Ayong Trần Hải Đăng, Khua Anung prăk XL02, Rơwang bruă Vũng Áng - Bùng, rơwang bruă găn tơring čar Quảng Bình brơi thâo: Ră anai anom iâo pơhrui năng ai ñu 800 čô mơnuih mă bruă pơkra jơlan hrơi mlăm, găn rơgao Tết pioh pơhlôm rơnoh rơwang bruă:

“Ring bruă bơngač apui na nao, hơneč mă ayuh hyiăng klă, ƀing gơmơi pơpha 3 ka mă bruă na nao, bruă mă hrơi mlăm. Ƀơi hơdôm anih phun man pơkra “akô̆ tlôn jơlan” mơ̆ng rơwang bruă kah hăng klơi bư̆, atur, rŏng jơlan, ƀing gơmơi pơpha jing hơdôm glông jơlan pơkra na nao. Tal Tết glăi hăng sang anô̆ lĕ mơ-ak biă, samơ̆ yua kơ bruă mă hrŏm, ƀing gơmơi dô̆ glăi ƀơi ring bruă, djru hrŏm pran pô, gir run ngă giong hơdôm ring bruă rơwang bruă phun mơ̆ng lŏn ia...”.

Ƀudah ƀơi hơdôm ring bruă rơwang bruă pơkon ƀơi glông jơlan đuăi hmar Kơdư – Dơnung dêh čar, hơdôm bôh anom man pơkra jơlan glăk tañ pơhun črăn bơkơtưn “ngă tañ”, đĭ rơnoh truh akô̆ tañ, djru ngă truh kih tơhnal pơkă 3.000 km jơlan đuăi hmar tui tơlơi rơkâo mơ̆ng Khua dêh čar. Pran jua bơkơtưn anai dưi hmâo ling tơhan Binh đoàn 12 pơtrut đĭ rơnoh pok pơhai, hăng pran jua pơsit prong, kah hăng tơlơi lăi pơthâo mơ̆ng Đại tá Nguyễn Tuấn Anh, Kơ-iăng Khua git gai Binh đoàn 12, Kơ-iăng Khua Phun akha sang bruă man pơdŏng Trường Sơn:

“Bruă man pơkra jơlan đuăi hmar, ƀing gơmơi đing nao biă ñu tơlơi măi mok man pơkra ƀơi anih lŏn tơdu. Khom glung nao rai giong anun kah mơ̆ng pơphun hơdôm yak tô̆ tui. Kiăng pơhlôm rơnoh bruă, ƀing gơmơi iâo pơhrui mơnuih mă yua măi mok djop, mơ̆ng anun iâo pơhrui amăng tal kiăng ngă tui prong anai đing nao mơnuih mă bruă pioh man pơkra jơlan, pơhlôm rah rơnoh bruă hăng anô̆ kơjăp rơwang bruă jơlan đuăi hmar”.

Thun 2025 anai, ƀôn prong Hồ Chí Minh ăt pok pơhai mơn lu rơwang bruă jơlan nao rai yôm phăn, amăng aun hmâo sa dua rơwang bruă jơlan đuăi hmar, tô nao rai hăng hơdôm glông jơlan ƀơi ƀôn prong. Ơi Bùi Xuân Cường, Kơ-iăng Khua Jơnum min mơnuih ƀôn sang ƀôn prong Hồ Chí Minh, brơi thâo, anăp nao tal bơkơtưn prong 500 hrơi mlăm pơkra giong hơdôm rơwang bruă ring bruă, amra đing nao man pơkra hơdôm ring bruă, rơwang bruă phun hăng pran jua hăng pran pơsit prong tô nao rai hơdôm rơwang bruă jơlan đuăi hmar hăng hơdôm ring bruă rơwang bruă jơlan nao rai yôm phăn, djru pơtrut pơđĭ kyar bơwih ƀong – mơnuih mơnam mơ̆ng ƀôn prong Hồ Chí Minh hăng đơ đam kual Dơnung dêh čar:

“Hlâo kơ Tết tui phiăn juăt amra hmâo năng ai ñu 10 ring bruă pok pơhai dong. Hrŏm hăng anun guai 3, hluai tui pran jua pok phun bơkơtưn mơ̆ng Khua dêh čar lĕ, đing nao man pơkra tañ amăng thun 2025, kiăng ba mut mă yua črăn gah dlông ataih 15km, tô nao rai hăng jơlan đuăi hmar ƀôn prong Hồ Chí Minh – Long Thành – Giầu Dây tô hăng Tơdrun dŭ pơgiăng gơnam gah rơdron rơdêh por jar kơmar Long Thành. Ngă tui pran jua bơkơtưn, djă pioh rơnoh hơdôm ring bruă pơhlôm rơnoh ngă tui amăng thun 2025 pioh pok pơhai hơdôm rơwang bruă jơlan nao rai pơhlôm rơnoh bruă. Hrŏm hăng anun, amra đing nao pok pơhai hơdôm ring bruă phrâo kah hăng anih anom pơgiăng găn rơgao jar kơmar Cần Giờ”.

