Pơphun truh lơ 23/12, Bruă jơnum pơplông bơkơjăp drơi jăn tơring čar Gia Lai tal anai ngă pơhưč rơbêh kơ 3.100 čô mơnuih mơ̆ng 69 grŭp rai mơ̆ng hơdôm bôh tơring glông, plơi prong hăng hơdôm bôh Sang hră gưl 3 amăng đơ đam tơring čar.

Ƀing mơnuih pơplông ƀơi 3 gưl: gưl sa hăng 4 mơta tơlơi pơplông, gưl 2 hăng 12 mơta tơlơi pơplông hăng gưl 3 hăng 11 mơta tơlơi pơplông. Hơdôm tơlơi pơplông hmâo: luai ia, pah ping pong, pah bôh lông, đă bôh lông, pah blâo mơnŭ, kơrê, tŭn gai, kơplong ataih, karate, Vovinam, Taekwondo, dui hrĕ. Pơhiăp pok phun, Khua Gơnong bruă pơtô pơhrăm, Khua Grŭp pơphun bruă pơplông bơkơjăp drơi jăn čơđai sang hră tơring čar Gia Lai Lê Duy Định lăi rơđah: "Jơnum pơplông bơkơjăp drơi jăn čơđai sang hră jing phun dlông hloh mơ̆ng bruă bơkơjăp drơi jăn ƀing čơđai hlăk ai sang hră, anai bruă mă pơtô pơhrăm pioh pơđĭ kyar drơi jăn, pran jua, djru ngă klă hloh kơnuih, ngă tui ba glăi bôh tơhnal pơkă pơtô juăt abih bang kơ čơđai sang hră”./.