Găn rơgao 10 thun jing dua bơnah ngă hrŏm yôm phăn, tơlơi rô nao rai giang mah hăng ngă hrŏm kơplah wah Việt Nam -Thái Lan hơmâo hơdôm tơlơi yak nao hơđong kjăp amăng bruă kơđi čar, bơwih ƀong huă, pơtom hiăp, gru grua, wai pơgang rơnuk rơnua. Hăng ƀôn prong Đà Nẵng, ră anai hơmâo 13 akŏ bruă tuh pơ alin mơng Thái Lan glăk tŏ tui hăng abih tih giăm 60 klăk đôlar Mi, đing nao hơdôm bruă sĭ mơdrô, pơkra gơnam tam, čoh sum ao, man pơdong.

Ră anai, Đà Nẵng hơmâo 57 akŏ bruă glăk jak iâu tuh pơ alin amăng djop mơta bruă. Jơnum sang čơ jar kmar sĭ mơdrô-tuai čuă ngui-tuh pơ alin kiăng pơtrut bơwih ƀong Ngŏ-Yŭ juăt pơphun na nao ƀơi Đà Nẵng, pơhưč tơlơi mut hrŏm, ba glăi tŭ yua mơng hơdôm anom bơwih ƀong sĭ mơdrô Thái Lan. Đĭ pơhiăp amăng mông jơnum, ơi Hồ Kỳ Minh, kơ-iăng khua Jơnum min mơnuih ƀôn sang ƀôn prong Đà Nẵng čang rơmang, jơnum lĕ hrơi mông kiăng pơtrut pơsur hơdôm anom bruă tuh pơ alin mơng Thái Lan hăng wŏt anom bruă amăng đơ đam dêh čar nao tuh pơ alin pơ Đà Nẵng. Khua mua ƀôn prong Đà Nẵng ƀuăn djru brơi hăng ngă gêh gal hloh kiăng hơdôm anom bruă tuh pơ alin Thái Lan hăng hơdôm anom bruă amăng lŏn ia pok pơhai hơdôm akŏ bruă, bơwih ƀong sĭ mơdrô tŭ yua ƀơi Đà Nẵng.