Tơlơi hơmâo sit nik ƀơi kual Dơnung Dap Kơdư brơi ƀuh, tơlơi phiăn pơkă, jơlan hơdră pơtrun mah hơmâo lu tơlơi pơblih klă ƀiă laih samơ̆ ăt dŏ lu tơlơi gun kiăng tañ pơsir hĭ. Khua mua pơ ala jơnum min mơnuih ƀôn sang tơring čar Lâm Đồng rơkâo đĭ gơnong dlông ăt ngă pơgiong tañ tơlơi phiăn pơkă tui anăp ngă sa hnơ̆ng, bơtŭ ư mơ̆ng dlông trun pơyŭ; ngă ƀiă hloh hrơi mông pơkă pơsir hră pơar; ngă amuñ hloh pơkă bruă duh glăi lŏn kơnuk kơna pơhrui glăi hăng mă glăi lŏn hơmâo hrơi pơkă. Laih dơ̆ng, tơring čar čang rơmang tañ pơsir hĭ tơlơi gun akŏ bruă apui yua, dăng hrĕ apui, kông ngăn kơnuk kơna kiăng pơsir hĭ mơnuih mă bruă, kông ngăn  aka pơsir tañ iâu pơhưč bruă tuh pơ alin.

Hrŏm hăng anun, Khua mua Jơnum min djop djuai ania mơnuih mơnam Việt Nam tơring čar rơkâo ngă pơgiong hră pơtrun krăp lăng, drơ̆ng glăi mơ̆ng mơnuih mơnam, pơblang tong ten bruă glăm ba mơ̆ng djop sang bruă kơnuk kơna čih pioh, lăi pơthâo hăng ngă tui tơlơi pơtrun giong nao ĕp lăng. Khua mua pơ ala djop gơnong bruă, anom bruă ăt hơmâo lu tơlơi pơgôp hiăp lăp pran jua kơ 15 mơta tơlơi phiăn hăng 4 mơta hră pơtrun, biă mă ñu pơtum nao kơ hơdrôm hră tơlơi phiăn lŏn mơnai čih pơhrua glăi, Tơlơi phiăn sang dŏ čih pơhrua glăi, Tơlơi phiăn sĭ mơdrô lŏn mơnai, gơnam prong ƀu thâo ba hyu čih pơhrua glăi, Tơlơi phiăn phat kơđi tơlơi soh jing Luật Hình sự čih pơhrua ƀudah hơdôm tơlơi phiăn gah bruă ling tơhan, pơgang lŏn ia….

Klah čun glăi rơnoh yom tơlơi rơkâo, Y Thanh Hà Niê Kdăm, ding kơna apăn bruă ping gah dêh čar, Khua git gai ping gah, Khua grup pơ ala mơnuih ƀôn sang dêh čar ƀơi tơring čar Lâm Đồng lăi pơtong:

“Lu tơlơi pơgôp hiăp mơ̆ng khua mua ƀơi tơring čar hăng ƀing pơ ala mơnuih ƀôn sang jing tơlơi kiăng yom biă mă, rơđah rơđong, tum teč, hơmâo kơnôl biă mă mơ̆n kiăng kơ grup pơ ala mơnuih ƀôn sang dêh čar mơ̆ng tơring čar ba pơdah thâo rơkâo đĭ amăng mông jơnum prong ƀu tui tơđar lok sa, pơgôp hrŏm ngă giong djop jơlan hơdră mơ̆ng Gơnong dlông. Hăng tơlơi pơgôp hiăp, tơlơi rơkâo dưi lăi pơthâo ƀơi mông mă bruă hơmâo ruah khua hơdôm mơta tơlơi phun yom, djơ̆ găl pioh bơkơtuai amăng mông jơnum amăng grup hăng amăng sang jơnum prong, laih anun mơ-it kơ djop sang bruă gah anom bruă khua pơ ala mơnuih ƀôn sang dêh čar, kơnuk kơna, khua dêh čar hăng djop ding jum, anom bruă ƀơi gơnong dlông sem glăi djơ̆ tui hăng tơlơi dưi pioh pơsir”.

Bruă khua mua pơ ala mơnuih ƀôn sang dêh čar pơphun jơnum ječ ameč ƀu tui tơđar tal anai, kiăng hmao pơsir hĭ hơdôm tơlơi ječ ameč pơdah rai pran jua mă bruă, tơlơi drơ̆ng glăi hmar yua kiăng pơtrut pơđĭ kyar hrŏm. Hơdôm tơlơi pơgôp hiăp tơpă, lăi djơ̆ tơlơi hơmâo sit nik ƀơi Lâm Đồng jing kah hăng gia pơkă anŏ tơpă hloh kơ bruă mă mơ̆ng pran jua kiăng “mơnuih ƀôn sang thâo, mơnuih ƀôn sang pơčrong, mơnuih ƀôn sang ngă, mơnuih ƀôn sang pô pel ĕp. Kiăng pơklaih brơi tơlơi gun gah lŏn mơnai, apui yua ia jâo hăng jơlan glông ƀu kơnong kơ tơlơi pơblang brơi đôč đač ôh, jing pran kơtang pơtrut Lâm Đồng djru hrŏm ngă pơblih hmar amăng kual Dap Kơdư thun blan pơ anăp adih.