Mơguah ƀơi ƀut plơi 1, să Krông Ana. Ƀơi yŭ sang pla bơmai prong hơdôm hơpluh met, ayong Dương Huỳnh Linh glăk hrŏm hăng bơnai ñu kor adrăng, dưm pơđăm pơjeh bơmao pioh pla phrâo dong. Asăp ƀâo mơng adrăng pla bơmao por hyu jum dar. Ayong Linh hơmâo ngă bruă pla bơmao adrăng 14 thun laih, mơng hơdôm sang pla đơđet blung a, ră anai hơbô̆ bruă mơng ayong Linh ƀu djơ̆ kơnong ba glăi pơhrui hơđong đôč ôh mơ̆ ăt ĕp brơi bruă mă rĭm rĭm brơi hơdôm hơpluh čô mơnuih amăng ƀon lan. Tơlơi bơră ruai lăi nao bruă pơphun bơwih ƀong mơng ñu ngă pơsur lu sang anŏ pơplih tơlơi pơmĭn-ruah bruă ngă hmua hơdjă, plai ƀiă sat răm mơ̆ ba glăi boh tŭ yua prong.

“Abih bang mơnuih mơng dua bơnah sang anŏ lêng bơwih ƀong đĭ đăi mơng bruă pla bơmao. Hlâo anun sang anŏ ƀun rin samơ̆ mơng hrơi pla bơmao, ră anai tơlơi hơdip jơnap tui yơh”.

Ăt amăng kual lŏn anun, rơnuk hlăk ai glăk tŏ tui hăng bruă ngă phara mơng ƀing gơñu, anun lĕ mă yua boh thâo măi mok phrâo. Hăng ayong Huỳnh Đức Cường, 30 thun, hlâo anun hrăm sang hră gưl prong boh thâo măi mok ƀơi ƀôn prong Hồ Chí Minh, bruă pla bơmao ƀu djơ̆ kơnong lĕ ba glăi prăk pơhrui đôč ôh mơ̆ ăt lĕ hơbô̆ bruă ngă hmua rô nao rai rơgơi, wai pơgang jum dar rah, hrưn đĭ rơnoh yôm gơnam ngă hmua ƀơi ƀon lan.

“Bruă anai ba glăi bruă mă kơ neh met wa amăng să, dua dong lĕ ba glăi lu prăk pơhrui. Pơhmutu kơnong sang anŏ gơmơi hơmâo 10 boh sang pla, ha blan pơhrui lơm duh hĭ prăk tuh pơ alin lĕ mơng 20-30 klăk prăk, samơ̆ ăt tui hluai nua sĭ dong. Kâo ƀuh amra pơhrui lu dong kơñ pơgi, anai lĕ mă yua tŏ tui, mơng adrăng ƀing ta ba glăi pla bơmao, tơdơi anun ta yua pruai brơi kơphê, tiu, sầu riêng, ăt ngă hiam brơi phun pla mơn”.

Tui jŭ yap mơng ƀôn lan, mơng hơdôm boh sang anŏ ngă lông lăng, truh ră anai đơ đam să Krông Ana hơmâo rơbêh 1.000 sang pla bơmao, pla amăng ha thun mơtăm, djru brơi bruă mă kơ rơbêh 2.000 čô mơnuih mă bruă. Ƀu djơ̆ kơnong djru brơi mơnuih ƀôn sang hơđong prăk pơhrui, bruă pla bơmao ăt djru ƀiă ƀuh arăng čuh lui adrăng, wai pơgang jum dar hăng mă yua klă djah djâo mơng đang hmua. Ơi Huỳnh Đức Phúc, khua khul mơnuih ngă hmua hơđăp să, brơi thâo:

“Tơlơi gal ƀơi anai lĕ kual ngă hmua pơdai ƀơi Krông Ana prong, yua mơng kual lŏn ngă hmua pơdai anai, mơnuih ƀôn sang kah hơmâo adrăng laih anun hrăm tui bruă pla bơmao kiăng pơđĭ kyar. Rĭm boh sang anŏ ƀiă biă mă ñu 2 boh sang pla bơmao, đa hơmâo 10 boh, 20 boh. Neh met wa ngă hmua đăo gơnang nao kơ bruă pla bơmao anai. Tal sa lĕ ngă hmua hơdjă, dua dong lĕ pơhrui hơđong brơi neh met wa”.

Mơng hơdôm ƀut adrăng tơdơi kơ yuă pơdai, mơnuih ƀôn sang Krông Ana, tơring čar Dak Lak pơjing rai jơlan gah nao hơđong kjăp; pơjing djah djâo jing gơnam bơwih ƀong; pơjing bruă ngă hmua hơdăp jing hơbô̆ bruă bơwih ƀong mơtah./.