Hrŏm hăng hơdôm hrơi akô̆ thun anai, Khua Ding jum jơlan nao rai dŭ pơgiăng Trần Hồng Minh nao pel ĕp, čuă sa dua ring bruă ƀơi jơlan đuăi hmar Kơdư – Dơnung dêh čar. Phrâo anai, ƀơi 2 rơwang bruă jơlan đuăi hmar Vũng Áng – Bùng hăng Bùng – Vạn Ninh, črăn găn tơring čar Quảng Bình hmâo rơkâo ƀing gơgrong tuh pơplai, ƀing gơgrong man pơkra rơwang bruă, kiăng pơhlôm rơnoh bruă rơwang bruă, Grŭp hmâo rơkâo pô gơgrong man pơkra pơhrua nao mơnuih mă bruă măi mok, đĭ mông, đĭ kíp, mă bruă wot amăng hrơi Tết pioh pơhlôm rơnoh bruă ba tơbiă. Truh mông anai, mrô bruă hmâo laih 70%, pơkă hlâo amra giong djơ̆ tal 30/4/2025.

Bơdjơ̆ nao tơlơi pơsir anih anom mă lŏn man pơkra, ơi Trần Phong, Khua Jơnum min mơnuih ƀôn sang tơring čar Quảng Bình brơi thâo, truh ră anai, tơring čar hmâo jao laih lŏn hơdjă kơ hơdôm bôh anom man pơkra. Khă hnun hai, ră anai rơwang bruă găn tơring čar ăt dô̆ mơn năng ai ñu 40 bôh sang anô̆ mơnuih ƀôn sang čang rơmang dưi rit nao pơ̆ anih dô̆ phrâo. Gah tơlơi anai, Khua Ding jum ơi Trần Hồng Minh brơi thâo, anai lĕ tơlơi čang rơmang lăp djơ̆, khom hmâo hrơi blan hăng jơlan gah pơtlaih. Ƀơi anăp Ding jum hăng ƀing gơgrong man pơkra amra đing nao pioh man pơkra ngă giong hăng lu gah jơlan phun djơ̆ tal lơ 30/4/2025. Biă ñu, thun 2025 hăng bruă ba lu ring bruă rơwang bruă phun bruă dŭ pơgiăng jơlan nao rai pơphun mă yua, hrŏm hăng anun pơkra giong tơhnal pơkă 3.000 km jơlan đuăi hmar lĕ bruă jao khom hmâo tơlơi đing nao prong pơkra giong. Khua Ding jum wai lăng jơlan nao rai dŭ pơgiăng Trần Hồng Minh, pơkôl:

“Lu tơlơi gun, tơlơi tơnap dưi đing nao pơtlaih kah hăng pơsir anih anom mă yua, gơnam man pơkra, djru kơ rơwang bruă, biă ñu gah kual Dơnung. Truh ră anai, rơnoh hơdôm rơwang bruă phun pơhlôm. Sa dua rơwang bruă jơlan đuăi hmar Kơdư – Dơnung dêh čar kah hăng jơlan đuăi hmar Quảng Ngãi – Khánh Hòa pơkă hlâo amra hloh kơ kơčăo bruă 3-6 blan. Ding jum amra kơtưn gum hrŏm hơbit, pơhlôm ngă klă hơdôm bruă jao thun 2025”.

Lăi pơthâo abih pran jua črâo ba mơ̆ng Khua dêh čar: “Tơnap pơ̆ hơpă pơtlaih pơ̆ anun” hăng “Ƀu lăi ƀu hmâo, ƀu lăi tơnap”, Ding jum wai lăng jơlan nao rai dŭ pơgiăng gơgrong hlâo gum hrŏm hăng hơdôm ding jum, gơnong bruă bơdjơ̆ nao pơjing grŭp hyu mă bruă hăng hơdôm anih anom pok pơhai hơdôm jơlan pơsir, djru mơnuih gơgrong man pơdŏng pơtlaih anô̆ tơnap gơnam man pơdŏng, rơnoh ba hơdôm rơwang bruă jơlan nao rai truh akô̆, grum hrŏm pơplih phrâo tơhnal pơkă 3.000 km jơlan đuăi hmar amăng thun 2025 anai djơ̆ kah hăng kơčăo bruă ba tơbiă, djru pơtrut pơđĭ kyar bơwih ƀong lŏn ia amăng rơwang phrâo./.