Tŏ tui jơlan hơdră jơnum lok 10, hrơi anai, lơ 4/11, Khua mua pơ ala mơnuih ƀôn sang hmư̆ Hră lăi pơthâo hăng sem lăng Tơlơi phiăn man pơdong (čih pơkra glăi); tơlơi phiăn čih pơkra glăi, pơhrua tui hơdôm mơta tơlơi mơ̆ng Tơlơi phiăn lŏn hăng gơnam hơmâo amăng gŭ lŏn; Tơlơi phiăn čih pơkra glăi, pơhrua tui hơdôm tơlơi mơ̆ng hơdôm tơlơi phiăn ngă hmua hăng ayuh hyiăng, tơlơi phiăn wai lăng prăk jia (čih pơkra glăi); Tơlơi phiăn Prăk jia rim čô mơnuih (čih pơkra glăi); Tơlơi phiăn pơkrem, pơgăn prai prăk; tơlơi phiăn Ngă kơđi mơnuih ƀôn sang (čih pơkra glăi); Tơlơi phiăn sem lăng, pơčrang phun tơhnal kơđi ngă soh (čih pơkra glăi); Tơlơi phiăn čih pơkra glăi, pơhrua tui hơdôm tơlơi mơ̆ng Tơlơi phiăn pơgăn hưp ham ƀong kông ngăn. Tơdơi kơ anun, ƀing khua pơ ala pơčrông sai ƀơi Grup kơ Tơlơi phiăn mă pơkŏng, mă krư̆ jăng jai, hăng kŏm tơbiă mơ̆ng plơi pla; Tơlơi phiăn Ngă kơđi soh prong (čih pơkra glăi); Tơlơi phiăn čih pơkra glăi, pơhrua tui hơdôm tơlơi mơ̆ng Tơlơi phiăn sem lăng mơnuih anun hơmâo tơlơi soh hơget mơn. Tlam anai, ƀing khua pơ ala pơčrông sai ƀơi grup kơ Hră lăi pơthâo pơdah pơ Jơnum ruah khua ping gah đơ đam dêh čar tal 14.

Lơ 3.11, pơgôp hiăp Kơčăo bruă Tơlơi phiăn čih pơhrua glăi hơdôm mơta tơlơi amăng Hơdrôm hră tơlơi phiăn wai lăng hnưh bruă čar, ƀing pơ ala mơnuih ƀôn sang dêh čar rơkâo brơi jŭ yap glăi tong ten anŏ pơkă tơlơi gêh găl ngă amuñ hloh amăng bruă wai lăng rơnoh dong hnưh kơ bruă čar, pioh lŏn ia pơđĭ kyar; laih dơ̆ng ngă anŏ đăo kơnang brơi kơ ƀing ngă bruă mơdrô tuh pơ alin rai pơ Việt Nam hăng tơlơi đăo kơnang amăng mơnuih ƀôn sang.

Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, Tơlơi phiăn wai lăng hnưh bruă čar čih pơhrua tui tơlơi pơkă ber hloh amăng mông jơnum lok 10 anai khom giong, kiăng ngă tui bruă pơpha tơlơi dưl, gưl mă bruă sa hnơ̆ng hăng Tơlơi phiăn Ngăn drap kơnuk kơna, Tơlơi phiăn tuh pơ alin kơ bruă čar; pơtrut kơtang hloh pơblih ngă hră pơar kơnuk kơna, djru pơtrut hmar pok pơhai hơdôm kơčăo bruă hơmâo prăk dêh čar tač rơngiao tuh pơ alin. Boh nik ñu anŏ gêh găl ngă tui gong gai kơnuk kơna dua gưl; pơhlom tơlơi tơpă, rơđah rơđong, prăp hlâo, tŭ yua amăng bruă wai lăng rơnoh prăk dong hnưh kơ bruă čar.