Ƀơi Dak Lăk, hơdôm tơlơi pơgôp hiăp hơmâo: Tơlơi phiăn čih pơkra glăi, pơhrua tui hơdôm tơlơi hơmâo mơ̆ng Tơlơi phiăn gơgrong duh ba mơ̆ng Kơnuk kơna; Tơlơi phiăn čih pơkra, pơhrua tui hơdôm tơlơi mơ̆ng Tơlơi phiăn sang bruă prăk Kơnuk kơna Việt Nam, Tơlơi phiăn pơgang rao prăk (jing prăk bơwih ƀong ƀu tơpă) hăng Tơlơi phiăn Hơdôm anom bruă brơi čan prăk; Tơlơi phiăn čih pơkra, pơhrua tui hơdôm tơlơi mơ̆ng Tơlơi phiăn jao glăi boh thâo ia rơgơi, Tơlơi phiăn dăng kông, Tơlơi phiăn pơmut tơbiă prăk amăng điện tử, Tơlơi phiăn Tần số vô tuyến điện; hrŏm hăng dua tơlơi pơtrun mơ̆ng Khua mua pơ ala mơnuih ƀôn sang dêh čar kơ pơgang, pơkơdong mơnuih ngă soh hăng tơlơi pơkă, hơdră ngă bruă phara pơsir hĭ kơđi ngă soh tơlơi phiăn bơwih ƀong, pơčeh phrâo tơlơi rơgơi, ba yua ia rơgơi mrô. Ƀing khua pơ ala mơ̆ng tơring čar Dak Lăk rơkâo čih pơgiong hĭ lu tơlơi pơkă tơbiă mơ̆ng tơlơi hơmâo sit nik ră anai mơn.

Ƀơi Lâm Đồng, khua mua pơ ala djop gơnong bruă, anom bruă pơgôp hrŏm 8 mơta tơlơi pơhiăp hăng 15 mơta tơlơi phiăn, 4 mơta hră pơtrun pơkă amăng tơlơi phiăn dêh čar, amăng anun pơgôp hiăp lu hloh kơ tơlơi Phiăn lŏn mơnai čih pơhrua glăi, Tơlơi phiăn sang dŏ čih pơhrua glăi; Tơlơi phiăn sĭ mơdrô lŏn mơnai gơnam yua ƀu thâo pơdŭ đuăi, tơlơi phiăn phat kơđi tơlơi soh sat Hình sự čih pơhrua glăi, pơhrua kơ lu mơta tơlơi ƀơi 9 mơta tơlơi phiăn gah ling tơhan, bruă pơgang lŏn ia….

Lu tơlơi rơkâo pơdjơ̆ nao bruă kiăng amăng tơring čar. Grup khua mua pơ ala mơnuih ƀôn sang tơring čar Lâm Đồng hơmâo čih pioh, ruah mă, pơƀut glăi abih bang tơlơi pơgôp hiăp kiăng ba pơdah thâo amăng mông jơnum ƀu tui tơđar lok Sa, mơ̆ng ƀing khua mua pơ ala mơnuih ƀôn sang dêh čar tal XVI.