Mông ngă lơphet kơkuh khăn gru ƀơi bul ia rơsĭ Hòn Khoai, tơring glông Ngọc Hiển, tơring čar Cà Mau, dŏng ataih mơ̆ng kual lŏn drŏn năng ai ñu 14km. Ƀơi anai lĕ anih blung a lơm mơ̆ng ia rơsĭ Ngŏ mut amăng kual ia rơsĭ Yŭ Dơnung dêh čar, dưi pơhmu nao kah hăng sa bôh anih gak phun wai lăng kual rơhuông adai, kual ia rơsĭ hăng ruăi lŏn gah Yŭ Dơnung dêh čar. Dưi lăng khăn gru lŏn ia por phơphur amăng angin krăh ia rơsĭ, adôh tơ-oa đĭ lu mơnuih ƀu tlaih tơlơi ol kơdol pran jua lơm tal blung a dưi kơkuh khăn gru ƀơi krah bul ia rơsĭ ataih:

“Lơm gum hrŏm dŏng hăng ling tơhan ƀơi bul ia rơsĭ, gum hrŏm sa mông kơkuh khăn gru kâo bơni ƀuh anun lĕ sa tơlơi yâo mơ-ak prong prin hăng drơi pô kâo”.

Hăng rơbêh kơ 150 bôh bul ia rơsĭ anet prong, raih ataih djop kual ia rơsĭ Yŭ Dơnung dêh čar, anih hmâo mơnuih ƀôn sang dô̆ hơdip, anih kơnong kơ hmâo ling tơhan. Sa dua bôh bul ia rơsĭ kơdư dŏng, čư̆ bôh pơtâo khil khul, nao rai tơnap tap. Samơ̆ yak đĭ abih bang, ƀing ling tơhan mơ̆ng khul rada, ling tơhan pơgang guai dêh čar... leng kơ djă kơjăp phao, 24/7 dô̆ gak ƀơi krăh rơhuông adai, kual ia rơsĭ, lăng tui djop bruă mă mơ̆ng hơdôm bôh ƀat tô song hăng anih anom rơhuông adai ƀơi gah yŭ pioh lăi pơthâo glăi kơ git gai hmao tlôn; jing anih ăh kơnang kơjăp phik kơ mơnuih hyu mă akan hơdang lơm ƀu bưng duam ruă budah hmâo tơlơi truh ƀơi ƀat tô lơm glăk hyu mă akan. Đại uý Nguyễn Tuấn Anh, Khua Anom wai lăng ra-đa 625 trung đoàn 551 Ƀirô pơtrun bruă tơhan kual 5 tơhan ia rơsĭ brơi thâo.

“Anom hmâo pok pơhai ngă klă bruă jao amra kơdŏng blah lăng hyu thâo krăn lăi pơthâo anih anom amăng kual gơgrong djă pioh kơjăp hơdôm hơdră dô̆ gak, biă ñu dô̆ gak amra kơdŏng blah hmao tlôn lăi pơthâo glăi tơlơi ƀơi kual ia rơsĭ gah rơhuông adai rơwang ber kơ Ƀirô git gai hơdôm gưl djru wai lăng, pơgang kơjăp kual ai rơsĭ dưi pơpha dô̆ gak”.

Dưi hmâo tơlơi lăng ba mơ̆ng Ping gah, Kơnuk kơna, tơlơi gum tơngan hrŏm mơ̆ng mơnuih ƀôn sang, hơdôm anih anom bul ia rơsĭ Yŭ Dơnung dêh čar ră anai glăk pơplih tui ƀơƀrư̆ rim hrơi, glông jơlan nao rai, sang ia jrao, anih dưm ia yua, apui lơtrik, sang hră wai lăng čơđai muai lơi kơ truh gưl 2 pơdŏng ha amăng plĕ, djru mơnuih ƀôn sang gêh gal hloh amăng tơlơi hơdip mơda hăng pơđĭ kyar bơwih ƀong. Dưi hmâo Kơnuk kơna hăng sang prăk brơi čan prăk mă kơmlai ƀiă, anun ră anai hrŏm hăng bruă hyu mă akan hơdang, lu mơnuih ƀôn sang ăt khin hơtai tuh pơplai rông akan amăng kruh hñual pơkĕ hrŏm hăng pơlar tuai čuă ngui anun tơlơi hơdip mơda jai hrơi jai pơđĭ kyar hloh:

“Kâo ƀuh bruă rông akan hơdang hmâo anô̆ gal biă. Ƀơi anai hmâo anô̆ kơtang lĕ amăng tŏng wing anun ƀu hmâo angin, ia hơdjă yua anun djop mơta akan hơdang prong tañ, akan klă hiam dong. Thun 2024 sĭ hmâo 10 tơn akan hơdang kơmlai hơdôm rơtuh klăk prăk”.

Hyuh hyiang bơyan bơnga kah hăng glăk truh tañ hloh hơdôm bôh bul ia rơsĭ hăng hơdôm tơlơi adôh suang, gơnam tết hmâo anô̆ phara mơ̆ng hơdôm kual mơ̆ grŭp hyu mă bruă ƀơk kơ ƀing tơhan hăng mơnuih ƀôn sang ƀơi bul ia rơsĭ: hăng biă ñu sa bruă mă ƀu dưi kơƀah lĕ anung ƀañ čưng tết ƀơi bul bôh pơtâo ia rơsĭ. Ƀañ čưng ƀơi anai ăt hmâo braih añar, rơtă dŏng, añăm mơnong un samơ̆ hmâo anung hăng hla pơtơi, yua grông hla pơđung pơkra ƀañ.

Rơgao tal anai, rim mơnuih amăng grŭp thâo hluh hloh kơ tơlơi hơdip mơda bơwih ƀong – mơnuih mơnam, tơlơi kiăng hrăm, jơnum ngui, bruă mă hăng tơlơi prăp lui mơ-ak bơyan bơnga, čơkă Tết mơ̆ng mơnuih apăn bruă, ling tơhan hăng mơnuih ƀôn sang ƀơi kual Yŭ Dơnung, thâo hluh hloh kơ hơdôm tơlơi gum hơgôp, pơsăn drơi mơ̆ng ling tơhan ia rơsĭ; gah tơlơi anih anom mơ̆ng mơnuih ƀôn sang ƀơi bul ia rơsĭ ƀơi anăp ia tơglăk, angin, djă kơjăp rah pô bul ia rơsĭ, pơđĭ kyar bơwih ƀong gum tơngan hrŏm ngă brơi hơdôm bul ia rơsĭ jing hơdôm anih anom bul ia rơsĭ mơtah, hmâo djop mơta ra mơnong ƀơi krah ia rơsĭ Lŏn ia./.