Ƀơi Sang bruă tơčôh băn ao Lực Thiêm, gah ƀut sang măi Tân An, plơi prong Buôn Ma Thuột, tơlơi mă bruă ƀơi lu anih pơphun dik dak. Mơnuih mă bruă kơ sang măi anăn ñu H’ Lyna Ayun lăi pơthâo, dong mơ̆ng akô̆ thun truh ră anai, sang bruă hmâo čơkă mă laih lu hră rơkâo blơi gơnam, rơnoh prăk blan čơkă mă ăt đĭ lu mơn, anun tơlơi mă bruă dik dak hloh:

 “Sang bruă hăng khul mut phung ƀơi anai hmâo gum tơngan hrŏm bơwih brơi klă kơ mơnuih mă bruă kah hăng apah bơni sa blan prăk pơkă phun hăng brơi gơnam tam kơ mơnuih hmâo bôh tơhnal prong. Čang rơmang sang bruă amra pơđĭ kyar hloh dong pioh hmâo rơnoh prăk blan hăng kơmlai klă hloh dong”.

Ƀơi kual sang măi Hòa Hiệp, plơi prong Buôn Ma Thuột, rơbêh kơ 2.400 čô mơnuih mă bruă ăt glăk bơkơtưn mă bruă mơn. Hơdôm hrơi rơgao, bruă bơkơtưn ngă tui tơlơi pơčeh phrâo, pơplih phrâo măi mok yua kơ hơdôm gưl khul mut phung pok phun hmâo ngă pơhưč lu mơnuih mă bruă kơ hơdôm bôh anom bơwih ƀong gum hrŏm. Lu tơlơi pơčeh phrâo tŭ yua hmâo pơplih anih anom mă bruă, pơkrem gơnam mă yua pơkra hăng djơ̆ tui tơlơi kiăng pơplih phrâo hơdră ngă rai gơnam tam. Rơđah biă ñu lĕ 2 tơlơi pơčeh phrâo măi mok ngă nua bluh oxy kơ gŏ kơhul pơkra pơsơi hăng ƀô̆p ia ngă hlưh pơ-iă khung tuh pơsơi mơ̆ng Lê Trung Hiếu, gơgrong gah bôh thâo măi mok pơkĕ apui lơtrik – anih tuh tia pơsơi gah Sang bruă pơkra pơsơi ASEAN, djru pơkrem mơnuih mă bruă, pơkrem apui hăng plai ƀiă hmâo tơlơi ƀu tơphă. Ayong Lê Trung Hiếu brơi thâo.

 “Lơm rai mă bruă ƀơi anai dưi hrăm tui lu tơlơi lĕ bruă mă mơ̆ng pô jai pơđĭ tui. Mơ̆ng hơdôm tơlơi găn rơgao djă pioh anun kâo mơ̆ng pơjing rai hơdôm tơlơi pơčeh pơplih phrâo tui anun. Lơm hmâo hơdôm bôh tơhnal tui anun kâo ƀuh mơ-ak amăng pran jua biă, kâo ƀuh pô djru brơi adơi ayong, gơyut gơyâo, ƀing gŏp amăng bruă mă gêh gal hloh, pơhlôm klă hloh”.

Yă Lê Thị Tuyết Hạ, Khua Khul mut phung Sang bruă pơkra pơsơi ASEAN brơi thâo, Sang bruă lăng ba na nao tơlơi kiăng pioh mơnuih mă bruă pơhlôm hăng bơkơtưn pơđĭ tui ba glăi bôh tơhnal ngă rai gơnam tam:

 “Phara mơ̆ng bruă mă ƀơi sang măi lĕ pơkra rai gơnam kơtrâ̆o, anun ta khom pơplih phrâo. Sang măi ba tơbiă na nao tơhnal pơkă pioh kơ mơnuih mă bruă hrưn đĭ, hmâo jơlan gah nao ƀing ta lĕ sa bôh sang anô̆ anun ba glăi bôh tơhnal dưi djru nao rai, mơ̆ng anun ăt hmâo pran mơn kơ mơnuih mă bruă gir run mă bruă lơ̆m mơ̆ mơnuih hăng khul grŭp leng kơ hmâo bôh tơhnal”.

Ơi Trương Hồ Anh Hoàng, Kơ-iăng Khua Grŭp wai lăng hơdôm kual sang măi tơring čar Dak Lak brơi thâo, bruă bơkơtưn “Mơnuih mă bruă rơgơi, mơnuih mă bruă pơčeh phrâo” nao hrŏm hăng hrăm tui hăng ngă tui tơlơi pơmin, pran jua, kơnuih Hồ Chí Minh hmâo rŭ đĭ tơhnal gal, bôh thâo mơ̆ng mơnuih mă bruă amăng hơdôm bôh ƀirô, anom bruă, anom bơwih ƀong.

 “Amăng hơdôm hrơi pơ̆ anăp, Grŭp wai lăng hơdôm kual sang măi tơring čar amra gum hrŏm klă hăng hơdôm gơnong bruă, bruă lăi pơhing pơsur brơi kơ mơnuih mă bruă, mơnuih yua mơnuih mă bruă hur har mă bruă, biă ñu lĕ pok pơhai lu jơlan hơdră bơkơtưn mă bruă ngă rai gơnam tam brơi kơ mơnuih mă bruă”.

Lơm tơlơi pơkă mă bruă dưi pơplih phrâo, prăk pơhrui glăi đĭ, hơdôm črăn prăk gum djru, hơdră bruă leng kơ pơhlôm amra djru mơnuih mă bruă kơ sang măi, mơnuih apăn bruă, mơnuih mă bruă ƀơi tơring čar Dak Lak hơđong prăn jua kĕ phĭ hăng bruă mă, hur har mă bruă.

Pok pơhai hơdôm bruă bơkơtưn khăp kơ lŏn ia, Khul mut phung hơdôm gưl mơ̆ng tơring čar Dak Lak đing nao pơplih anăn bơkơtưn thun 2024 nao hrŏm hăng bruă bơkơtưn “Mă bruă rơgơi, mă bruă pơčeh phrâo”, “Pơphô bruă rơgơi, djru bruă klă”; pơsur mơnuih amăng khul, mơnuih mă bruă kơ sang măi, mơnuih apăn bruă, mơnuih mă bruă run pran bơkơtưn ngă tui ba glăi bôh tơhnal Jơlan hơdră 1 klăk pơčeh phrâo, pơtrut tañ kơsem min, mă yua bôh thâo phrâo, hơdră phrâo măi mok, pơtrut đĭ bôh than mă bruă. Hrŏm hăng anun, bơkơtưn pơphun ba glăi bôh tơhnal hơdôm bruă mă bơwih brơi bôh tŭ yua hăng kơmai kơ mơnuih amăng khul, mơnuih mă bruă, đing nao djru hmao tlôn hơdôm mơnuih amăng khul, mơnuih mă bruă hmâo tơlơi hơdip tơnap tap; kĭ pơkôl hơdôm jơlan hơdră tŭ yua kơ mơnuih amăng khul, hơdôm bruă mă bơwih brơi kơ tơlơi hơdip mơda hăng pran jua, yua kơ bôh tŭ yua sit nik mơ̆ng mơnuih amăng khul, mơnuih mă bruă./.