Ƀơi mông mă bruă, dua bơnah hơmâo lăi pơthâo nao rai tơlơi pơhing pơđĭ kyar bơwih ƀong huă, bruă mơnuih mơnam hăng gru grua tuai čuă ngui ƀơi rim tơring čar. Khua mua tơring čar Dak Lak lăi pơthâo: Dak Lak lĕ tơring čar kual tong krah Dap Kơdư, hơmâo 49 djuai ania dŏ hrŏm, lu gru grua hiam phara. Tơring čar hơmâo boh prong đơ đam pla kơphê, hnong pơhrui glăi năng ai 400 rơbâo tơn rim thun.

Kơphê Ƀuôn Ma Thuôt lĕ hmư̆ hing laih, dưi pơčrâo ba anăn gru anih pla pơjing. Thun blan rơgao, tơring čar hơmâo ngă lu bruă gum hrŏm Hàn Quốc, amăng anun kĭ hră hơdor pioh ngă hrŏm dua bơnah Dak Lak hăng tơring čar Jeollabuk hlăk ba glăi boh tŭ yua sit nik. Laih hyu tơña lăng thâo rơđah dua boh tơring čar lêng kơ kiăng ngă hrŏm amăng 3 mơta bruă: tuai čuă ngui, gru grua hiam hăng sĭ mơdrô. Ơi Oh Jun Hwan, Khua pơphun jơnum sang čơ ƀôn prong Goyang lăi lĕ, amra klă yơh tơdah dưi ngă hrŏm pơphun mông jơnum ngui mơak bruă kơphê, kiăng pôr gơnam pơkra mơ̆ng kơphê Dak Lak ba sĭ mơdrô pơ dêh čar Hàn Quốc.