Sang hră gưl sa Čư̆ Mlan, tơring glông ƀơi guai dêh čar Ea Sup hơmâo 600 čô čơđai sang hră mơ̆ng anih 1-5. Amăng mrô anai, hơmâo rơbêh 140 čô čơđai dŏ glăi hrăm hră hăng huă ƀong ƀơi sang hră hrŏm hăng 40 čô čơđai sang hră pơkŏn amăng să dŏ glăi ƀơi sang hră anai. Nai Trần Thị Thủy, Khua sang hră brơi thâo, abih bang čơđai sang hră dŏ glăi huă ƀong ƀơi sang hră dưi hơmâo prăk djru asơi huă hrơi dong hăng asơi huă či tlam. Rơnoh prăk djru boh ƀiă ñu sa čô čơđai sa wơ̆t huă 8.500 prăk. Bruă djru prăk ƀong huă dua wơ̆t yang hrơi dong hăng či tlam djơh hăng anai, djru kơ sang anŏ čơđai sang hră plai ƀiă kơniă amăng bruă ĕp prăk čem rông ană bă dŏ hrăm hră, laih anun djru kơ khua mua sang hră dưi pơphun na nao sang huă, sang apui mơ̆ng sang hră hơmâo mrô čơđai dŏ glăi huă ƀong djop huăi rơpa dlar, dưi hrăm hră hơđong pran jua. Nai Trần Thị Thủy brơi thâo:

“3 thun hăng anai, khul djru tơlơi khăp pap hơmâo djru na nao prăk ƀong huă kơ čơđai sang hră ƀun rin dŏ glăi huă ƀong đih đom ƀơi sang hră, gum tơngan hrŏm khua mua sang hră hơmâo anih hơdră djru tơnă hơbai mơnong ƀong huă čem rông ƀing čơđai djop hnong đĭ pran laih anun sui thun. Tơdah ƀu hơmâo tơlơi djru mơ̆ng ƀing anun, khua mua sang hră tơnap biă mă dưi ngă. Sang hră čang rơmang lu mơnuih čơmah ăt djru hrŏm kiăng bơwih brơi asơi huă añăm ƀong kơ ƀing čơđai sang hră tơnap tap ƀun rin hơđong pran jua hrăm hră”.

Ră anai, sang hră, anih dŏ ƀơi djop sang hră giăm guai dêh čar tơring glông Ea Sup, tơring čar Dak Lak hơmâo tuh pơ alin man pơdong hiam klă laih, djop mơta gơnam yua pơtô hăng hrăm hră. Khă tui anun, yua anih dŏ prong rơhaih jơlan ataih, bruă čơkă ană bă nao hrăm hră hăng glăi pơ sang lĕ bưp lu tơlơi tơnap tap, ƀing amĭ ama čơđai sang hră ruah tui hơdră apah anih dŏ jĕ giăm sang hră, pioh ană bă dŏ glăi hrăm hră hlong huă ƀong ƀơi sang hră. Amôn Phùng Trung Hiếu, čơđai sang hră anih 2, sang hră gưl sa Čư̆ Mlan lăi, sang gơñu ataih mơ̆ng sang hră 20 km, amĭ ama apah anih dŏ hrŏm ƀing gơyut pơkŏn dŏ hrŏm sa boh anih. Tơlơi huă ƀong, anih dŏ tơnap tap biă mă. Mơ̆ng hơmâo anih dŏ pơ sang hră hăng hơmâo prăk djru huă ƀong, tơlơi dŏ dong ƀong huă hăng hrăm hră pơar gêh găl ƀiă.

“Hlâo adih dŏ amăng anih apah sang giăm sang hră, khom dŏ hrŏm huă ƀong lŭk pŭk biă mă, lu mơnuih bơrơsua, huă hmar, kâo huăi ƀu trơi ôh hlâo adih asơi añăm. Samơ̆ ră anai huă ƀong amăng sang apui huă hrŏm mơ̆ng sang hră, kâo huă trơi laih, djop mơnong ƀong huă jơman”.

Tui hăng ayong Đặng Quốc Vương, Khua git gai anom bruă khul tơdăm dra mut phung tơring glông Ea Sup lĕ, tơlơi hơdip mơda mơnuih ƀôn sang djuai ƀiă amăng tơring glông Ea Sup dŏ lu tơlơi tơnap tap, biă mă ñu čơđai sang hră mơnuih djuai ƀiă. Mơ̆ng thun 2018, anom bruă tơdăm dra mut phung tơring glông ngă hrŏm anom bruă pơyơr pran jua dêh čar hăng hơdôm mơnuih čơmah amăng lăm hăng gah rơngiao tơring čar Dak Lak pơphun djru prăk ƀong huă, prăk apah dŏ glăi kơ čơđai sang hră ƀun rin ƀơi guai dêh čar ; man pơdong sang čơđai sang hră dŏ glăi hăng rơnoh prăk truh 800 klăk, kiăng kơ ƀing čơđai hơmâo anih dŏ glăi, ƀong huă hăng hrăm hră hơđong.

Anom bruă tơdăm dra hlăk ai tơring glông ăt hlăk iâu pơthưr ƀing hơmâo pran jua čơmah djru hrŏm amăng hơdră anai, jak iâu đơ đam dêh čar ta laih anun djru ba lu čơđai ƀun rin dŏ amăng kual giăm guai dêh čar dưi tŭ mă tơlơi djru djơh hăng anai.

“Hơdră “Rông ba adơi” hơmâo pok pơhai thun tal 3. Kơnang kơ hơdră anai, ƀing adơi đeh čơđai sang hră dưi hơmâo tơlơi gêh găl pioh huă ƀong huă, anih dŏ pơ sang hră djop djel. Sit tơlơi hơdip hơđong ƀiă, ƀing gơ̆ hơmâo yơh tơlơi gêh găl hrăm hră pơar, ngă hrŏm lu bruă mă, amuñ hloh. Ƀing gơmơi ăt čang rơmang djop anom bruă, djop mơnuih ăt djru hrŏm pioh kơ hơdră anai dưi ngă tui sui hloh, jai hrơi hơmâo lu čơđai sang hră ƀun rin hơđong pran jua hrăm hră dŏ pơ kual guai dêh čar tŭ mă tơlơi djru”.