Tơdơi kơ rơbêh 10 blan mă bruă, 3 km črăn jơlan đĭ čư̆ Prenn arăng man pơkra glăi truh ră anai ngă giong laih, dưi brơi rơdêh nao rai dua glông nao hăng glăi. Anai lĕ jơlan phun yôm biă mă, pơtruh nao rai mơ̆ng plơi prong Đà Lạt hăng anih tuai hyu ngui pơprong kah hăng drai ia Datanla, anih tuai hyu ngui dơnao Tuyền Lâm, Thiền viện Trúc Lâm laih anun hăng lu ƀut plơi pla mơnuih ƀôn sang gah dơnung plơi prong.

Bruă ba yua jơlan anai, ƀu kơnong ngă djop brơi kơ tuai hyu ngui mơak klă đôč ôh laih anun pơsir brơi pơ anăp anai mơnuih ƀôn sang đuăi hyu ngui čơkă thun phrâo ƀong têt huăi kơđông rơdêh či nao amăng plơi prong. Ră anai, dŏ rơbêh 4 km jơlan đĭ čư̆ Prenn mơ̆ng drai ia Datanla trun čư̆ arăng hlăk man pơkra tañ mơ̆n. Kiăng pơgang klă jơlan đĭ čư̆ Prenn tañ giong hlâo kơ bơyan têt pơ anăp, Group pơkra jơlan Đèo Cả hlăk pơtum lu mơnuih mă bruă, rơdêh čuk, măi mok, gơnam yua pơkra jơlan hrơi hăng mlam kiăng tañ giong.