi kamera pioh lăng sŭ.

“Ƀing gơmơi ƀuh boh tŭ yua mơ̆ng bruă hơduah ĕp mă ƀing ngă soh yua mơ̆ng rup kamera anai tŭ yua biă mă, lu bruă jak iâu mơnuih ƀôn sang ngă hrom pơgang tơlơi rơnuk rơnua dêh čar. Khă sa boh tơring glông dŏ ƀun rin đôč samơ̆ hăng tơlơi gir run khut khăt, kông an tơring glông git gai brơi kông an djop să ngă hrom gong gai kơnuk kơna amăng djop plơi pla ngă tui hơdră jak iâu mơnuih ƀôn sang ngă hrom kiăng blơi kamera dưm truă djop anih pơgang tơlơi rơnuk rơnua kơ đơ đam tơring glông”.

Ƀơi kual ataih Dak Glong, dŏ rơhaih, prong, mơnuih ƀôn sang dŏ hui, taih ha bit, bruă dưm truă kamera anai pơgang tơlơi rơnuk rơnua kah hăng dưm asar mơta lăng sŭ mơ̆ng tơhan kông an, hlăk ba glăi boh tŭ yua djru pơgang tơlơi rơnuk rơnua kơ mơnuih ƀôn sang….Laih dơ̆ng, hơdră anai, ăt hơduah ĕp, kiăo mă ƀing ngă soh amuñ hăng gêh găl mơ̆n, hơdră anai kah hăng pơđĭ tui anŏ tŭ yua mơnuih ƀôn sang gum pran hrom pơgang tơlơi rơnuk rơnua dêh čar.