Ƀơi anih pơdong plơi phrâo Điểm 9, să Ia Hiao, năng ai 70 boh sang blung a glăk hơmâo ngă ječ ameč kiăng tañ giong. Tơhan hơđăp Nay Kêr ƀơi ƀon Čư̆ Plah Jai, sa amăng hơdôm akŏ sang blung a tŭ ư đuăi nao pơ plơi phrâo, ñu hok mơak lăi: “Hlâo adih, tơlơi hơdip neh met wa pơ anai juăt ia dăo na nao mơtăm yơh, tơnap biă mă, hŭi rơhyưt dong, biă ñu amăng bơyan hơjan. Ră anai hơmâo Kơnuk kơna lăng ba, djru pơdong plơi anih dŏ phrâo, nao dŏ gah kơdư, anun jing huăi hŭi ia dăo dong tah. Anai jing bruă ngă kiăng neh met wa hơđong tơlơi hơdip mơda, bơwih ƀong laih anun jai hrơi hơdip jơnap hloh. Ƀing gơmơi bơni biă kơ gong gai hơmâo lăng ba, djru brơi ƀing gơmơi”.

Hăng mơnuih djuai ania Jarai, nao dŏ pơ anih phrâo ƀu kơnong plih anih dŏ đôč ôh, ăt hơmâo tom bruă djă pioh tơlơi phiăn, gru ama grua amĭ, ia pin. Yua gir pơtô lăi, hơmâo gong gai, ping gah djru ba, neh met wa tŭ ư soh, hơ’et pran lơ̆m djŏp gru grua atông čing, bruă rơngaih mơñam ăt hơmâo djă pioh mơn amăng plơi phrâo. Yă Ksor H’Hoa - Kơ-iăng khua ping gah, Khua ƀon Čư̆ Plah Jai, să Ia Hiao brơi thâo: “Lơ̆m neh met wa nao pơ anih dŏ phrâo, gru ama grua amĭ mơ̆ng Jarai hơbai ăt hơmâo djă pioh hăng pơtrut tui mơn. Mơ̆ng tơlơi phiăn, tơlơi ngă yang, bruă wai lăng pơsat, truh kơ atông čing, neh met wa leng kơ gir răk lui, hăng djă ba abih gru hiam anun pơ anih dŏ phrâo. Rơngiao kơ anun, bruă rơngaih mơñam eng ao, bung bai ăt hơmâo ngă na nao mơn. Ƀing gơmơi pơphun na nao mơn hrơi jơnum ngui, gru grua, adoh suang kiăng neh met wa ngui ngor bơbưp nao rai, kjăp tui pran jua gum pơgôp laih anun gum djă bong gru ama grua amĭ mơ̆ng djuai ania”.

Ƀơi ƀon Jư̆, să Ia Tul, 207 boh sang anŏ juăt bưp tơlơi truh ia dăo kơtang, glăk ječ ameč pơdŭ hnă gơnam pơ anih dŏ phrâo mơn, giăm 22 ha. Amăng anun, 152 boh sang anŏ ruh tah hĭ sang Jarai pŭ nao pơ anih dŏ phrâo đah mơ̆ng plai ƀiă hrŏ prăk, laih anun ăt dưi djă pioh mơn gru sang kyâo. Ƀing khua amăng să hrŏm hăng ling tơhan kông an, tơhan ƀô̆ đô̆i djru ruh, tah sang, tơnă hơbai asơi anăm, prăp brơi ia mơñum hăng rơdêh pơdŭ sang kơ mơnuih ƀôn sang. Ơi Ksor Yu, mơnuih hơmâo kơnuih hiam ƀơi ƀon Jư̆, hok kơdok lăi: “Ră anai, sang anŏ gơmơi prăp či nao dŏ pơ plơi phrâo laih. Hlâo adih, lơ̆m dŏ pơ plơi hơđăp, truh bơyan hơjan kơthel juăt ia dăo mlĕp, tơlơi hơdip glêh tơnap biă, bui rơmô, mơnŭ, bip ia kor đuăi abih. Ră anai hơmâo gong gai prăp rơmet brơi, djru nao dŏ pơ anih phrâo rơnuk rơnua, hiam hloh, sang anŏ gơmơi mơak biă, hơ’et pran jua laih. Pơ anai hơmâo djŏp mơn anŏ či kiăng kah hăng sang hră, sang ia jrao..anun bruă hơdip mơda mơak mơn. Gơmơi čang rơmang tañ hơđong tơlơi hơdip, bơwih ƀong hơmâo hloh pơ anih dŏ phrâo. Kâo bơni biă mă kơ gong gai thâo lăng, djru ba neh met wa”.

