Nao ngă lơphet, khua dêh čar ơi Lê Minh Hưng lăng yôm hăng pơpŭ ƀing mơnuih hơmâo găn rơgao 80 thun, 75 thun hăng 70 thun dong amăng khul Ping gah. Khua dêh čar pơsit tong anai ƀu djơ̆ kơnong lĕ tơlơi kơđŏm glăi hrơi blan mut Ping gah đôč ôh mơ̆ ăt lĕ hrơi blan pơhrăm pô, tuh rơyuh pran jua hăng akĕ phĭ tui Ping gah, tui kơnuk kơna hăng mơnuih ƀôn sang. Khua dêh čar brơi thâo, hrơi akŏ pơjing Kơnuk kơna kơnôl 2/9 lĕ hrơi blan yôm phăn mơng djuai ania ta; anai lĕ hrơi pơ-ư ang lăng glăi 81 thun rơngai, ngă pô, pơlir lŏn ia jing sa, pơjing, pơđĭ kyar lŏn ia hăng boh than hing ang mơng bruă ngă hơkrŭ rơbêh 96 thun tui tơlơi git gai mơng Ping gah.

Hluai tui hrơi blan anun kơđŏm glăi bruă tuh drah pơčah asar, tuh rơyuh pran jua mơng djop rơnuk mơnuih Việt Nam, sit biă ñu lĕ ƀing mơnuih Ping gah-ƀing mơnuih pơplih tơlơi pơmĭn tui bruă ngă hơkrŭ, tui Ping gah amăng hơdôm thun blan lŏn ia ta dŏ lu tơnap tap. Khua dêh čar čang rơmang ƀing mơnuih Ping gah hăng tơlơi găn rơgao, tơlơi thâo thăi hăng pran đăo gơnang mơng gơñu pô, tŏ tui đing nao, pơgôp boh pơhiăp pơjing Ping gah, pơjing gong gai; pơtô pơjuăt, juh alum ană tơčô; pơtô glăi rơnuk hlăk ai khăp kơ lŏn ia ta, ngă bruă khin hơtai, gơgrong, hơmâo tơlơi glăm ba hăng mơnuih mơnam hăng hrưn đĭ pơjing Ping gah, lŏn ia pơdrông sah.