Tui hăng tơlơi lăi pơthâo mơ̆ng Jơnum min ruah khua tơring čar Dak Lăk, tơring čar hơmâo giăm 2,3 klăk čô mơnuih nao plĕ hră. Yap truh 7 mông mơmot, lơ 15/3, mrô mơnuih nao plĕ hră rơbêh kơ 99,9%. Lăp đing nao, hơmâo lu să, phương, hơmâo 100% mrô mơnuih nao plĕ hră. Tơlơi anai brơi ƀuh, pran jua thâo pơmin gơgrong bruă, tơlơi tŭ ư hrŏm hăng tơlơi thâo hluh bruă čar prong biă mơ̆ng mơnuih ƀôn sang amăng tơring.

Tui hăng Jơnum min ruah khua tơring čar Dak Lăk, mah mơnuih nao plĕ hră lu biă, samơ̆ hơdôm bit anih ăt răng kơđiăng mơn, pok pơhai abih bang pơhlom rơnuk rơnua, hơđong ƀơi hơdôm anih plĕ hră. Tơhan kông an, ƀô̆ đô̆i hăng mơnuih apăn bruă anai ăt hyu tir, sem lăng, thâo djŏp tơlơi hơmâo amăng plơi pla, prăp rơmet pơgang hlâo djŏp tơlơi truh tơdah hơmâo, pơhlom brơi bruă plĕ hră rơnuk rơnua khŏp.