Tơlơi pơhing mơak tui hăng mrô rơnoh mơ̆ng anom bruă tuai čuă ngui dêh čar Việt Nam ta brơi ƀuh, tơdơi kơ 11 blan rơgao thun 2023, anom bruă tuai čuă ngui Việt Nam hơmâo čơkă 11,2 klăk wơ̆t tuai jar kmar hăng 100 klăk wơ̆t tuai čuă ngui amăng dêh čar ta pô, rơbêh 11 klăk wơ̆t tuai jar kmar rai ngui đĭ hloh 4 wơ̆t pơkă hăng thun 2022. Kơnong jŭ yap truh abih blan 10/2023, rơnoh prăk pơhrui glăi mơ̆ng bruă tuai čuă ngui hơmâo 556 rơbâo klai prăk. Ơi Nguyễn Công Hoan-Khua anom pôr tơlơi pơhing Khul grup tuai čuă ngui Việt Nam brơi thâo, hơmâo 4 boh anih dưi ngă djơ̆ tơhnal pơkă čơkă mơ̆ng 12-13 klăk wơ̆t tuai jar kmar amăng thun anai:

“Gah kông ty ba hyu tuai, pơ anai gơmơi ƀuh amra pơtrut klă mơ̆n amăng bruă gơmơi ngă. Pơđĭ tui hrơi dŏ glăi hră visa ƀơi Việt Nam sa anŏ ngă gêh găl kơ gơmơi dưi pơhno bruă mă ba tuai hyu ngui ră anai. Ñu amra ngă kơ ƀing tuai rơnguai ruah ĕp mă anih hyu ngui ƀơi Việt Nam, amra sui hrơi mông hloh kiăng ngă hrŏm hơdră hyu ngui ƀu kơnong ƀơi Việt Nam đôč ôh, truh pơ dêh čar ieo gah dơ̆ng”.

Kiăng pơtrut rơnoh pơđĭ kyar lu hloh laih anun pơjing bruă mă kơtang hloh thun 2024, tui hăng ƀing mơnuih rơgơi kơhnâo laih anun anom bruă sĭ mơdrô bruă tuai hyu ngui, djop sang sĭ mơdrô, djop tơring čar hăng ding jum anom bruă kơnuk kơna pơtum nao hrŏm bruă mă yôm. Ƀơi anăp hăng hrơi blan hăng anai jing mông yôm biă mă kiăng pơhưč tuai dêh čar tač rơngiao, yua kơ anun kiăng pơtrut tŭ yua hloh ngă tui Hră pơtrun 82 mơ̆ng Kơnuk kơna dêh čar hăng lu hơdră pơsir khut khăt. Hrŏm hăng Hà Nội laih anun ƀôn prong Hồ Chí Minh, lu tơring čar pơkŏn ăt pơtrut pơphun bruă ba tuai hyu ngui, lu hơdră mơak čơkă thun phrâo anai kiăng pơhưč tuai hyu ngui. Ơi Nguyễn Trùnh Khánh, Khua anom bruă tuai čuă ngui dêh čar Việt Nam lăi:

“Hrơi mông lu hloh tuai jar kmar rai ngui lĕ mơ̆ng blan 10 thun hlâo truh kơ blan 4 thun tơdơi kơ anun. Djop sang bruă sĭ mơdrô bruă tuai hyu ngui Việt Nam glăk prăp lui djop mơta gơnam sĭ mơdrô kơ tuai hyu ngui phrâo hăng pơtrut bruă pôr pơthâo truh pơ djop anih tuai kiăng nao ĕp lăng, biă mă ngă hrŏm jơnum ngui sang sĭ mơdrô pơdah thâo bruă tuai hyu ngui jar kmar pơprong, hơmâo anih jơnum ngui ngor mơak hăng tuai djop bruă”.

Lăng glăi thun 2023, mah pơhưč tuai hyu ngui đĭ lu, samơ̆ mrô tuai dŏ glăi ăt aka ƀu lu ôh pơkă hăng dêh čar amăng kual. Tui hăng ơi Vũ Thế Bình, Khua Khul bruă tuai čuă ngui Việt Nam, hrŏm hăng bruă pơtrut kiăng pơhưč tuai hyu ngui ƀơi anih anom juăt nao, kiăng pơtrut tuai hyu ngui mơ̆ng kual Mi kô̆ hăng anih ataih hloh.

