Amăng rơwang mơ-ak mơng Tết blan prơmi, Kơ-iăng Khua mir sir dêh čar ta, yă Võ Thị Ánh Xuân hrŏm hăng Grŭp mơnuih hyu mă bruă hăng Khua tơring čar Dak Lak hmâo gum hrŏm hơdôm bruă mă; hyu čuă lăng, găn rơgao lăng hơdôm tơlơi ngui đưm, ngă apui kơđen dian, djă hyu apui, lăng suang ania grŭp hăng lăng hơdôm tơlơi adôh suang mlăm jơnum ngui blan prơmi. Tal anai, Kơ-iăng Khua mir sir dêh čar ta, yă Võ Thị Ánh Xuân hmâo ƀơk laih 270 anung prăk djru hrăm hră, 120 bôh rơdêh dang wang kơ čơđai sang hră tơnap tap, sa bôh sang dô̆ kơ čơđai drit druai hăng 1.500 anung gơnam hăng abih bang nua rơbêh kơ 1 klai prăk. Adơi Nguyễn Quách Tuệ Minh, sa amăng hơdôm čơđai dưi hmâo mă gơnam tam brơi thâo:

 “Kâo mơ-ak biă yua kơ blan prơmi kâo dưi čơkă mă rơdêh dang wang, tơlơi anun djru kâo nao sang hră amuñ hloh. Kâo ăt ƀuăn mơn hăng pô amra hrăm rơgơi pioh ƀing neh met mơ-ak pran jua”.

Kơ-iăng Khua mir sir dêh čar ta, yă Võ Thị Ánh Xuân bơni hơdôm tơlơi gir run mơng tơring čar Dak Lak lăi hrŏm hăng tơring glông Ea Hleo lăi ha jăn amăng hơdôm thun rơgao hmâo pioh laih tơlơi đing nao pha ra kơ ƀing čơđai muai. Hrŏm hăng anun, Kơ-iăng Khua mir sir dêh čar ta čang rơmang, pơ̆ anăp anai, hơdôm bôh ƀirô, anom bruă hăng hơdôm bruă mă rơđah, sit nik, iâo pơhrui tơlơi gum hrŏm mơ̆ng abih bang anom bruă kơđi čar, khul bơwih ƀong hăng abih bang mơnuih mơnam bơwih brơi dong, hmao tlôn pơsur, djru ba čơđai muai, čơđai sang hră tơnap tap hăng lăng anai lĕ bruă mă phun, sui thun.

Mut hrom mông mơ-ak tết blan prơmi amăng đơ đam dêh čar, hơdôm hrơi anai, lu khul grŭp ƀơi tơring čar Dak Lak pơsur klă ngăn rơnoh pioh pơphun hơdôm bruă ngui ngor, ƀơk gơnam tam kơ čơđai muai ƀơi hơdôm bôh plơi pla.

Gah anăp sang jơnum plơi pla ƀuôn Trăp, să Ea Hđing, tơring glông Čư̆ Mgar, tơring čar Dak Lak jing dik dak hloh. Ƀing čơđai muai amăng plơi dưi hmâo ƀing hlăk ai gah Khul hlăk ai tơring glông hăng ƀing gum djru nao pơphun jơlan hơdră Vầng trăng yêu thương hăng lu bruă ngă ngui ngor, adơi H’ Trúc Êban mơ-ak lăi:

 “Hrơi anai kâo mơ-ak biă lom dưi hmâo ƀing ayong ƀing amai rai pơ̆ anai hăng pơphun brơi tết blan prơmi tui anai. Thun dơi ăt čang rơmang mơn ƀing gơñu rai hăng pơphun tết blan prơmi mơ-ak tui anai, bruă mă ngui ngor tui anai mơ-ak biă”.

Ơi Y Tứ Niê, Khua ƀuôn Trăp brơi thâo hmâo laih 100 anung gơnam dưi ƀơk brơi ƀing čơđai amăng ƀuôn amăng tal anai. Lu thun rơgâo, hăng tơlơi gum djru mơng hơdôm khul grŭp hăng hơdôm bôh anom bruă gum djru, rim tal tết blan prơmi, ƀing čơđai dưi gum hrŏm hơdôm tơlơi ngui ngor, jơnum ngui grŭp dik dak. Amăng rim jơlan hơdră, hơdôm khul grŭp leng kơ gum hrŏm pơphun pơhrua hrŏm lu bruă mă ngui ngor rah hăng pơtô juăt rah bơdjơ̆ nao rơnăk agaih drơi jăn, pơgang anih anom dô̆, pơkra glăi gơnam mă mơng djah djâo.

