Amăng 7 blan rơgao, tơring čar Khánh Hòa čơkă rơbêh 15 klăk wŏt tuai čuă ngui, đĭ giăm 39% pơhmu tui tơđar thun 2025, amăng anun tuai mơng tač rơngiao giăm 5,5 klăk wŏt hăng abih tih prăk pơhrui rơbêh 82.000 klai prăk. Kơnong amăng blan 7, Festival ia rơsĭ Khánh Hòa 2026 hăng anăn “Ia iom ia rơsĭ-Hrưn tơbiă jar kmar” jing tơlơi pơtrut prong lơm pơhưč giăm 790 rơbâo wŏt tuai čuă ngui amăng 3 hrơi pơphun ngui ngor, ba glăi rơbêh 1.300 klai prăk. Pô pơ ala gơnong bruă gru grua, bơrơguăt drơi jăn hăng tuai čuă ngui tơring čar brơi thâo pơ anăp anai tơring čar amra pok jơlan por tơpă Đồng Hới-Cam Ranh, pơtrut kơtang bruă pơhưč tuai mơng dêh čar Khač, pơtô hrăm tơlơi Nga brơi mơnuih mă bruă, pơgiong hơdră bruă tuai čuă ngui amăng plơi pla hăng pơgiong hră pơ-ar tŭ yap kual bơwih brơi tuai dêh čar kual kơdư bul pơtâo Cam Ranh kiăng anăp nao pơđĭ kyar hơđong kjăp.

Mơ̆ng akŏ thun truh kơ ră anai, tơring čar Dak Lăk hơmâo čơkă năng ai 5,3 klăk wơ̆t tuai hyu ngui, đĭ 37% pơhmu hăng thun hlâo, laih anun pơhrui hơmâo rơbêh 9.600 klai prăk. Kiăng dưi čơkă 10 klăk wơ̆t tuai amăng thun anai, Khul git gai đĭ kyar čơkă tuai hyu ngui tơring čar tŭ ư pơƀut čih pơgiong akŏ bruă đĭ kyar čơkă tuai hyu ngui rơwang thun 2026-2030, pơjing anăn hmư̆ hing, amuñ thâo krăn, pơkra gơnam OCOP pơlir hăng bơwih brơi tuai hyu ngui laih anun pơtrut ba yua ia rơgơi mrô. Khua jơnum min mơnuih ƀôn sang tơring čar  kiăng hơdôm anom bruă pơtruh sĭ mơdrô hăng čơkă tuai, đĭ kyar bruă ba tuai hyu čuă lăng đang hmua, plơi pla hăng pơsir brơi anŏ tơnap kơ hơdôm kơčăo bruă. Biă ñu, anom bruă gru grua kiăng lăi pơthâo brơi pơjing anih nao ngu, hơmâo anŏ bơwih brơi kơ ƀing tuai phrâo hloh, phara hloh ƀơi hơdôm bit anih kah hăng Ea Kao, Tuy Hòa, Lăk đah mơ̆ng hơmâo anŏ phara hăng pơhưč tuai hyu ngui amăng thun 2027.