Tơring čar Kon Tum hăng 2 bôh tơring čar Attapư, Sê Kông dêh car Lao hmâo hrŏm jơlan guai dêh čar ataih rơbêh kơ 154 km. Rơbêh kơ 3 thun rơgao, 3 bôh tơring čar pok pơhai ngă tui Hră čih hơdor pioh gum hrŏm bruă Jơnum min hmâo laih lu bôh tơhnal klă hiam. Ƀuh rơđah hloh lĕ lăi pơhing, pơđĭ tui tơlơi thâo thăi mơng mơnuih ƀôn sang 3 bôh tơring čar pơgang pơgăn klin Covid-19; Thun gum hrŏm hơbit giăng mah Việt Nam – Lao 2022; Hrŏm hăng anun lĕ ngă tui ba glăi bôh tơhnal bruă gum hrŏm hyu hơduah ĕp, tum pơƀut tơlang tơleh 129 čô ling tơhan pơsăn drơi, mơnuih gơgrong nao gum djru hăng ƀing juăt bruă tơhan Việt Nam pơsăn drơi ƀơi dêh čar Lao ba glăi pơ̆ dêh čar dor; pơdŏng jơlan guai dêh čar rơnuk rơnua, giăng mah, gum hrŏm hăng pơđĭ kyar...

Amăng mông jơnum, Jơnum min djop djuai ania mơnuih mơnam dêh čar Việt Nam tơring čar Kon Tum hrŏm hăng Jơnum min djop djuai ania Lao pơdŏng lŏn ia 2 tơring čar Attapư hăng Sê Kông hmâo lăi pơthâo nao rai laih tơlơi găn rơgao bruă jơnum min; tŭ ư hrŏm djă pioh hăng pơđĭ kyar tơlơi rô nao rai kơjăp mơng hlâo, ha pran jua, đăo gơnang nao rai. Jơnum min djop djuai ania mơnuih mơnam 3 bôh tơring čar gum hrŏm kơjăp dong bruă lăi pơthâo nao rai tơlơi găn rơgao bruă jơnum min; kơtưn gum hrŏm amăng hơdôm bruă bơwih ƀong, sĭ mơdrô, kơsem min – măi mok, pơsur mơnuih ƀôn sang dua bôh dêh čar ngă tui hơdră bruă gum hrŏm hơbit djuai ania amăng pơdŏng hăng pơgang kơjăp lŏn ia mơng rim dêh čar./.