“Tuai jar kmar hyu ngui lĕ sa amăng hơdôm bruă mă yôm gah anom bruă tuai čuă ngui Việt Nam kiăng pơhưč. Kiăng čơkă tuai jar kmar khom hơmâo gơnam bơwih brơi tuai phrâo, pơphun bruă čơkă tuai djơ̆ hăng anŏ kiăng tuai jar kmar. Anih anom hyu ngui phrâo ăt khom pơblih, ră anai ƀu kơnong anih hyu giăm đôč ôh, anih nao pơ ataih ƀing ta lăng yôm mơ̆n”.

Hăng anih tuai hyu ngui lơ̆m dêh čar, mah thun 2023 đĭ lu samơ̆ tui hăng hơdôm kông ty ba tuai hyu ngui, rơnoh prăk pơhrui glăi amăng dêh čar aka djop ôh kah hăng anŏ čang rơmang, yua kơ tơlơi bơwih ƀong huă dŏ tơnap tap, mơnuih ƀôn sang blơi yua ƀiă, đing nao bruă kiăng pơkŏn, hyu ngui ƀiă hrơi, ruah mă tuôr ƀiă, hyu ataih, tla prăk lu aka ƀu ngă ôh. Kiăng pơhưč lu hloh tuai amăng dêh čar, ơi Bùi Thanh Tú, Khua Marketing kông ty tuai čuă ngui BestPrice lăi lĕ:

“Mơta sa lĕ rơnoh wĕ đĭ rơdêh por nao amăng dêh čar pô khom pơtrun rơgêh ƀiă hnun kah pơhưč ƀing tuai hyu ngui. Ƀing ta ƀuh laih mơ̆n thun 2023 hơmâo hrơi nua wĕ rơdêh por nao pơ Phú Quốc ƀudah Nha Trang pơmă biă mă ngă bơbeč djơ̆ ƀing tuai rô nao rai. Dua lĕ pơđĭ kyar bruă tuai hyu ngui khom hơđong, djă pioh anŏ hiam klă phiăn hơmâo mơ̆ng hlâo, glai klô, plơi pla, drai ia čroh hnoh, tuh pơ alin man pơkra anih tuai hyu ngui man ƀrô đôč, tuai kơnong nao sa wơ̆t laih anun ƀu kiăng pơwơ̆t glăi ôh. Klâo lĕ lu tơring čar kiăng ngă tui lu hơdră pôr pơthâo bruă tuai hyu ngui hrŏm hăng pơkra ming gơnam sĭ mơdrô kơ tuai phrâo hloh hnun kah dưi pơhưč tuai; amăng thun rơgao ƀing ta ƀuh Hà Nội hăng Festival bơyan akŏ puih Hà Nội, ƀudah rơwang hrơi tơjuh tuai hyu ngui ƀôn prong Hồ Chí Minh hơmâo ngă klă biă mă kiăng pơhưč tuai nao pơ ƀôn prong gơñu”.

Ƀơi mông jơnum Pơđĭ kyar bruă tuai hyu ngui Việt Nam hmar, hơđong kjăp phrâo anai, Khua dêh čar Phạm Minh Chính lăi pơtong, bruă tuai hyu ngui dưi lăng sa bruă bơwih ƀong huă phun, djru hrŏm yôm biă mă pơsir bruă mă, lui rơmŏn kŏn rin, pơhưč tuh pơ alin, pơtrut rơnoh pơhrui glăi hăng pơblih hơdră bơwih ƀong huă, djă pioh laih anun pơđĭ tui rơnoh yôm gru grua hiam, gru phun dêh čar, gru grua djuai ania, pơđĭ tui tơlơi hơdip mơda kơ mơnuih ƀôn sang. Kiăng kơ bruă tuai čuă ngui pơđĭ kyar hloh tui tơlơi git gai mơ̆ng Ding jum kơđi čar, tui hăng Khua dêh čar lăi, bruă tuai čuă ngui Việt Nam kiăng pơblih tơlơi pơmin hơdră mă bruă, khom pơčeh phrâo, pơđĭ kơtang, ngă tui sa amăng plĕ, tŭ yua, ngă tui tơlơi pơir hơbit kjăp, ngă hrŏm sa prna jua, gum hrŏm hlom bom.