Tui hăng kơčăo bruă, tơring čar Gia Lai glăk hơmâo 16 bit anih khŏm ba pơđuăi tañ, hăng 1.858 boh sang anŏ, hơmâo 13 kơčăo bruă pơdong plơi phrâo pơƀut ha anih hăng 3 jơlan hơdră pơdong plah wah. Prăk pioh ngă bruă rơbêh 2.100 klai. Amăng anun, rơbêh 713 klai prăk tuh pơ alin man pơdong kơnar; rơbêh 258 klai prăk djru ba tơl tơngan mơnuih ƀôn sang; hăng rơbêh kơ 1.136 klai pioh duh ba, pơklaih ala lŏn. Thun blan rơgao, hơdôm boh să Ia Hiao, Ia Tul, Uar, Ia Rsai hăng Ia Dreh ha amăng plĕ nao mă bruă. Ping gah, Jơnum min mơnuih ƀôn sang tơring čar Gia Lai pơkă hơnong ngă bruă rơđah rơđông hăng khut khăt khŏm ngă dưi: Hlâo kơnôl 30/8 jao glăi ring bruă man pơdong kiăng yua hloh; hlâo kơ kơnôl 31/10 ba neh met wa tơbiă mơ̆ng anih hŭi rơhyưt; hlâo kơ kơnôl 31/11 sem lăng, hăng hlâo kơ kơnôl 15/12 thun anai giong ngă pơgiong abih. Ƀơi să Ia Hiao - anih pơphun dăp rơmet brơi 180 boh sang anŏ, ơi Phạm Văn Phương - Khua pinggah să pơsit pran jua gir run mơ̆ng să: “Bruă ruah mă hơdôm boh sang anŏ blung a ngă hlâo, kiăng pơtrut pơsur sang anŏ pơkŏn dong. Truh ră anai, să glăk ngă bruă duh lŏn sang đang hmua, djru ba 24 akŏ sang blung a. Kơ hrơi ngă bruă, mơ̆ng anai truh kơnôl 1/10/2026, să gir ngă giong abih djŏp hơnong pơkă prăp rơmet brơi 100 akŏ sang anŏ, laih dong jŭ yap, čih pơkra jơlan hơdră či duh ba lŏn tơnah, sang dŏ, pơsit prăk či brơi nao, ruah mă hơdôm boh sang anŏ ngă gru, ba jơlan, laih anun man pơdong sang dŏ amăng plơi phrâo. Truh kơnôl 31/12/2026, să gir ngă giong bruă duh prăk ƀơi anih dŏ hơđăp kơ neh met wa, brơi prăk djru tui hăng tơlơi pơtrun ƀơi anih dŏ phrâo, pơhlom ngă bruă djơ̆ hăng bruă kiăng ngă năng blung”.

Sa boh sang phrâo kjăp hloh ƀu kơnong jing anih dŏ hơđong pơgang hơjan kơthel đôč ôh, ăt jing anih kơnang kjăp kiăng neh met wa hơđong tơlơi ƀong huă hơdip mơda. Tơlơi pơtrun mơ̆ng Ping gah djơ̆ hrŏm hăng pran jua ană plơi, pran jua ngă bruă hơdeč hmar “Bruă mă Quang Trung” glăk pơjing hơdôm kual ia dăo mlĕp hŭi rơhyưt jing anih dŏ phrâo trơi pơđao, yâo mơak hloh./.