Amai Nguyễn Thuỷ Triều, Khua Anom bruă – Khua čih pioh Khul sĭ mơdrô kơphê Buôn Ma Thuột, tơring čar Dak Lak brơi thâo, Khul gum hrŏm bruă kơphê Buôn Ma Thuột ră anai glăi ngă tui wot website, plăng face book, gum hrŏm djuai čat mơ̆ng khul mơnuih sĭ mơdrô kơphê phara mơ̆ng Việt Nam, hmâo anăn amăng plăng pơhing mơ̆ng Anom kơsem min anô̆ klă kơphê jar kơmar, anun tơlơi pơhing dưi tŭ mă, pơsir rim mông, rim mơnit, ba truh kơ mơnuih amăng khul tơhnal nao pơhmư̆ hơdôm bruă pơplông hăng pơdă prưng jar kơmar. Hơdôm jơlan hơdră gum hroĭm kơsem min, hăng hơdôm anih pơtô pơhrăm mơ̆ng phun truh pơ̆ tơdŭ, djru kơphê Việt Nam dưi truh kih prong anô̆ klă ñu. Amai Nguyễn Thuỷ Triều lăi:

“Khua čih pioh Khul sĭ mơdrô kơphê Buôn Ma Thuột hmâo sa khul prong biă, amăng anun hmâo lu mơta. Rim wot hmâo sa bôh tơhnal kơsem min hơget kơ kơphê ƀudah tŭ yap kơ kơphê thơ gơñu leng kơ mơ-ĭt truh kơ khul pioh pel ĕp, mơ-ĭt kơ khul. Ƀudah hmâo hơdôm tơlơi pơhing hmâo nua lĕ mơnuih amăng khul amra lăi pơthâo kơ khul pioh thâo tañ. Bơ̆ pô hyu ĕp amăng plăng face book thơ sui biă, đa ƀu ƀuh ôh”.

Dong mơ̆ng thun 2007, lơm pơplih mrô dô̆ ƀiă thâo truh, čơđai gưl dlông – mơnuih ngă đang hmua Nguyễn Công Thịnh ƀơi plơi prong Đà Lạt, tơring čar Lâm Đồng, hmâo pơjing sa website juăt lăi nao kơphê, tŭ mă nua kơphê mơ̆ng hơdôm anih anom blơi sĭ jar kơmar, jing bruă bơkơtuai pơsôh hăng tŭ yua. Truh ră anai, Dap Kơdư hmâo dong lu phun akha mrô dưi mă yua ba glăi bôh tơhnal, amăng bruă đang hmua, bơwih ƀong sĭ mơdrô, pơlir hơbit hăng pơtô juăt. Hăng ayong Đặng Công Kiên, Khua Anom mă bruă hrŏm gah đang hmua Kiên Thảo Phát, ƀơi tơring kual guai dêh čar Ngọc Hồi, tơring čar Kon Tum, pơplih mrô jai hrơi jai ngă tui klă mơ̆ng jing jơlan pioh pơjing hơdôm khul yua mrô nao hrŏm sa jơlan. Truh kih mơ̆ng hơdôm blah blok đang sầu riêng, kơphê hơdjă mơ̆ng anom mă bruă hrŏm, hơdôm gơnam pơkra yua pruai kơ phun pla mơ̆ Anom mă bruă hrŏm pơkra mă, leng kơ kơnang kơ gum hrŏm khul yua mrô gah đang hmua klă:

“Kâo gum hrŏm amăng khul ngă đang hmua klă hăng tơdơi kơ anun dưi hrăm sa anih gah Organic yua kơ ƀing nai Australia pơtô amăng 6 blan online. Mơ̆ng bôh thâo anun kâo hmâo mă yua pioh ngă rai hơdôm gơnam klă hiam. Anom mă bruă hrŏm kâo ăt hmâo mơn gơnam pơkra yua pruai kơ phun pla, yua kơ bruă pơkra gơnam mă mơ̆ng đang hmua hăng rao gơnam yua ƀong huă. Laih anun anom ăt hmâo mơn hơdôm gơnam kah hăng kơphê, sầu riêng. Hơdôm djuai akha jrao lĕ dưi pla ƀơi rơgôp tơ-ui kyâo pơkra ia če”.

