Sa hrơi hlâo kơ hrơi čơkă Noel, mah glăk hơjan prong, amăng lan sang jơnum Mằng Lăng, neh met wa tui đăo gum hrŏm kih rơmet, tol yol jum dar anih anum tơkeng ană khua yang adai, phun hngo Noel hăng hơdôm gơnam yua tui hơmâo đôč. Ơi Nguyễn Thành Toán, mơnuih ƀôn sang plơi Ngân Sơn brơi thâo:

“Thun anai ƀu hơmâo djop kah hăng rĭm thun yua răm rai kơtang đơi yua anun pơkra aset đôč amăng sang jơnum. Kah hăng phun kyâo hngo Noel, apui kơđen, laih dong rup ană khua yang adai, amĭ ñu, ơi Giu-sê dong. Pơ sang ƀing gơmơi pơkra hang đá anet ƀơi anăp sang”.

Hăng lu sang anŏ, kiăng sui hrơi dong kah mơng dưi rŭ pơdong glăi tơdơi kơ tal hơjan ia ling dăo rơgao, samơ̆ sui hrơi Noel anai, djop sang anŏ hơmâo hơđong tơlơi hơdip ƀiă yơh. Ơi Nguyễn Văn Sen, dŏ amăng plơi Hội Tín brơi thâo, sang anŏ ia kor đuăi abih kông ngăn, hlô rông hăng phun pla. Samơ̆ yua hơmâo tơlơi pơgang ba mơng pran đăo gưt, hơmâo ană plơi pla, gong gai djru ba, bơyan Noel anai ăt ngă pơđao amăng pran jua mơn.

“Mah glêh tơnap tui anun, samơ̆ bơyan Noel anai ăt pơđao pran jua, hơmâo pran khăp pap mơng ană mơnuih hăng tơlơi pơgang ba mơng khua yang hăng mơnuih mơnam, hơmâo tơlơi juh alum pran biă. Čang rơmang abih bang mơnuih lêng kơ thâo khăp pap tơdruă mah tơlơi hơdip hiưm pă tŭ mơn.”

Hăng pran jua tui anun mơn, ayong Phan Văn Truyền, dŏ amăng plơi Hội Tín brơi thâo, tơlơi iâu lăi yôm hloh mơng ñu hăng neh met wa amăng thun anai lĕ tơlơi rơnuk rơnua. Tơlơi kơ bưp tơlơi ƀu mơ-ak yua hơjan kơthel, hlơi hlơi lêng kơ čang rơmang abih bang mơnuih tañ pơwot glăi tơlơi hơdip tui hơđăp.

“Hơjan ia ling dăo bơdjơ̆ nao kơtang tơlơi bơwih ƀong huă, pran jua mơnuih. Bơyan Noel anai abih bang mơnuih amra iâu lăi kiăng hơmâo tơlơi rơnuk rơnua, laih dong abih bang mơnuih tañ pơwot glăi tơlơi hơdip tui hơđăp.”

Tui ama Phêrô Võ Thanh Nhàn, ama git gai wai lăng tơring đăo Mằng Lăng, tơring đăo hơmâo 527 boh sang anŏ hăng giăm 1.560 čô mơnuih tui đăo, dŏ hơdip ƀơi hơdôm boh să Tuy An Đông, Tuy An Bắc hăng ha bơnah ƀơi Tuy An Tây. Tal hơjan ia ling dăo rơgao ngă lu sang anŏ rămg rai. Yua anun, bơyan Noel thun anai hơdôm boh sang anŏ hơmâo tol yol aset đôč đing nao bruă djru găn rơgao tơnap tap. tơring đăo đing nao bruă tơkuh nao rai hăng hơdôm grup gum djru kiăng djru brơi mơnuih ƀôn sang hơđong tơlơi hơdip mơda.

“Bơyan Noel thun anai lĕ bơyan mơ̆ ƀing gơmơi kiăng pơƀuh mah ƀing gơmơi bưp lu tơlơi tơnap tap yua hơjan ia ling dăo, samơ̆ kiăng djru brơi abih bang mơnuih găn rơgao tơlơi tơnap tap, tơlơi lông. Lăi nao pran đăo gưt, ƀing gơmơi ƀuh djop tơlơi lông lêng kơ dưi rơgao hĭ, tơdah ƀing ta hơmâo pran đăo gơnang kjăp phik amra dưi găn gao djop tơlơi lông amăng tơlơi hơdip.”

Jua teng mơng sang jơnum Mằng Lăng hmư̆ bang tơ-ua amăng plơi pla hơ-et kret kruai ƀơi Dak Lak tơdơi kơ hơjan ia ling dăo. Bơyan Noel ƀơi Mằng Lăng thun anai ƀu ƀuh lu apui kơđen jă lik lak, lu mơnuih hyu ngui kar hăng rĭm thun, samơ̆ kơđŏm glăi tơlơi yôm. Anai lĕ bơyan Noel hăng pran pơkrem, djru ba ană mơnuih, mơng pran đăo gơnang ngă bơngač amăng hrơi tơnap tap, kiăng mơng anun, neh met wa gum hrŏm hơkrŭ glăi, anăp nao tơlơi hơdip hơđong mơ-ak pơ anăp dong./.