 “Amăng hơdôm thun jê̆ hăng anai lĕ, dưi hmâo tơlơi lăng ba mơng gong gai plơi pla ăt kah hăng ƀing thâo tơngiă lĕ ƀuôn Trăp hmâo čơkă mă lu ƀơk gơnam tam mơng hơdôm bôh anom bơwih ƀong ăt kah hăng hơdôm khul grŭp. Rơgao hơdôm jơlan hơdră tui anai djru neh wa hơđong pran jua kơ hơdră pơtrun, hơdră bruă gum djru mơng Ping gah, hơđong pran jua mă bruă ngă đang hmua. Hăng ƀing čơđai muai lĕ, ƀing čơđai mơ-ak biă hăng hmâo čơkă mă hơdôm gơnam tŭ yua”.

Ƀơi să Čư̆ Kbang, tơring glông Ea Sup, jơlan hơdră “Blan prơmi guai dêh čar – Tết blan prơmi glăi pơ̆ plơi pla” dưi hmâo hơdôm bôh anom gum djru pơphun hăng lu bruă mă tŭ yua. Ƀu kơnong kơ dưi ngui ngor ôh mơ, ƀing čơđai dô̆ dưi pơhrua hrŏm bruă lăi pơhing kơ pơgang anih anom dô̆ hăng pơtô juăt gru grua bôh thâo đưm hăng anăn ñu Rơman amăng tơlơi hơdip mơda djuai ania Bơnông. Ƀudah kah hăng ƀơi tơring glông Krông Bông, lu grŭp gum djru mơ̆ng ƀôn prong Hồ Chí Minh gum hrŏm hăng Khul ia jrao kyâo bơrơkal mriah pơphun jơlan hơdră tết blan prơmi pơkĕ hrŏm bruă pel ĕp tơlơi ruă, pha brơi ia jrao, ƀơk gơnam tam kơ mơnuih ƀun rin hăng čơđai muai ƀơi anai. Rơgao hơdôm jơlan hơdră, hơdôm rơbâo anung gơnam hmâo jao laih kơ ƀing čơđai muai, djru ƀing čơđai lăng ƀuh tết blan prơmi mơ-ak. Biă ñu hăng ƀing čơđai ƀơi kual asuek, ataih, hơdôm gơnam khă anet samơ̆ yôm phăn biă hăng pran jua. Ayong Y Chuôr Buôn Krông, Khua Khul hlăk ai Sang hră Đại học Tây Nguyên lăi:

 “Čang rơmang mơ-ĭt truh ƀing čơđai muai hmâo hrơi jơnum ngui tết blan prơmi kiăng ƀing čơđai hmâo dong tơlơi ngui ngor kiăng pơđĭ kyar dong ăt kah hăng djru dong bruă hrăm hră. Khă gum hrŏm jơlan hơdră ƀu hmâo lu gơnam yôm bôm samơ̆ ăt gir run abih pran jua mơn kiăng ƀing čơđai ƀơi plơi pla, biă ñu ƀing čơđai hmâo tơlơi hơdip tơnap tap”.

Hơdôm anung gơnam lĕ ƀañ kĕo, gơnam yua hrăm hră ƀudah hơdôm anung prăk khă anet samơ̆ hmâo bôh tŭ yua prong gah pran jua, jai jing yôm phăn hăng ƀing čơđai ƀơi hơdôm kual tơnap. Ƀu kơnong bruă mă djru ƀing čơđai hmâo dong tơlơi ngui ngor đôč ôh, rim jơlan hơdră tết blan prơmi truh hăng hơdôm bôh plơi pla ăt lĕ tal pioh ƀing čơđai lăng ƀuh tơlơi mơ-ak, dik dak mơng tal Tết blan prơmi đưm mơ̆ng djuai ania./.