Pơplih mrô bruă đang hmua ƀơi Dap Kơdư ră anai tô̆ tui dong jơlan kơjăp tui lơm hmâo dong hơdôm anăn mă yua mrô juăt pioh kơ bruă đang hmua Việt Nam, kah hăng AutoAgri, MobiAgri, VNPTGreen... Glăk djru hơdôm bôh anom mă bruă hrŏm sầu riêng ƀơi tơring glông Krông Pač, tơring čar Dak Lak pok pơhai anăn VNPT GREEN, Thạc sĩ Nguyễn Lê Anh Dũng, Khua Anom wai lăng bruă yua măi mok (VNPT Dak Lak) brơi thâo: Rơngiao kơ anăn mă yua pioh kơ lu blok đang hăng anom mă bruă hrŏm, VNPT glăk pok pơhai đang hmua mrô AIMS, djru wai lăng abih bang mơ̆ng bruă ruah pơjeh truh kơ pla – pơgang phun pla, hlô rông – bruă ia jrao kơ hlô, akan hơdang, pơđĭ kyar plơi pla truh wai lăng anô̆ klă hiam gơnam tam, akan hơdang:

“Ƀing gơmơi glăk hyu hơduah ĕp pơ̆ rim anih anom pioh pơjing khul hlăk ai, thâo hluh kơ măi mok pioh gum hrŏm amăng bruă pơjing anăn mă yua kơ bruă đang hmua mrô mơ̆, ƀing gơmơi glăi pok pơhai ƀơi plơi pla. Truh thun 2030, amra dưi ba nua anăn păn hmâo pơjing mut mă yua”.

Amăng mông jơnum Pơtrut tuh pơplai amăng bruă đang hmua, plơi pla kual Dap Kơdư phrâo dưi pơphun ƀơi tơring čar Gia Lai, Khua Ding jum đang hmua hăng pơđĭ yar ƀôn lan Lê Minh Hoan lăi rơđah, Dap Kơdư hăng hơdôm ƀirô mơ̆ng Ding jum, hrŏm hăng lu anom bơwih ƀong... khom mă yua đut hlah hơdôm djuai măi mok pioh lăi pơthâo nao rai ba glăi bôh tơhnal hloh, djru bruă đang hmua mơ̆ng kual pơđĭ kyar abih bang wot glai kyâo, tơjŭ pla hăng rông hlô, dưi ngă tui lu mơta tui tơlơi ba tơbiă amăng Tơlơi pơtrun pơsit 23 thun 2022 mơ̆ng Ding jum kơđi čar:

“Kâo rơkâo Gia Lai, Kon Tum, Dak Lak, Dak Nông, Lâm Đồng bơkơtuai kiăng lăi pơthâo lu hloh dong bruă ngă pơhưč tuh pơplai kơ bruă đang hmua, ruah mă klă lu mơta ƀu djơ̆ sa mơta dong tah. Anai lĕ tơlơi pơtrun pơsit mơ̆ng Ping gah laih. Ră anai hmâo anih anom phrâo laih, dưm kơnar laih, hmâo lu hơdră pioh ƀing ta lăi pơthâo nao rai tơdruă. Yôm phăn hloh lĕ tơhnal pơkă ƀing ta hmâo ba tơbiă”.

Lơm pơplih mrô glăk pơphun kơtang biă, djru rim mơnuih ngă đang hmua, anom bơwih ƀong, khul bơwih ƀong ƀơi Dap Kơdư (biă ñu lĕ amăng bruă đang hmua) lăng ƀuh rơđah hơdôm tơhnal gal pioh hrưn đĭ pô, pok phun klă truh kih./.