Hrŏm hăng hơdră anăp nao bơwih brơi mơnuih ƀôn sang hăng tuai hyu ngui mơak amăng bơyan rơnuč thun, plơi prong Đà Lạt prăp lui jơnum lu bruă mă kiăng hơdor glăi 130 thun akŏ pơdong hăng pơđĭ kyar, kah hăng: Jơnum mơak adoh suang jar kmar thun 2023; mlam adoh suang hrŏm Việt Nam-Hàn Quốc; pơdă rup kơ boh tơhnal bơwih ƀong huă-mơnuih mơnam mơ̆ng plơi prong Đà Lạt; hơdor glăi tal 130 thun Đà Lạt akŏ pơdong hăng pơđĭ kyar, čơkă gru apah bơni plơi prong thâo pơčeh phrâo amăng bruă adoh suang yua UNESCO pơsit.

Đặng Quang Tú, Khua Jơnum min mơnuih ƀôn sang plơi prong Đà Lạt brơi thâo, djop bruă mă lêng kơ pơphun amăng blan 12 soh, hrơi mông lu mơnuih tuai hyu ngui nao pơ Đà Lạt-Lâm Đồng. Mơ̆ng anun, hơmâo tơlơi čang rơmang biă mă kiăng pơhưč lu tuai nao ngui, pơtrut tơlơi bơwih ƀong huă mơnuih mơnam plơi prong lăi pha, tơring čar lăi hrŏm.