Tơdơi kơ 1 thun ngă tui Hră pơtrun 57 mơ̆ng Ding jum kơđi čar, amăng bruă kơsem min boh thâo ia rơgơi, pơblih pơčeh phrâo hăng ba yua ia rơgơi mrô hơmâo ba glăi lu boh tơhnal tŭ yua yom blung a, samơ̆ bruă ngă kiăng pơgiong hĭ tơlơi phiăn pơkă, sang bruă kơnuk kơna git gai wai lăng, pơčrâo bruă mơ̆ng Gơnong dlông trun pơ tơring čar, plơi pla khom nao hrŏm tŭ yua.

Pơblih yua ia rơgơi mrô ƀơi dêh čar ta hmar biă mă hăng lu boh tơhnal ƀuh rơđah rơđong ƀơi rŏng lŏn tơnah: mrô ba yua hrĕ dăng kông, ia rơgơi mrô dăp tal 67, internet kơtang dong tal 18, Kơnuk kơna mă bruă hăng điện tử dăp tal 71….Biă mă ñu anih pơkra pơblih yua mrô thâo pơčeh phrâo mơ̆ng Việt Nam dăp tal 44 ƀơi rŏng lŏn tơnah. Abih bang amăng dêh čar hơmâo năng ai 4000 boh sang bruă mơdrô pơphun bruă mă thâo pơčeh phrâo. Ƀơi mông jơnum, Khua git gai ping gah ơi Tô Lâm lăi pơtong, tơlơi gơgrong yom mơ̆ng bruă ngă atur hăng aliăng kơ boh thâo ia rơgơi phrâo, pơblih pơčeh phrâo hăng ba yua mrô. Anai lĕ, tơlơi pơtrun hiăp khom ngă kiăng pơđĭ hmar hăng kơjăp amăng dêh čar ta amăng hơdôm thun pơ anăp. Khua git gai ping gah lăi pơthâo 7 mơta bruă mă pơ anăp laih anun ăt jing boh yom phun kah hăng tơlơi pơmin kiăng git gai djop ding jum, anom bruă lăi pơthâo sit nik, ngă tui; amăng anun pơtong rơđah thun 2026 lĕ “Bruă ngă kơtang hloh, bang bơngač tŭ yua”.