Hơdôm thun rơgao, yŭ kơ tơlơi git gai mơ̆ng Ping gah, wai lăng mơ̆ng Kơnuk kơna hăng abih bang mơnuih mơnam gum djru, bruă djru tơlơi hơdip mơda mơnuih ƀôn sang hơmâo lu bruă dưi ngă prong, truh ră anai dêh čar ta hơmâo rơbêh 99 klăk čô mơnuih hơmâo hră pơhlom nua ia jrao; năng ai 2,5 klăk čô hơmâo prăk pơdơi thun tha, pok prong bruă pơgang ba tơlơi hơdip ƀing tha ƀu hơmâo prăk blan. Hơdră djru hrŏ trun ƀun rin, brơi čan prăk, sang dŏ, pơtô hrăm, ia jrao, bruă mă laih anun djru bong glăi tơlơi truh lŏn adai ngă jing anŏ kơnang mơ̆ng hơdôm klăk boh sang anŏ.

Khua ping gah, Khua mir sir ơi Tô Lâm lăi, bruă djru hơđong tơlơi hơdip mơda hơmâo lu boh than prong. Khă hnun, tơlơi truh lŏn adai ngă, klin kheng, tơlơi pơplih phrâo mơ̆ng anih ruah mơnuih mă bruă ăt glăk ba truh tơlơi ƀu mơak prong mơn, rơnuk phrâo arăng ngă bruă hăng măi mok, ia rơgơi soh, anun jing ƀu anăm kiăo hmao. Kiăng pơgang ba mơnuih ƀôn sang ƀơi anăp tơlơi rung răng, Kơnuk kơna khŏm hơmâo jơlan ngă bruă lăp djơ̆, măi mok khŏm dưi đao lăng hlâo,  pơgang hăng djru ba hmao kru. Khua ping gah, Khua mir sir kiăng čih pơkra mrô rơnoh dêh čar kơ bruă hơđong tơlơi hơdip mơda mơnuih tơpuôl, lăi pơthâo rim thun tui rim boh tơring hăng rim khul plơi pla. Gir trun pơ thun 2030 hơmâo anih wai lăng tơlơi hơdip mơda lu gưl, abih bang, ngă bruă hăng boh thâo mrô, pơhlom ba tơlơi hơdip mơda đoi đom khŏm hơmâo kơ mơnuih ƀôn sang. Khua ping gah, Khua mir sir kiăng Kơnuk kơna, Khua mua pơ ala mơnuih ƀôn sang dêh čar, Jơnum min djŏp djuai ania mơnuih mơnam Việt Nam, djŏp ping gah, gong gai hăng abih bang mơnuih tơpuôl gum djru, gir kơtir, kiăng rim čô mơnuih Việt Nam, mah dŏ pơpă, sang anŏ hiưm pă, leng kơ hơmâo pơgang ba ƀơi anăp tơlơi truh prong, hơmâo djru ba ia jrao hăng hơmâo djŏp anŏ găl či đĭ kyar./.