Să Ea M’Droh hơmâo akŏ pơjing hluai tui bruă pơmut hrŏm tlâo boh să Ea M”Droh, Ea Mnang hăng Quảng Hiệp, amăng tơring glông Čư̆ M’gar hơđăp. Rơnuč thun 2025, să dŏ 202 boh sang anŏ ƀun rin, dưm dưm 2,67% mrô sang anŏ; laih dong, să ăt dŏ giăm 600 boh sang anŏ giăm ƀun rin kiăng tŏ tui djru ngă hơđong tơlơi hơdip mơda.

Amăng mông bưp bơkơtuai, lu sang anŏ lăi nao tơpă tơlơi tơnap tap, rơkâo djru brơi tơlơi bơwih ƀong huă, bruă mă hăng sang dŏ. Ơi Lê Tiến Dũng, dŏ amăng plơi Bình Hòa brơi thâo, tơdơi kơ ha thun hơmâo djru brơi rơmô samơ̆ rông aka ƀu ba glăi tŭ yua, ñu rơkâo pơplih hơdră djru brơi lăp djơ̆ hăng tơlơi găl amăng sang anŏ. “Thun hlâo sang anŏ gơmơi arăng djru brơi dua drơi rơmô samơ̆ rông ha thun laih aka ƀu tuh ôh, anun kâo rơkâo să pơplih hơdai nao rông sĭ ngă mơnong. Să hơmâo lăi glăi, amra djru brơi 4 drơi, hơmâo 2 drơi rơmô kơnô hăng ania, 2 drơi ană ƀe. Gong gai ăt đing nao djru brơi mơnuih ƀôn sang anun ngă gơmơi bơni biă.”

Hrŏm hăng tơlơi rơkâo djru bơwih ƀong huă, lu sang anŏ ƀun rin čang rơmang djru ĕp brơi bruă mă, man pơdong sang sir kjăp. Gong gai să Ea M’Droh tŭ mă tơlơi rơkâo, pơlăi nao rai hơdôm tơlơi čang rơmang mơng rĭm boh sang anŏ, mơng anun thâo tơlơi kiăng djru mơng rĭm boh sang anŏ.

Mơng akŏ thun 2025 truh ră anai, ngă tui hơdôm jơlan hơdră, akŏ bruă djru brơi tơlơi bơwih ƀong huă, tơlơi hơdip mơda, să Ea M’Droh hơmâo djru brơi hmao tlôn hơdôm boh sang anŏ ƀun rin. Amăng anun să hơmâo djru brơi 76 drơi rơmô ania kiăng 38 boh sang anŏ ƀun rin pơđĭ kyar bruă rông rơmô tuh hrôh. Samơ̆, tui sit nik pok pơhai brơi ƀuh kiăng djơ̆ hăng tơlơi găl rĭm boh sang anŏ kiăng pơplih bruă djru brơi lơm kiăng. Thun anai, să ba tơbiă hơnong pơkă hrŏ trun 93 boh sang anŏ ƀun rin, hăng bruă ngă tui hluai rin yua hơget hăng pran hrưn đĭ mơng rĭm boh sang anŏ hiưm ñu.

Ơi Trần Doãn Tới, Khua git gai Ping gah să Ea M’Droh brơi thâo, ƀon lan amra pok pơhai hơdôm hơdră phara, mơng djru brơi tơlơi bơwih ƀong huă truh ĕp brơi bruă mă hăng pơhlôm brơi tơlơi hơdip mơda: “Pơplih phiăn juăt ƀu klă hiam, črâo brơi mă yua boh thâo amăng pla pơjing, rông hlô brơi hơdôm boh sang anŏ ăt dŏ lu anŏ găl amăng bơwih ƀong ngă hmua. Hăng hơdôm boh sang anŏ mơ̆ hơmâo mơnuih mă bruă amăng sang anŏ amra ĕp brơi bruă mă, djru ba nao mă bruă pơ tač rơngiao hăng ĕp bruă amăng dêh čar. Hăng hơdôm boh sang anŏ ƀu hơmâo mơnuih mă bruă, ƀu anăm ngă hmua, gưl Ping gah, gong gai ƀon lan amra djru brơi tơlơi hơdip mơda hăng djru brơi sang dŏ, mơnong ƀong huă.”./.