Mơ̆ng blan 7 truh blan 10 rim thun, boh sầu riêng mơ̆ng kual Dap Kơdư hlăk amăng bơyan pĕ sĭ lu, pơjing rai pran kơtang ba nao sĭ mơdrô boh troh, añăm pơtam. Tui hăng ơi Nguyễn Văn Mười, Khua anom bruă wai lăng sang bruă gah Dơnung, Khul ngă hmua đang ƀơi Việt Nam, 7 blan akŏ thun 2026, sĭ mơdrô añăm pơtam boh troh đĭ tui năng ai 43% pơkă hăng tal anai thun hlâo. Kơnong boh sầu riêng blan 7 hơmâo ba glăi rơbêh1 klai USD.

Khă hnun, gah klôn kơ mrô rơnoh pơđĭ kyar anun, jing sa tơlơi jŭ yap pơmin nao rai tong ten biă mă: ngă hiư̆m pă djă pioh anih anom sĭ mơdrô, dêh čar tač rơngiao blơi gơnam tam boh troh đang hmua ta ngă djơ̆ tơlơi pơkă, anŏ arăng kiăng, laih anun tơlơi pơhno jai hrơi kơtang. Hăng boh sầu riêng, dêh čar Khač blơi truh 90% laih. Lơ̆m anun, Thai Lan, hơmâo dơ̆ng dêh čar Philippines, Kur, Malaysia hăng Lao ba sĭ boh sầu riêng gơñu pơ anih blơi anai mơ̆n. Kiăng djă hnơ̆ng bruă sĭ mơdrô, pơhlom abih blơi hơđong nao, tui hăng ơi Nguyễn Văn Mười, khom đing nao lu hloh kơ boh tŭ yua pơhrua nao kơ bruă pok prong anih anom sĭ mơdrô ƀudah đơ đam pla pơjing:

“Lơ̆m bơyan pĕ boh hlăk truh laih, bruă ba hyu sĭ mơdrô amra bưp lu tơlơi tơnap tap. Tơlơi pơmin khom jŭ yap glăi lĕ ngă hiư̆m pă pơsir hĭ đơ đam hmua pla pơjing, boh pĕ pơhrui hlăk hơmâo ră anai, kiăng blơi abih mơ̆ng mơnuih ngă hmua sĭ glăi. Kiăng dưi ngă djŏ tơlơi anun, khom hơmâo sa ruăi ngă hrŏm pơgang rơnoh sĭ mơdrô hơđong. Khul ngă bruă sĭ mơdrô pơgang anih blơi, bruă pơkra ming hăng răk pioh djơ̆ tơhnal, bơ mơnuih ƀôn sang ngă hmua khom pơhlom boh tŭ yua klă hloh. Ngă hnun kah, dưi pơhno hăng hơdôm dêh čar hơmâo gơnam sĭ mơdrô hrup hăng ta”.

Mơ̆ng tơlơi ră ruai kơ boh durian, sầu riêng, sa tơlơi kiăng pơkŏn dơ̆ng ăt pơƀuh brơi: ƀu kiăo tui mrô rơnoh lu ôh, khom pơkra ming djơ̆ anŏ kiăng mơ̆ng anih blơi. Việt Nam ră anai, hơmâo lu mơta añăm pơtam, boh troh dưi ba sĭ pơ tač rơngiao, kah hăng pơtơi, boh pơ-ô̆ yuan, boh vải, boh mit, boh kruăi dŭng….sa ruăi gơnam ƀu ngă djơ̆ tơhnal pơkă rơgoh lĕ, bơbeč djơ̆ kơ kơnuih sĭ mơdrô kơ abih bang anih ngă hmua pla pơjing mơtam, ƀơi anŏ bơbeč truh tơlơi pơhing či pơkong pioh anih anom sĭ mơdrô.

Ơi Nguyễn Đình Tùng, Khua gơnong bruă Vina T&T Group-Kơ-iăng khua Khul pla añăm pơtam hơbơi pơtơi Việt Nam lăi lĕ, sang bruă mơdrô hăng mơnuih ngă hmua pla pơjing, khom pơtong rơđah tơlơi či kiăng mơ̆ng anih anom sĭ mơdrô či blơi mơ̆ng blung mơtam.

“Rim anih sĭ mơdrô hơmâo tơlơi kiăng phara soh. Bơmhutu, dêh čar Mi pơtrun ƀu dưi ba yua 7 mơta ia jrao mơ̆ gơñu kŏm, lơ̆m anun kual EU hơmâo truh 36 mơta ia jrao kŏm. Bơ dêh čar Khač le didng nao kơ tơlơi cadimi đôč. Yua kơ anun, kiăng ba nao sĭ pơ anih blơi pơpă, blung hlâo ƀing ta khom ngă djơ̆ tơhnal pơkă tui anŏ arăng či kiăng pơ anunm hlâo. Yak tal dua lĕ, sit mut nao amăng anih anom sĭ mơdrô laih, gơnam sĭ mơdrô khom ngă djơ̆ rơnoh pơkă rơgoh hơdjă. Klâo dơ̆ng lĕ, akŏ pơjing čih anăn gơnam sĭ mơdrô tong ten ba sĭ mơdrô klă hloh. Hơmâo djop 3 mơta anŏ gêh găl anun, bruă ĕp anih sĭ mơdrô añăm pơtam hơbơi pơtơi, boh troh đang hmua mơ̆ng tŭ yua sit nik hăng pơđĭ kyar hơđong”.